ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

لاريون کوونکو د (الفتح او خالد) عملياتو د درېدو غوښتنه وکړه

لاريون کوونکو د (الفتح او خالد) عملياتو د درېدو غوښتنه وکړه

author avatar
20 Apr 2019 - 15:51
لاريون کوونکو د (الفتح او خالد) عملياتو د درېدو غوښتنه وکړه
author avatar
20 Apr 2019 - 15:51

جلال اباد (پژواک، ۳۱ وری ۹۸): د سولې ولسي حرکت غړو د ننګرهار مرکز جلال اباد ښار کې د طالبانو د الفتح او د حکومت د خالد عملياتو پر ضد لاريون وکړ او دا عمليات يې د ولس لپاره خطرناک وبلل.

دوی له دواړو لوريو د دغو عملياتو د درېدو غوښتنه وکړه او دغه راز يې د سولې د مذاکراتو د پيل لپاره پر اوربند ټينګار وکړ.

په ننګرهار کې د سولې ولسي حرکت يو شمېر غړو د وري په ۳۱مه د جلال اباد ښار له مخابراتو څلور لارې تر پښتونستان واټ پورې لاريون وکړ.

دوی د لاريون پرمهال الفتح عمليات او خالد عمليات غندو، د ملکي خلکو مرګ ژوبله دې ودرول شي، سوله غواړو او اوربند غواړو شعارونه ورکول.

د لاريون يوتن ګډونوال  عطاء الله پژواک اژانس ته وويل، د طالبانو الفتح او د حکومت خالد عملياتو کې ملکي وګړو ته مرګ ژوبله اوړي او د ولس په زيان دي؛ نو ځکه يې د بندېدو غوښتنه کوي.

نوموړي دغه راز له طالبانو وغوښتل چې د قطر او مسکو له غونډو تېر شي او په خپل هېواد کې له حکومت سره د سولې بين الافغاني خبرو اترو لړۍ پيل کړي.

د ډاکټر معروف په نوم د لاريون بل ګډونوال وويل، د جګړې او عملياتو د دوام له امله هېواد ورانېږي او له پرمختګ پاتې کيږي، چې بيا يې هم ټول زيان ولس ته رسېږي.

دی وايي: ((په نږدې ورځو کې چې د سولې مشورتي لويه جرګه جوړېږي بايد د ملت د ګټو په خاطر داسې طرحه وړاندې کړي چې حکومت او طالبان د سولې په ټغر کېنوي.))

د لاريون ګډونوالو په پای کې يو پرېکړه ليک هم صادر کړ چې د الفتح او خالد عملياتو د درېدو، د اوربند او سولې بين الافغاني خبرو د پيل غوښتنه په کې شوې وه او دغه راز د ملکي مرګ ژوبلې غندنه هم شوې وه.

د يادولو ده چې د نوي کال له پيل سره سم افغان حکومت د ټولو وسله والو ډلو د ځپلو په موخه د خالد په نوم عمليات پيل کړل چې ترې څو ورځې وروسته وسله والو طالبانو هم د الفتح په نوم د خپلو عملياتو د پيل اعلان وکړ.

دواړو خواوو په داسې حال کې د يو بل پر وړاندې د جګړې اعلان کړی چې په دې وروستيو کې د دواړو لوريو ترمنځ د سولې هڅې ګړنډۍ شوې دي.

د يادونې ده چې د سولې ولسي حرکت له خوا په لسو ولايتونو کې د دا ډول لاريونونو اعلان شوى، چې تر دې مخکې په خوست ولايت کې لومړى لاريون شوى و.

login or register a new account.

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.