جلال اباد- نيلي (پژواک، ۳ وری ۹۸): د ننګرهار د ځینو قومي شوراګانو مشرانو د ملي امنيت شورا د سلاکار حمدالله محب د وروستيو څرګندونو ملاتړ کړی او دغه راز ټينګار یې کړی چې طالبان دې د سولې بين الافغاني خبرو اترو ته غاړه کېږدي.
محب له امریکايي خبریالانو سره په یوه ناسته کې د افغان سولې خبرو لپاره پر امريکايي استازي زلمي خلیلزاد تور پورې کړی چې غواړي د خپلو شخصي ګټو لپاره د سولې په روان بهیر کې افغان حکومت څنډې ته کړي.
د ننګرهار د قومي شوراګانو د همغږۍ شورا او يو شمېر نورو قومي شوراګانو د وري په ۳مه د دغه ولايت د قومونو او قبايلو رياست کې د يوې لويې غونډې پر مهال د محب د دغو څرګندونو ملاتړ وکړ او له افغان حکومته يې وغوښتل چې د ښاغلي محب دغه دريځ تاييد کړي.
قومي مشرانو د نوموړي دغه اقدام د حکومت په کچه يو بېساری کار ياد کړ او يادونه يې وکړه چې د نوموړي د دې ملي دريځ دفاع به کوي.
د ننګرهار د قومونو د همغږۍ شورا مشر لعل اغا کاکړ وويل، له غونډې يې موخه د حمدالله محب د وروستيو څرګندونو ملاتړ، پر طالبانو بين الافغاني خبرو ته د غاړې اېښودو غږ او له نړيوالو په افغان خاوره کې د لاسوهنو نه وهلو غوښتنه ده.
هغه زياته کړه، محب لومړنی افغان لوړپوړی چارواکی دی چې يو ملي دريځ يې نيولی او د امريکا په څېر يو بهرني بیاوړي هېواد ته يې په زغرده ځواب ورکړی دی.
په غونډه کې د خوږياڼو قومي مشر ملک نظير له ټولو افغانانو وغوښتل چې د محب ننګه وکړي چې نور افغان چارواکي هم د دې ډول اقدام پورته کولو انرژي پيدا کړي.
ده وويل: ((د ظالم باچا په مخ کې حق وينا جهاد دی، محب دا جهاد وکړ، د امريکا په څېر د يو هېواد چارواکو ته يې نېغه خبره وکړه.))
د شينوارو قومي مشر چترال همت شينواري وويل، د سولې په مذاکراتو کې ورته هېڅ بهرنۍ لاسوهنه د منلو وړ نه ده او طالبان بايد له خپلو افغانانو سره لکه د ورونو پر يو ټغر کېني او سوله وکړي.
دی زياتوي، محب د افغان ولس د خولې خبره امريکا ته کړې ؛ نو ځکه خو يې د هېواد په ګوټ ګوټ کې د خبرو ملاتړ کېږي.
د يادولو ده، له دې مخکې يو شمېر نورو ولايتونو کې هم د ملي امنيت شورا د سلاکار د وروستيو څرګندونو په غبرګون غونډې شوې دي.
د يو بل خبر له مخې، د دايکنډي ولايت مدني ټولنو د سولې د مذاکراتو په تړاو د حکومت له دریځه ملاتړ اعلان کړ او يادونه يې وکړه چې د سولې خبرې باید بين الافغاني وي.
د مدني ټولنو دغه سلګونو استازو د “سولې پروسه کې د ۱۸ کلونو د لاسته راوړنو، ساتنه او اړتیا” عنوان غونډه کې اعلان وکړ چې د سولې د پټو مذاکرتو مخالف دي.
د پوهنتون استاد او د مدني ټولنې غړي محمد حسين مظفري د سولې په پروسه کې صداقت مهم اصل وګاڼه او هيله يې وکړه چې ښکېلې غاړې بايد رښتيني و اوسي.
هغه زياته کړه: ((سوله اړتیا ده، خو نه بايد مبهمه او د پردې تر شاه وي.))
حميدالله رستګار دایکنډي د مدني فعالانو په مشرۍ وويل، د سولې په پروسه کې بايد د افغانستان د ۱۸ کلونو راسته وړانې له منځه ولاړې نه شي.
رستګار وايي: ((اساسي قانون، ملي شورا، د مېرمنو حقونه، رسنۍ، امنيتي او دفاعي ځواکونه، ډیموکراسي او نور ډېر پرمختګونه د افغانستان د ۱۸ کلونو راسته راوړنې دي، دا لاسته راوړنې بايد وساتل شي او د پټو مذاکراتو ښکار نه شي.))
نوموړي يادونه وکړه چې د سولې خبري بايد بين الاافغاني وي، څو افغانستان ته با عزته سولې برخمن شي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن