کابل (پژواک، ٦ کب ٩٧): طالبان وايي، ملا عبدالغني برادر ځکه د قطر په غونډه کې ګډون نه کوي چې مرکچي پلاوی د هغه له خوا ټاکل شوی او دغه ټېم ته له امریکایانو سره د خبرو واک ورکړل شوی دی.
نن (د کب شپږمه) د قطر په پلازمېنه دوحه کې د طالبانو او امریکا د مرکچي پلاوو ترمنځ د خبرو پنځم پړاو پیلېږي.
د راپورونو له مخې، د طالبانو د قطر دفتر سیاسي مرستیال او نوی رییس ملا عبدالغني برادر چې مخکې په پاکستان کې بندي و، تېر ماښام له اسلام اباده په یوه ځانګړې الوتکه کې دوحې ته تللی دی.
د طالبانو ویاند ذبيح الله مجاهد وايي، په قطر کې به یادې خبرې په ښه توګه ترسره شي.
مجاهد په دې خبرو کې د ملا برادر د نه ګډون په اړه وايي: ((د قطر په ناسته کې د ښاغلي ملا برادر اخند د نه ګډون لامل دا دی چې مرکچي ټېم د هغه له خوا اعلان شوی، یاد ټېم ځان ته رییس او غړي لري او واک ورکړل شوی چې له امریکايانو سره خبرې پر مخ بوځي.))
نوموړی دغه راز زیاته کړه: ((دا چې الحاج ملا برادر اخند د اسلامي امارت سیاسي مرستیال دی او په خبرو کې د ده په سویه د امریکايي لوري څوک نشته، څو لازمه وګڼل شي چې ملا برادر هم په دې خبرو کې برخه واخلي.))
مجاهد هغه راپورونه رد کړل چې ګني ملا برارد د طالبانو ترمنځ د سیاسي اختلافونو له امله په دې خبرو کې ګډون نه کوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن