پلخمري(پژواک، ١٣ ليندۍ ٩٧): د بغلان چارواکي وايي چې سلګونو کسانو په تېرو څو کلونو کې د معلولينو او د شهیدانو د وارثینو په نوم له قانوني اسنادو پرته امتیازات ترلاسه کړي دي.
دغه څرګندونې د بغلان د کار او ټولنيزو چارو رييس محمد صالح د معيوبينو او معلولينو نړيوالې ورځې په مناسبت جوړې شوې غونډې ته وکړې.
هغه وويل چې په تېرو څو کلونو کې شاوخوا زرو کسانو د معلولينو او د شهیدانو د وارثینو په نوم له قانوني اسنادو پرته کلني امتیازات ترلاسه کړي دي.
ده زياته کړه: (( د دغو کسانو اسنادونه مو له تېرو څو مياشتو راهيسې اړوندو ادارو ته استولي، ترڅو چک يې کړي او د دغو کسانو د ډېرو تذکرې يې هم د باور وړ نه دي، ځکه تصديق شوې نه دي، جعلي دي.))
دغه راز په دې غونډه کې د بغلان د شهیدانو او معلولينو ادارې امر عبدالصبور صابرزاده وويل چې په دغه ولايت د ځينو حکومتي ادارو له خوا له معلولينو سره توپيري چلند کېږي.
هغه وايي: (( هره اداره د ځان لپاره ځانګړى تخصيص لري، خو معلولينو ته تر اوسه بوديجه نه ده ځانګړې شوې چې له امله يې ډېرى معلولين په ستونزو کې دي.))
نوموړي د بغلان د کار او ټولنیزو چارو پر ریاست هم نيوکه وکړه چې له څه مودې راهيسې يې د زرګونو معلولينو امتیازات نه دي ورکړي.
همدارنګه د معلولينو په استازيتوب بسم الله ذکي وويل چې له دوى سره ځينې حکومتي مسوولين توپيري چلند کوي چې له امله يې په ستونزو کې دي.
ذکي وویل: (( حکومت دې د ځینوادارو د توپیري چلند د مخنیوي ترڅنګ د معیوبینو پرخپل ځان بساینې لپاره حرفوي پروژې په لاره واچوي.))
د يادو څرګندونو په غبرګون کې د بغلان د کار او ټولنیزو چارو ریيس محمد صالح وويل چې يواځې هغو معلولينو ته امتيازات نه دي ورکړل شوي چې اسنادونو يې ستونزه درلوده.
ده وويل چې د يادې ستونزې د حل لپاره دوى هلې ځلې پيل کړي چې وروسته به بيا دغه کسان بېرته د امتيازاتو په لېست کې شامل کړاى شي.
د يادونې ده چې په بغلان ولايت کې شاوخوا شپږ زره کسانو د معلولينو په توګه ځانونه راجستر کړي او کلني امتيازات تر لاسه کوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن