د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

په کندهار کې د بلک هاک چورلکو ۱۴ پیلوټان او ۱۲ نښه ویشتونکي فارغ شول

په کندهار کې د بلک هاک چورلکو ۱۴ پیلوټان او ۱۲ نښه ویشتونکي فارغ شول

Feb 06, 2019 - 18:42

کندهار (پژواک، ۱۷ سلواغه ۹۷): په کندهار کې د هوايي لوا اړوند د بلک هاک چورلکو ۱۴ پيلوټان او ۱۲ نښه ویشتونکي تر درې میاشتنۍ روزنې وروسته فارغ شول او په خپل ماموریت یې پيل وکړ.

په دې اړه په کندهار هوايي ډګر کې مراسم جوړ شوي وو چې د کندهار د هوايي لوا قومندان جنرال عبدالرازق شېرزي، د بهرنیو ځواکونو مسوولینو او نور چارواکو په کې ګډون کړی وو.

د کندهار هوايي لوا قومندان جنرال عبدالرازق شېرزي پژواک خبري اژانس ته وویل، فارغو شوو ۱۴ پیلوټانو او ۱۲ نښه ویشتونکو درې میاشتنې روزنه تر لاسه کړې او د دې جوګه دي چې بلک هاک چورلکې وکاروي.

هغه زیاته کړه، د کندهار د هوايي لوا اړوند په روزنیز مرکز کې د بهرنیو روزونکو له خوا تر دې وړاندې هم د بلک هاک چورلکو ۴۲ پیلوټان روزل شوي او دغه لړۍ روانه ده.

شېرزي یادونه وکړه چې د چورلکو له تر لاسه کولو سره جوخت یې د روزل شوو پيلوټانو په شمېر کې هم زیاتوالی راځي.

دی وايي، تر دې مهاله د امریکا متحده ایالاتو له خوا د ژمنه شوو ۴۶ بلک هاک چورلکو له ډلې یې ۲۸ چورلکې تر لاسه کړي او په هرو دوو- دریو میاشتو کې دوې یا درې دغه چورلکې تر لاسه کوي.

دغه راز ده یادونه وکړه چې تر دې مهاله یې ۱۵ باله ایم. ډي ۵۳۰ وړې چورلکې هم تر لاسه کړي دي او همدومره شمېر نورې چورلکې به ژر تر لاسه کړي.

شېرزی وايي، د نوو چورلکو په تر لاسه کولو او د پیلوټانو په روزلو سره اوس د کندهار هوايي لوا پیاوړې شوې او د اړتیا پر مهال د شپې او ورځې له پلوه الوتنې کوي.

بل لور ته د کندهار د هوايي لوا د روزنیز مرکز بهرني روزونکي وايي چې افغان هوايي ځواک نوي پړاو ته داخل شوی او پر خپلو پښو د درېدو پر لور ځي.

فارغ شوي پیلوټان وايي، د روزنې په بهیر کې یې دا وړتیاوې تر لاسه کړي چې بلک هاک الوتکې په ډېره ښه توګه وکاروي او خپل ماموریت تر سره کړي.

د یاودنې ده چې د کندهار هوايي لوا ته به تر راتلونکو دوو کلونو پورې ټولټال ۴۶ باله بلک هاک چورلکې ورکړل شي چې ۲۶ یې جنګي او پاتې یې اکمالاتي دي.

په کندهار کې د بلک هاک چورلکو پیلوټان په داسې حال کې خپل رورنیره دوره بشپړوي او فارغېږي چې تېره ورځ سیګار د افغان هوايي ځواک د ظرفیت په اړه اندېښنه ښودلې او دغو ځواکونو ته یې د الوتکو د نه ورکولو سپارښتنه کړې ده.

د افغانستان د بیارغونې د چارو امریکایي مفتش (سیګار) وایي چې افغان هوايي ځواک د بلک هاک هلیکوپترو د چلولو لپاره پوره پیلوټان او د ساتلو لپاره یې انجنیران او تجهیزات نه‌لري.

امریکا تر دې دمه افغانستان ته ۱۶ UH-60 هلیکوپترې ورکړې دي، ټاکل شوې چې تر ۲۰۲۳ پورې دا شمېره ۱۵۹ ته ورسیږي.

د پلان له مخې امریکايي بلک هاګ الوتکې به د روسیې الوتکو ځای ونیسي، دا مهال افغان ځواکونه روسۍ څرخي الوتکې کاروي.

د افغانستان هوايي پوځ چې یو مهال په سیمه کې ځواکمن بلل کېده د کورنیو جګړو پر مهال ختم کړل شو او ډېرې الوتکې یې په جګړو کې ویجاړې او آن په ناقانونه توګه ګاونډیو هېوادونو ته قاچاق شوې.

ورته راپورونه:

نظر ورکړئ

اعلانونه

Advertisement