د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

اتمر يو ځل بيا تر ټاکنو مخکې د موقت حکومت غوښتنه وکړه

اتمر يو ځل بيا تر ټاکنو مخکې د موقت حکومت غوښتنه وکړه

Mar 25, 2019 - 14:51

مزارشريف (پژواک، ۵ ورى ۹۸): د سولې او اعتدال ټيم  مشر  او د ولسمشرۍ کانديد محمد حنيف اتمر وايي چې په افغانستان کې د سولې پروسې د برياليتوب لپاره د مؤقت حکومت رامنځته کېدل يې په کاري لومړيتوب کې دی.

نوموړي دغه څرګندونې په مزارشريف کې د حمل په ۵مه د مارشال فهيم د مړينې په مناسبت جوړه شوې غونډه کې وکړې.

دې غونډه کې د بلخ پخواني والي او د جمعيت ګوند اجرايي رييس عطامحمد نور تر څنګ د ياد ټيم ګڼ شمېر مرکزي او سيمه ييزو مشرانو ګډون کړی و.

حنيف اتمر وويل چې په افغانستان کې د ازادۍ، رفاه او عدالت پلي کېدو لپاره به په ګډه کار کوو.

هغه خلکو ته ډاډ ورکړ چې د مجاهدينو لار به استمرار پيدا کوي.

اتمر بلخ کې د پخواني والي عطامحمد نور ماموريت هم وستايه او زياته يې کړه چې په  ټاکنو کې د دوی د ټيم د بريالي کېدو په صورت کې به د نور ماموريت دوام پيدا کوي، خو هغه کره نه کړه چې کوم ماموريت يې موخه دی.

نوموړي له نوروز مراسمو يوه اوونۍ مخکې د بلخ د امنيه قوماندان پر ټاکل کېدو راپورته شوي جنجال ته په اشارې وويل چې د حکومت له خوا عهد شکني، لښکر کشي او د غير مشروع قوې استعمال د خلکو د نفرت او انزجار وړ دی.

هغه زياته کړه چې که حالت په سم ډول نه وای مديريت شوی، نو يو لوی مشکل به رامنځته شوی وای.

اتمر وويل: ((زما له هر سياسي مشر څخه دا غوښتنه او توقع ده چې د ملت د وحدت لپاره کار وکړي؛ نه دا چې د ملت او خلکو پر ضد قوه استعمال کړي.))

هغه له حکومته غوښتنه وکړه چې د بلخ امنيې قوماندانۍ پر سر له راپورته شوي جنجال وروسته له عطامحمد نور سره خپل کړی توافق دې ژر تر ژره عملي کړي.

اتمر د توافق پر جزئياتو باندې خبرې ونه کړې.

هغه همدا راز وويل چې سوله او ټاکنې هغه مهم شيان دي چې په مخکې يې لري.

د اتمر په وينا، خلک له جګړې ستړي شوي او سوله غواړي.

نوموړي زياته کړه چې د تېرو پنځو کلونو په اوږدو کې ۵۰زره نظامي او ملکي افغانان وژل شوي او ۹۸ زره نور يې ټپيان شوي دي.

اتمر وويل: ((دا د لېونتوب وضعيت او تحميلي جنګ بايد نور پای ته ورسېږي، موږ سوله غواړو، هغه سوله، چې عدالت ولري او پايداره وي.))

هغه دا هم وويل چې داسې سوله غواړي چې د جمهوري اسلامي نظام په چوکاټ کې تامين شي؛ څو هر چاته په کې خپل حقوق ورسېږي.

هغه نيوکه وکړه، چې حکومت د سولې پروسې د تخريب په لټه کې دی او په وينا يې چې حکومت په لوی لاس نه غواړي، چې بين الافغاني مذاکراتو ته داخل شي.

د هغه په خبره، د سولې پروسې تخريب د مصيبت رامنځته کېدو لامل کېدلای شي.

نوموړي په حکومت غږ وکړ، چې د سولې د مخالفت له امله د ملت له غبرګون سره مخ دی.

اتمر په حکومت دا تور هم پورې کړ، چې په لوی لاس د ټاکنو د ځنډولو کوښښ کوي

هغه وويل: (( حکومت ته وايو، تاسې انتخابات کوئ او که کومه بله برنامه لرئ؟ او که غواړئ له دې انتخاباتو هم د ولسي جرګې ټاکنې جوړې کړئ)).

نوموړي زياته کړه چې د قضاياوو پر وړاندې د حکومت اوسنی روش بايد متوقف شي.

اتمر دا هم وويل، چې د غبرګولي له لومړۍ نېتې اخوا اوسنى حکومت خپل ټول مشروعيت له لاسه ورکوي.

د هغه په خبره، د قدرت د خلا رامنځته کېدو د مخنيوي په موخه به د مؤقت حکومت رامنځته کېدل د دوی په کاري لومړيتوب کې وي.

د هغه په وينا، داسې موقت حکومت به رامنځته کوي، چې د سولې او انتخاباتو ترسره کېدو لپاره رښتينې هڅې وکړي؛ نه دا چې د دې ملي پروسو مخه ونيسي.

ورته راپورونه:

نظر ورکړئ

اعلانونه

Advertisement