د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د سنګين اوسېدونکي : د جګړې ښکېلې خواوې دې نور د جنګ پر ځاى سوله وکړي

د سنګين اوسېدونکي : د جګړې ښکېلې خواوې دې نور د جنګ پر ځاى سوله وکړي

Jan 31, 2019 - 16:51

لښکرګاه (پژواک، ١١ سلواغه ٩٧): د هلمند د سنګين ولسوالۍ د وروستيو پېښو د قربانيانو د کورنيو غړي وايي چې ښکېلې خواوې دې نور د جګړې پر ځاى سوله وکړي، ځکه د جګړو اصلي قربانيان عام خلک دي.

په تېرو څو ورځو کې په سنګين ولسوالۍ کې د دوو بېلابېلو پېښو په ترڅ کې ٢٠ ملکي وګړو ته مرګ ژوبله واوښته چې د دې ولسوالۍ اوسېدونکي يې اندېښمن کړي دي.

په دې اړه د سنګين ولسوالۍ يوه قومي مشر محمد طاهر پژواک خبري اژانس ته وويل چې په تېرو څو کلونو کې د پرله پسې جګړو له امله ډېره قرباني ملکي وګړو ورکړې ده.

د نوموړي په وينا، په تېرو شاوخوا لسو ورځو کې په دې ولسوالۍ کې د هوايي بريد او چاودنې له امله ٢٠ ملکي وګړو ته مرګ ژوبله واوښته چې له هغه وروسته په دې ولسوالۍ کې يو ډول وېره خپره شوې ده.

هغه زياته کړه: ((څوک خپل مړى نه خښوي، څوک فاتحه نه اخلي، خلک بېخي زيات ډار شوي دي، موږ له ښکېلو غاړو غواړو چې نور سوله وکړي.))

دغه راز د سنګين بل اوسېدونکي عبيدالرحمن د لښکرګاه په ايمرجنسي روغتون کې پژواک ته وويل: ((ورور مې په جګړه ټپي شوى، اوس مې دلته راوړى دى، جګړې دربدره کړي يو، هر څه را نه پاتې دي.))

ده هم ټينګار وکړ چې جګړه د حل لار نه ده، بايد حکومت او طالبان سوله وکړي، ځکه د جګړې اصلي قربانيان عام خلک دي.

په ورته وخت کې د ايمرجنسي روغتون يوې سرچينې پژواک ته وويل چې په سنګين کې د وروستيو پېښو له امله د درېيو ماشومانو په ګډون څلور تنه لا تراوسه له دوى سره بستر دي.

په دې اړه لښکرګاه کې مدني فعال عبدالحق ځواکمن پژواک ته وويل چې د جګړې دواړه خواوې بايد د جګړې قوانين په پام کې ونيسي او د ملکي وګړو د استوګنې په سيمو کې جګړه ونه کړي.

ده ټينګار وکړ چې د سولې مذاکراتو د پايلو تر معلومېدو بايد حکومت او طالبان اوربند وکړي.

همدارنګه د هلمند ولايتي شورا رييس عطاءالله افغان پژواک ته وويل چې پر عامو خلکو د هوايي بريدونو کول د دولت باور د خلکو پر وړاندې له منځه وړي.

ده اندېښنه ښوده، که سوله ونه شي، نو د ملکي وګړو د مرګ ژوبلې کچه به نوره هم لوړه شي.

د يادو څرګندونو په اړه د هلمند د والي وياند عمر ځواک پژواک ته وويل چې حکومتي ځواکونه د عملياتو پرمهال د ملکي وګړو د ژوند خونديتوب  ته جدي پاملرنه کوي.

هغه ادعا وکړه چې ملکي وګړو ته د طالبانو د بريدونو له امله مرګ ژوبله اوړي او بله دا چې طالبان د خلکو له کورونو څخه د سنګر په توګه استفاده کوي.

بل لور ته طالبانو د يادو څرګندونو په اړه تر اوسه څه نه دي ويلي.

په هلمند کې د بشري حقونو کمېسيون د معلوماتو له مخې، د روان کال له پيله په دغه ولايت کې ١٩٥٠ ملکي وګړو ته مرګ ژوبله اوښتې ده.

ورته راپورونه:

نظر ورکړئ

اعلانونه

Advertisement