د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

تېره میاشت کې د غزني- پکتیکا پر لار د ماین چاودنو لس ملکي وګړي وژلي

تېره میاشت کې د غزني- پکتیکا پر لار د ماین چاودنو لس ملکي وګړي وژلي

Jan 09, 2019 - 15:37

غزني ښار (پژواک، ١٩ مرغومى ٩٧): د غزني حکومتي چارواکي وايي چې وسله والو طالبانو د غزني- پکتيکا پر لويه لار ماينونه خښ کړي چې له امله يې په تېره يوه مياشت کې لس ملکي وګړي وژل شوي دي، بلخوا طالبان هم پر دغې لار د ماينونو شتون تاييدوي.

شاوخوا شپږ مياشتې مخکې وسله والو طالبانو د غزني پر اندړو ولسوالۍ بريد وکړ چې له امله يې طالبانو د غزني- پکتيکا لويه لار هم د ترافيکو پر مخ وتړله، خو د عامو خلکو يو شمېر موټر اوس هم پرې تګ راتګ کوي.

د غزني د والي وياند د مرغومي په ١٩مه پژواک خبري اژانس ته وويل چې طالبانو د غزني- پکتيکا پر لويه لار ماينونه خښ کړي دي.

هغه وايي چې دغه ماينونه ډېرى وخت د ملکي خلکو پر موټرو چاودنه کوي چې له امله يې يواځې په تېره يوه مياشت کې لس کسان وژل شوي او يو شمېر نور ټپيان شوي دي.

ده زياته کړه: ((په فرعي لارو کې يې هم ماينونه ايښي دي، هلته په مياشت کې هم يو ځل حکومتي ځواکونه نه تېرېږي، نو معلومداره ده چې قربانيان به يې ملکي وګړي وي.))

نوري دا هم وويل چې طالبانو د غزني- پکتيکا لويې لارې پنځه کيلومتره قير سړک اړولى دى او ماينونه يې په کې ايښي دي.

دغه راز د غزني د اندړو ولسوالۍ اوسېدونکي حشمت الله پژواک ته وويل، طالبانو خلکو ته ويلي چې په عمومي لار به تګ راتګ نه کوي؛ ځکه چې ماينونه په کې ځاى پر ځاى شوي دي.

هغه زياته کړه: ((شپږ مياشتې مخکې طالبانو دغه لار ونيوه، هماغه وخت يې په کې ماينونه ايښي دي چې اوس هم ځينې نابلده موټروانان پرې تګ راتګ کوي.))

همدارنګه د اندړو ولسوالۍ د چنګاه سيمې اوسېدونکي محمدالرحيم بيا پر حکومت نيوکه کوي چې د شپږ مياشتو په موده کې يې ونه شو کولاى چې دغه لار بېرته د خلکو پر مخ پرانيزي.

نوموړى زياتوي: ((زموږ د کليوالو پر موټر د ماين چاودنه وشوه، دوه تنه په کې ووژل شول څو تنه نور ټپيان شول، دغه لويه لار ټوله له ماينونو ډکه ده.))

بلخوا طالبان هم پر دغه لار د ماينونو شتون تاييدوي.

د دې ډلې وياند ذبيح الله مجاهد پژواک ته وويل چې په دې وروستيو کې پر دې لار نوي ماينونه نه دي ځاى پر ځاى شوي.

هغه وايي: ((پخواني ماينونه شته، نوي ماينونه نه دي په کې ځاى پر ځاى شوي، موږ کوښښ کوو چې د ايستلو لپاره يو پلان جوړ کړو.))

د يادونې ده، غزني د افغانستان د نا امنه ولايتونو له ډلې دى چې شاوخوا پنځه مياشتې وړاندې طالبانو پرې ډله ييز بريد وکړ چې له امله سلګونو کسانو ته مرګ ژوبله واوښته.

ورته راپورونه:

نظر ورکړئ

اعلانونه

Advertisement