د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د بودجې او تشکیل کمښت کندهار کې د روغتیا پر وړاندې جدي ستونزې دي

د بودجې او تشکیل کمښت کندهار کې د روغتیا پر وړاندې جدي ستونزې دي

Feb 11, 2019 - 18:33

کندهار (پژواک، ۲۲ سلواغه ۹۷): د کندهار د عامې روغتیا رییس وايي، د بودجې کمښت او پر وخت نه رسېدل، کم تشکیل، لږ روغتیايي مرکزونه  او په ځینو سیمو کې د روغتيايي مرکزونو لپاره د معیاري ودانیو نشتوالی په دې ولایت کې د روغتیا سکتور پر وړاندې لویې ستونزې دي.

د عامې روغتیا رییس ډاکټر عبدالقیوم پخلا دغه څرګندونې نن په یوه خبري غونډه کې خبریالانو ته وکړې.

پخلا وویل، په کندهار کې د نفوس په تناسب د روغتیايي خدماتو وړاندې کول جدي ستونزه ده، ځکه د احصایې د مرکزي ادارې د شمېرو له مخې د دې ولایت نفوس ۱،۳ میلیونه، د ملګرو ملتونو د ادارو د شمېرو له مخې ۱،۶ میلیونه او د پولیو کمپاین د شمېرو له مخې ۲،۶ میلیونه تنه دی چې درې واړه شمېرې یو له بله لوی توپیر لري.

د ده په خبره، دوی د احصایې د مرکزي ادارې د شمېرو له مخې امکانات تر لاسه کوي چې په دې حساب د کندهار نیمايي نفوس له روغتیايي اسانتیاوو بې برخې پاتې دی.

دی وايي، اوسمهال په کندهار کې د عامې روغتیا وزارت، مرستندویه ادارو او خصوصي سکتور په مرسته د میرویس حوزوي روغتون په ګډون ۲۱۵ روغتیايي مرکزونه فعال دي چې په دې کې بشپړ، بنسټیز، ګرځنده، فرعي او نور مرکزونه شامل دي.

د ده په خبره، له دې ډلې ۷۱ روغتیايي مرکزونه د دولت او ۱۹ د خصوصي سکتور په پانګونه جوړ شوي دي.

پخلا وویل، په روان زېږدیز کال کې د دې ولایت ټولو روغتیايي مرکزونو ته ۲،۴ تنو ناروغانو مراجعه کړې ده، چې ۸۴ زره ۲۶۴ ناروغان بستر شوي، ۲۱ زره ۴۸۴ ناروغان عملیات شوي دي.

ده دا هم وویل چې په دې وروستیو کې د کندهار ښار او ولسوالیو په ډېرو روغتیايي مرکزونو کې نسايي او ولادي خدمات هم وړاندې کېږي او په دې کال کې ۴۳ زره ۶۱۷ ولادتونه شوي دي.

د روغتیايي خدماتو اړوند د وقایوي برخې په اړه پخلا وویل چې په کندهار کې پولیو لویه ننګونه ده او دوی په روان کال کې ۱۱ د واکسین کمپاینونه تر سره کړي دي.

د بې کیفیته او جعلي درملو او خوراکي توکو په اړه نوموړي وویل چې په روان کال کې یې د ۷ کمپاینونو په ترڅ کې ۶۴ ټنه غیرمعیاري او تر وخت تېر خوراکي توکي او ۹۵ ټنه غیر معیاري او جعلي درمل راټول کړي او له منځه وړي دي.

په پرمختیايي برخه کې نوموړي د ۱۰ پروژو یادونه وکړه چې په کندهار ښار او ولسوالیو کې د ۱۰۹ میلیونه افغانیو او ۲،۱ میلیون یورو په لګښت روانې دي.

په دغو پروژو کې د ژېړۍ ولسوالۍ ۳۰ بستریز روغتون، د مقاوم نري رنځ د رملنې ۲۴ بستریز روغتون، د عدلي طب مرکز او په یو شمېر ساحو کې د روغتیايي مرکزونو جوړول شامل دي.

دغه راز ده یادونه وکړه چې د ۱۱۰ میلیونه افغانیو په لګښت یو شمېر پروژې لکه د نوي ۳۵۰ بستریز روغتون د احاطې دېوال، په میرویس روغتون کې د ساري نارویو د درملنې وارډ، په کندهار زندان کې د ساري ناروغیو د درملنې مرکز او نور بشپړې شوي او ګټې اخیستنې ته وړاندې شوي دي.

د دې تر څنګ نوموړي د ۱۷۰ میلیونه افغانیو او ۳۸ میلیونه امریکايي ډالرو په لګښت د ۲۲ نورو پروژو د پلي کېدو یادونه هم وکړه چې له دوی سره قرارداد لري او روغتیايي خدمات وړاندې کوي لکه د معلولینو لپاره د فزیکي بیارغونې خدمات، ګرځنده ټیمونه، د توبرکلوز ناروغیو درملنه او نور.

پخلا د ۹۷ مالي کال لپاره د بودجې په اړه هم معلومات وړاندې کړل او ویې ویل چې دغه ریاست ته ۱۰۲ میلیونه افغانۍ عادي بودجه او ۶۸ میلیونه افغانۍ پرمختیايي بودجه ټاکل شوې وه چې نږدې ټوله لګول شوې ده.

دغه راز ده په دې کال کې د سلګونو زرو ډالرو په ارزښت د میرویس روغتون د جراجي وارډ لپاره د روغتیايي سامان الاتو، د توبرکلوز ناروغۍ د تشخیص د پرمختللو ماشینونو، ۲ امبولانسونو، ۱۸۹ زرنج امبولانسونو او نورو مرستو تر لاسه کولو یادونه هم وکړه.

خو ده د ځینو ستونزو یادونه هم وکړه چې د روغتیا برخې پر وړاندې لوی خنډونه دي.

ده وویل، دوی ته عادي او پرمختیايي بودجه کمه ټاکل کېږي او پر وخت نه ورکول کېږي، میرویس روغتون چې د حوزې په کچه روغتیايي خدمات وړاندې کوي اوسمهال ۳۵۰ بستره او ۴۰۰ تنه د ډاکټرانو، نرسانو، قابلو او نورو تشکیل لري چې کم دی.

دی غوښتنه کوي چې د میرویس روغتون د بسترونو شمېر دې ۶۰۰ ته لوړ شي او په همدې تناسب دې د روغتیايي پرسونل شمېر هم ډېر شي.

دغه راز ده یادونه وکړه چې په کندهار ښار او ولسوالیو کې یوازې ۷۱ دولتي روغتیايي مرکزونه بسنه نه کوي، ځکه په دې ولایت کې ۱۳۰ داسې سپنې ساحې شته چې اوسېدونکي یې له روغتیايي اسانتیاوو بې برخې دي او باید هلته روغتیايي مرکزونه ایجاد شي.

پخلا په کندهار کې د ښځینه ډاکټرانو، نرسانو، قابلو او ټکنېشنانو کمښت هم یوه جدي ستونزه ګڼي او وايي په کندهار ښار او ولسوالیو کې یې ۱۷ تنې ښځینه ډاکټرانې استخدام کړې دي.

خو ده یادونه وکړه چې په کندهار کې د روغتايي علومو د انسټيټيوټ او نورو خصوصي مرکزونو په مرسته د قابلګۍ، نرسینګ، لابراتوار او فارمیسي په برخو کې ۱۹۹۴ تنه روزل شوي او دغه راز ۲۵۹۸ تنه جدیدالشمول ښځینه او نارینه محصلین هم لري چې تر راتلونکو څو کلونو به په دغو برخو کې د بشري سرچینو د کمښت ستونزه یو مخ هواره شي.

نوموړي د کندهار په رېګستان، ښوراوک، معروف، غورک، میانشین، خاکرېز او یو شمېر نورو سیمو کې ۱۰ داسې روغتیايي مرکزونه یاد کړل چې معیاري ودانۍ نه لري او دا هم یوه جدي ننګونه ده.

دی وايي، په دغو سیمو کې به دامنیت له ښه والي سره معیاري ودانۍ جوړې شي.

نوموړي له دې ور ها خوا د بې کیفیته درملو موجودیت هم یو ګواښ یاد کړ چې دوی یې د مخینوي هڅې کوي.

دغه راز ده د روغتیا په برخه کې د زور واکو او نامسوولو کسانو مداخلې هم یوه جدي ستونزه یاده کړه چې ډېر مهال د دوی د کارونو او خدماتو وړاندې کولو پر وړاندې خنډ ګرځي.

ورته راپورونه:

نظر ورکړئ

اعلانونه

Advertisement