پلخمري (پژواک، ۲۱ کب ۹۷): د بغلان ولايت په پنځو ولسواليو کې له انکشافي شوراګانو سره ځمکو ته د اوبو رسولو او له موسمي سېلابونو يې د خونديتوب په موخه د ۳۰ ميليونه افغانیو په لګښت پروژې لاسليک شوې.
د بغلان والي عبدالحي نعمتي د دې پروژو د لاسليک په مراسمو کې وويل، د اوبو او برېښنا وزارت له لوري په بغلان کې ۳۵ منل شوې پروژې پلې کېږي چې پر تطبيق به يې زرګونه جريبه ځمکه له سېلابونو خوندي شي.
هغه زياته کړه چې په دې پروژو کې استنادي دېوالونه او د سربندونو جوړول شامل دي چې په مرکزي بغلان، دوشي، پلخمري، خنجان او نهرین ولسواليو کې به تطبیق شي.
والي وايي چې د دې پروژو په پلې کېدو سره به نه يواځې کرنیزې ځمکې خړوبوي، تر څنګ يې ۲۰زره جریبه ځمکې چې د اوبو نه رسېدو له امله له حاصله پاتې وې، هم کرنې ته چمتو شي.
د بغلان د دریايي حوزې رييس واثق الله رحيمي هم کروندګرو ته د پروژو پر ټاکلي وخت د تطبیق ډاډ ورکړ او زیاته یې کړه چې دغه پروژې به تر ډېره بریده کرنیزې ځمکې له موسمي سېلابونو خوندي کړي.
د دوشي ولسوالۍ د کانال انجمن رييس حاجي قدرت الله له سېلابونو د کرنیزو ځمکو د خوندیتوب لپاره دغه پروژې پر ځای بولي او زیاتوي چې موسمي سېلابونه هر کال په دوشي ولسوالۍ کې کرل شوې ځمکې له منځه وړي چې له امله یې کروندګر مالي زیان مومي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن