د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

"طالبانو د کندوز ښار يوشمېر کورنيو ته د کورونو پرېښودو خبر ورکړى"

"طالبانو د کندوز ښار يوشمېر کورنيو ته د کورونو پرېښودو خبر ورکړى"

Apr 20, 2019 - 14:47

کندوز ښار(پژواک، ٣١ ورى ٩٨): د کندوز ښار يو شمېر اوسېدونکي د اندېښنې په څرګندولو سره وايي چې وسله والو طالبانو ورته د کورونو پرېښودو ويلي ځکه هغوى غواړي چې پر ځينو سيمو بريدونه وکړي، خو د دغه ولايت امنيه قوماندان بيا وايي چې طالبان پر ښار د بريد کولو توان نه لري.

دا په داسې حال کې ده چې دوه ورځې وړاندې وسله والو طالبانو د کندوز ښار پر زرخريد او درې سوه فاميليو سيمو بريدونه کړي وو چې له امله يې يو شمېر کسانو ته مرګ ژوبله واوښته او نږدې شپږ سوه کورنۍ نورو سيمو ته کډه شوې دي.

د کندوز ښار د درې سوه فاميليو سيمې اوسېدونکي ګل رحمان د وري په ٣١ مه پژواک خبري اژانس ته وويل چې طالبانو د دې سيمې ټولو اوسېدونکو ته خبر ورکړى چې نورو سيمو ته کډه وکړي.

هغه زياته کړه:((په جومات کې يې هم اعلان کړى او کور په کور يې هم خلکو ته ويلي چې بيا جګړه پيلوي، نو خلک دې خبر وي او خپل کورونه دې خالي کړي.))

دغه راز د زرخريد سيمې اوسېدونکي محمد نعيم هم پژواک ته وويل چې طالبانو د دې سيمې اوسېدونکو ته هم د وتلو لپاره ويلي دي.

هغه وايي: ((دا حکومت څه کوي؟ را دې شي پر طالبانو دې سم عمليات وکړي، موږ بيا نه شو کولاى چې خپل کورونه پرېږدو.))

همدارنګه د زرخريد بل اوسېدونکي نور احمد پژواک ته وويل چې تېره شپه طالبان د دوى سيمې ته ورغلي او د کورونو پرېښودو غوښتنه يې ترې کړې ده .

ده زياته کړه: ((موږ نه غوښتل چې کورونه پرېږدو، زموږ ډېر ګاونډيان لاړل، خو موږ ځاى نه درلوده ،ځکه تر اوسه همدلته يو.))

د دغه ولايت يو شمېر نورو اوسېدونکو هم ورته څرګندونې وکړې.

بل لورته په دې اړه د کندوز امنيه قوماندان سمونوال منظور ستانکزي پژواک ته وويل چې وسله وال طالبان يو ځل بيا پر کندوز ښار د بريد کولو توان نه لري.

ده وويل: ((طالبان په دغه شان تبليغاتو سره غواړي خلکو ته اندېښنې پيدا کړي، خو زه خلکو ته اطمنان ورکوم چې طالبان هېڅ هم نه شي کولاى.))

وسله والو طالبانو تر اوسه په دې اړه څه نه دي ويلي.

د يادونې ده، چې کندوز د افغانستان د نا امنو ولايتونو له ډلې څخه دى چې په تېرو څو کلونو کې يې دوه ځلې سقوط کړى دى.

ورته راپورونه:

نظر ورکړئ

اعلانونه

Advertisement