کابل (پژواک، ٦ وری ۹۸): اروپايي ټولنه وايي چې د سولې بهیر په افغانانو پورې اړه لري او دغه ټولنه د افغانانو په مشرۍ د سولې له بهیره ملاتړ کوي.
د اروپايي ټولنې د بهرنی سیاسي مسوولې فدریکا موګریني نن په سپېدار ماڼۍ کې له ډاکتر عبدالله عبدالله سره د لیدنې پر مهال وویل، سوله د خلکو یوه جدي اړتیا ده نو له دې امله اروپايي هېوادونه د افغانانو په مشرۍ د سولې له بهیره ملاتړ کوي.
نوموړي زیاته کړه، اروپايي ټولنې تل په ټولو برخو کې د افغانستان له خلکو ملاتړ کړی او د سولې په بهیر کې د افغانانو تر څنګ ده او د ولسمشرۍ له ټاکنو به هم ملاتړ وکړي.
اجرائیه رییس ډاکتر عبدالله عبدالله د اروپايي ټولنې د بهرني سیاست مشرې فدریکا موګریني ته د هرکلي تر څنګ وویل، د سولې ټینګښت مخکنیو تیارو ورځو ته د ګرځېدو معنا نه لري، بلکې د تېرو لاسته راوړنو په ساتلو د خلکو او هېواد د تقویې په معنا دی.
هغه زیاته کړه: ((د خلکو تمه د ولسمشرۍ او نورو عادلانه ټاکنو ترسره کېدل وو او د عادلانه سولې ټينګښت د خلکو هیله ده.))
نوموړي روښانه کړه چې د ملي یووالي حکومت د نړیوالو په ځانګړې توګه اروپايي ټولنې په ملاتړ د ټاکنو ترسره کېدو او د عادلانه سولې ټينګښت ته ژمن دی.
دا په داسې حال کې ده چې موګریني تېره ورځ د پاکستان د بهرنیو چارو له وزیر شاه محمود قریشي سره د لیدنې پر مهال یادونه وکړه چې په افغانستان کې سوله د پاکستان په ګټه ده.
نوموړې زیاته کړې، اروپايي ټولنه د افغانستان دسولې خبرو له اوسني بهیره ملاتړ کوي او هڅه کوي چې په خپل اغېزمن رول په افغانستان کې د یوې تل پاتې سولې د راتلو په برخه کې د اړوند لوریو تشویش لرې کړي.
هغه ویلي: ((موږ له پاکستان سره ګډ کار کوو څو په افغانستان کې سوله راشي.))
د پاکستان د بهرنیو چارو وزیر شاه محمود قریشي په دې لیدنه کې ژمنه کړې چې هېواد به یې د افغان سولې په بهیر کې خپل مسوولیت ترسره کړي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن