د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

په اتو ولایتونو کې د اوبو لګولو ۳۱ شبکې جوړېږي

په اتو ولایتونو کې د اوبو لګولو ۳۱ شبکې جوړېږي

Apr 16, 2019 - 17:27

کابل (پژواک، ٢٧ ورى ٩٨): د کرنې وزارت وایي، د ۴۷۱ میلیونه افغانیو په لګښت د هېواد په اتو ولایتونو کې د اوبو لګولو ۳۱ شبکې جوړېږي چې نږدې ۹زره کورنۍ به ترې ګټه پورته کړي.

د کرنې او اوبو لګولو وزارت وزیر نصیراحمد دراني نن له ودانیزو شرکتونو سره د دغو پروژو د  تړونونو تر لاسلیکولو وروسته وویل، دغه شبکې په کابل، ننګرهار، کونړ، هرات، بلخ، بغلان، پروان او لوګر ولایتونو کې جوړېږي.

د ده په وینا، د اوبو لګولو دغه شبکې ۱۱زره او ۴۵۴ هکټاره کرنیزې ځمکې خړوبوي او د دغو شبکو له اوبو به اته زره او ۶۸۵ بزګر او بڼوال ګټه پورته کوي.

هغه زیاته کړه، د اوبو لګولو د دغو شبکو جوړول د اوبو مدیریت ښه کوي او د اوبو د ضایعاتو کچه ټيټوي او تر څنګ یې د دې لامل کېږي چې د کرنیزو محصولات تولید ډېر او کیفیت یې ښه شي او په پایله کې به یې ښه صادرات ولرو.

درانې د خپلو خبرو په ترڅ کې وویل، د دغو پروژو په پلې کولو سره له ۱۵ تر ۲۰ سلنه پورې د اوبو د ضایعاتو مخه نیول کېږي او تر څنګ یې د دغو شبکو تر پوښښ لاندې کرنیزو ځمکو د کرنیزو حاصلاتو کچه هم ۱۵ تر ۲۰ سلنه زیاتېږي.

دى زياتوي، دغه راز د اوبو لګولو د یادو شبکو رغول فني کارګرو، لکه خټګر او ترکاڼ او نورو غیر فني کارګرو ته د ۲۳۵ زره او ۵۶۲ کاري ورځو د کار زمینه هم برابروي.

نوموړى وايي، دغه شبکې د کرنې وزارت د دوو برنامو «CLAP او SNaPP-2» له خوا پلې کېږي او د کرنې د پراختیا لپاره د نړیوال مرستندوی صندوق «IFAD» له خوا تمویلېږي.

د کرنې وزیر په وینا چې د دغو پروژو له پلې کولو د دوى اساسي موخه د خوړو خوندیتوب او په هغو ولایتونو کې چې د روان کال تر پایه په کې دغه شبکې جوړېږي، د بېوزلۍ کچې ټيټول دي.

سرچینه زیاتوي، د اوبو لګولو د دغو شبکو له ډلې د کابل په سروبي او خاکجبار ولسوالیو کې دوه شبکې، د پروان ولایت په شینواري او بګرام ولسوالیو کې دوه شبکې، د لوګر په محمد اغې ولسوالۍ کې یوه شبکه، د ننګرهار ولایت په دره نور، ښېوې، کامې، بهسود او کوز کونړ ولسوالیو کې د اوبولګولو شپږ شبکې، د بلخ ولایت په چهاربولک، نهرشاهي او دهدادي ولسوالیو کې اته شبکې، د هرات ولایت په زنده جان، کرخ او انجیل ولسوالیو کې ۱۰ شبکې او د بغلان په ده صلاح او اندراب ولسوالیو کې د اوبو لګولو دوه شبکې جوړېږي.

د سرچینی په وینا، له تېر کال څخه را په دېخوا د کرنې وزارت د اوبو لګولو په نوو لارو چارو لاس په کار شوى، څو وکولای شی د اوبو له ضایعاتو پرته او په خپل وخت بزګرانو ته د دوی د ځمکو د خړوبولو زمینه برابره کړي.

د کرنې وزیر وویل: «سږ کال د هېواد په بېلابېلو سیمو کې د قطره یي (څاڅکي) اوبو لګولو د ۵۰ نمایشي قطعو په جوړولو سره غواړو چې د څاڅکي په سیستم د اوبو لګولو د لارو چارو دودول ډېر کړو.»

د یادولو ده، په ۹۷ او ۹۸یم کلونو کې د څاڅکي په سیستم او د لمر د انرژۍ په واسطه د کروندو خړوبول د کرنې وزارت دوه نوي لارې چارې دي.

له دغو لارو چارو څخه په استفادې سره د کرنې وزارت غواړي د اوبو او انرژۍ مدیریت ښه کړي او تر څنګ یې د هېواد د تولیداتو او صادراتو کچه لوړ کړي چې په پایله کې یې ملي اقتصاد وده وکړي او هېواد د ځان بساینې پر لور ګامونه اوچت کړي.

ورته راپورونه:

نظر ورکړئ

اعلانونه

Advertisement