د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

ولسي جرګې د امریکا د ولسمشر د خبرو په تړاو د حکومت له دريځه ملاتړ وکړ

ولسي جرګې د امریکا د ولسمشر د خبرو په تړاو د حکومت له دريځه ملاتړ وکړ

Jan 05, 2019 - 19:12

کابل (پژواک، ۱۵مرغومی ۹۷): د ولسي جرګې یو شمېر غړو د افغانستان په اړه د امریکا د ولسمشر په وروستیو څرګندونو د نیوکې کولو تر څنګ وویل، په دې اړه د افغانستان له دريځه ملاتړ کوي او امریکا باید په دې اړه وضاحت ورکړي.

د امریکا ولسمشر څلور ورځې مخکې په خپلو تازه څرګندونو کې له روسیې، هند او پاکستانه غوښتي چې په افغانستان کې د طالبانو او نورو ترهګرو ډلو پر ضد مبارزه وکړي او ویلې یې دي چې روسیه پخوا شوروي اتحاد و، خو د افغانستان جګړې په روسیه بدله کړه او دې جګړې یې اقتصاد تخریب کړ.

هغه زیاته کړه: ((هند، روسیه او پاکستان هلته شته، دوی باید په افغانستان کې له تروریستانو سره په مبارزه کې برخه واخلي، امریکا له ۶ زره مایله فاصلې په دې ځای کې جګړه کوي.))

خو افغان حکومت د دې څرګندونو په غبرګون کې ویلي: ((د هېواد په رسمي پالیسۍ او تګلاره کې فرق دی، له همدې امله موږ د امریکا له دوست هېواد څخه د ډيپلوماتیکو منابعو له لارې په ځانګړې توګه ځینې پالیسیو په اړه د وضاحت غوښتنه کړې او هیله من يو چې په نږدې راتلونکي کې به له موږ سره شریکې شي.))

په ولسي جرګه کې د بادغیس د خلکو استازي محمد موسی جناب وویل: ((له افغانستان څخه د امریکا ځواکونو د وتلو پرېکړه او د دغه هېواد په اړه د ټرمپ وروستۍ څرګندونې افغان ولس ته هېڅ زیان نه لري، بلکه خپله امریکا زيانمنېږي.))

هغه ټرمپ د پخواني شوروي له ولسمشر ګورباچوف سره چې له افغانستانه یې خپل ځواکونه و ایستل، مشابه کړ او زیاته یې کړه، ټرمپ هم له افغانستان څخه د خپلو ځواکونو په وتلو عملا غواړي امریکا له ماتې سره مخ کړي.

د ده په خبره، ټرمپ په امریکا کې د خپل واک په دوره کې سیاسي پرېکړه نه ده کړې او په خپل سوداګریز لید به د امریکا د ټوټه ټوټه کېدو لپاره زمینه برابره کړي.

هغه وویل، د افغان حکومت مشران باید له اوسه فکر وکړي چې د نړۍ ستر قدرت کوم هېواد دی او له همغه هېواد سره دې معاملې ته دننه شي.

په ولسي جرګه کې د میدان وردګو د خلکو استازي غلام حسین ناصري وویل، امریکا باید د افغانستان په اړه د ولسمشر ټرمپ د وروستیو څرګندونو په اړه وضاحت ورکړي. نوموړي وویل، په دې برخه کې د حکومت له دريځه ملاتړ کوي.

هغه زیاته کړه، افغانستان ته د امریکايي چارواکو پرتله پسې سفرونه دا ښيي چې د پردې تر شا  ځينې پرېکړې شوې دي، خو د افغانستان خلک ترې خبر نه دي، د امریکايي ځواکونو موجودیت یو دروغجن باور رامنځته کړی چې که دوی نه وي، ګني افغانستان له بحران سره مخ کېږي.

هغه ټینګار وکړ چې د افغانستان خلک دې له پټو پرېکړو خبر شي.

د ده په خبره، له افغانستان څخه د بهرنیو ځواکونو وتلو ته باید یو مهال وېش جوړ شي، ځکه افغان امنیتي او دفاعي ځواکونو د دې توان لري چې د هېواد امنیت وساتي.

په ولسي جرګه کې د کابل د خلکو استازي الله ګل مجاهد وویل: ((له افغانستانه د امریکايي ځواکونو د وتلو په اړه د امریکا د ولسمشر د پرېکړې ملاتړ کوو.))

هغه زیاته کړه، له افغانستانه د امریکايي ځواکونو وتل به د دغه هېواد په امنیتي برخه کې مثبت بدلونونه راولي، ځکه په افغانستان کې د امریکا شتون د ناامنۍ او جګړې لامل وګرځي.

دی باور لري چې له افغانستان څخه د امریکايي ځواکونو تر وتلو وروسته به ایران، پاکستان، روسیه، چین او څو نور هېوادونه هم په افغانستان کې لاسوهنه بنده کړي.

د ولسي جرګې دویم مرستیال امیرخان یار چې د دې جرګې د نننۍ ناستې مشري یې پر غاړه وه، هم د ټرمپ د وروستیو څرګندونو په اړه د افغان حکومت له دریځه ملاتړ وکړ او ویې ویل، د روسانو پر وړاندې جهاد د افغانانو حق وو.

هغه وویل: ((د امریکايي ځواکونو د وتلو او د افغانستان په اړه د ټرمپ د وروستیو څرګندونو موضوع د ناپوهۍ له امله ترسره کېږي او ښه ده چې ټرمپ د افغانستان د حقه جهاد او تاریخي مسایلو په اړه نظر ورنه کړي.))

نښه: 

ورته راپورونه:

نظر ورکړئ

اعلانونه

Advertisement