کابل (پژواک، ۱۲غویی ۹۸): د بدني ښکلا او فټنس ورزشي برخو د ۳۲۵ ورزشکارانو ترمنځ له درې اونیو سختو سیالیو څخه وروسته، ۴۵ تنو یې ملي ټیم ته لار ومونده.
دا سیالۍ د روان کال د وري په ۲۲مه د اولمپیک ملي کمېټې په زورخانه يي تالار کې ترسره شوې چې نن ملي ټیم ته د ۴۵ ورزشکارانو په غوره کولو سره پای ته ورسېدې.
د افغانستان د اولمپیک ملي کمېټې د بدني ښکلا فدراسیون مشر باور هوتک د دې مراسمو په څنډه کې پژواک خبري اژانس ته وویل چې په دې سیالیو کې د کابل له څلور زونونو څخه ۳۲۵ ورزشکارانو چې له ۵۵- ۸۵ کیلوګرامه وزنونه یې لرل، ګډون درلود او ورزشکارانو د کابل له ۴۵ بېلابېلو کلپونو څخه برخه اخیستې وه.
هغه یادونه وکړه چې د بدني ښکلا په برخه کې ۱۵ ورزشکارانو او د فټنس په دوه برخو کې چې سپورټ فزیک او اتلتیک فزیک دی، ۳۰ مخکښو ورزشکارانو د ملي ټیم غړیتوب ترلاسه کړ.
نوموړي زیاته کړه چې ورزشکاران د بدني ښکلا په سیالیو کې د وزن او د فټنس په برخه کې د ونې (قد) پر اساس غوره کېږي.
صمیم رحیمي چې له تېرو درې کلونو راهيسې د بدني ښکلا په برخه کې ورزش کوي، په دې سیالیو کې د ۶۵ کیلوګرامه وزن په درلودو وتوانېد چې د اتلولۍ لقب په ګټلو سره ملي ټیم ته لار ومومي.
دې ورزشکار وویل چې د سیالیو لپاره یې له تېرو شپږو میاشتو راهيسې اړین چمتووالی نیولی و او دا چې توانېدلی اتل شي، خوشحاله دی.
د دې برخې بل ورزشکار عبدالله چې د ۶۰ کیلوګرامه په وزن کې یې سیالي ترسره کړې، وویل چې له سیالیو خوښ دی او د لومړي مقام په ترلاسه کولو خپلې یوې هیلې ته رسېدلی دی.
نوموړي زیاته کړه چې د کابل زونونو د سیالیو له پای ته رسېدو وروسته، د بدني ښکلا ملي ټیم غوراوي سیالۍ په ولایتونو کې ترسره کېږي.
د هوتک په خبره، په دې فدراسیون کې د هېواد په کچه د بدني ښکلا ۱۱۷۰ کلپونه ثبت دي چې په هر کلپ کې له ۳۰۰ – ۵۰۰ ورزشکاران تمرین کوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن