د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

کوريا د کندهار له ملکي روغتون سره د روغتيايي سامان الاتو مرسته وکړه

کوريا د کندهار له ملکي روغتون سره د روغتيايي سامان الاتو مرسته وکړه

Jan 29, 2019 - 15:11

کندهار (پژواک، ۹ سلواغه ۹۷): کوریا د روغتیا نړیوال سازمان/W.H.O له لارې د کندهار له میرویس روغتون سره د طبي سامان الاتو مرسته وکړه او دغه راز دغلته یې د ساري ناروغیو د درملنې یوه ۱۴ بستر لرونکې څانګه پرانېسته.

د طبي سامان الاتو د سپارلو او ساري ناروغیو د درملنې څانګې د پرانېستلو په موخه په افغانستان کې د کوریا سفیر ریژایونګ کندهار ته سفر کړی و.

په دغو مراسمو کې د کندهار ولایت سرپرست عبدالحنان منیب، د عامې روغتیا رییس ډاکټر عبدالقیوم پخلا او نورو چارواکو ګډون کړی وو.

منیب وویل، د کوریا هېواد له خوا د روغتیا د نړیوال سازمان په همکاري د میرویس روغتون له جراحي وارډ سره د ۳۶ قلمه روغتیايي سامان الاتو مرسته وکړه.

هغه زیاته کړه، په مرسته شوو توکو کې د جراحي وارډ اړوند ناروغانو لپاره بېلابېل مشینري، کټونه، ویلچیرز او نور شامل دي چې ۳۸۰ زره امریکايي ډالر لګښت پرې راغلی دی.

نوموړي د دغې مرستې له امله د کوریا له سفیر ریژایونګ څخه ځانګړې مننه وکړه او ویې ویل، میرویس روغتون د سوېلي زون په کچه روغتیايي خدمات وړاندې کوي چې د عادي ناروغانو تر څنګ ورته د جګړې او ترافیکي پېښو ټپیان هم راوړل کېږي.

د ده په خبره، دغه روغتون دغو روغتیايي سامان الاتو ته اړتیا لرله چې د جراحي وارډ ناروغانو ته به ګڼې اسانتیاوې برابرې کړي.

د دې تر څنګ په دغه روغتون کې د ساري ناروغیو د درملنې ۱۴ بستریزه څانګه هم پرانېستل شوه.

منیب وویل، د ساري ناروغیو د درملنې پر دغه څانګه ۹۰ زره امریکايي ډالر لګښت راغلی چې د W.H.O په همکارۍ د کوریا له خوا ورکړل شوي دي.

ده زیاته کړه، دغه څانګه ۱۴ بستره لري چې د ساري ناروغانو درملنه به په کې تر پخوا په ښه توګه کېږي.

ميرويس حوزوي روغتون چې په ١٣٥٧ لمريز کال کې يوازې د کندهار لپاره جوړ شوى، اوس د حوزې د پنځو ولايتونو په کچه د ٦،٨ ميليونه نفوس لپاره فعاليت کوي.

دغه روغتون د هېواد په کچه تر ټولو مصروف روغتون ګڼل کېږي چې د تشکيل له کمښت او ځاى د تنګوالي له امله له ستونزو سره مخامخ دی.

د کوریا سفیر کندهار کې د دغو پروژو د پرانېستې تر څنګ د دې ولایت له سوداګرو سره هم ولیدل.

په دې لیدنه کې د کندهار ولایت سرپرست د کوریا له سفیر څخه وغوښتل چې دلته دې یو معیاري او مجهز روغتون جوړ کړي، ځکه د دې ولایت په ګډون د ټول زون ناروغان میرویس روغتون ته د درملنې لپاره راځي او دغه روغتون بسنه نه کوي.

نوموړي دغه راز د کوريا د سکالرشيفونو او د دغه ولايت په يو شمېر ولسواليو کې د ښوونځیو لپاره د ودانیو جوړولو غوښتنه هم وکړه.

يو شمېر سوداګرو بیا د صنعت او سوداګرۍ د ودې په موخه د وېزو په برخه کې د اسانتیاوو غوښتنه وکړه او یادونه یې وکړه چې د سوداګرۍ په برخه کې دواړه هېوادونه له پخوا ډېرې اړیکې لري.

د کوریا سفیر ریژایونګ وویل، هېواد یې په بېلابېلو برخو کې له افغانستان سره یو میلیارد ډالر مرسته کړې ده او هڅه کوي د پوهنې، روغتیا او سوداګرۍ برخو کې خپلو مرستو ته دوام ورکړي.

ده یادونه وکړه چې د ولایتي ادارې او سوداګرو غوښتنې به له خپل دولت سره شریکوي او حل لارې به ورته لټوي.

ورته راپورونه:

نظر ورکړئ

اعلانونه

Advertisement