غزني ښار (پژواک، ١٢ غويی ٩٨): د غزني حکومتي چارواکي ادعا کوي چې وسله والو طالبانو په غزني ښار کې تر ټولو مشهور زيارت پر بمونو الوځولى او طالبان په دې پېښه کې خپل لاس لرل ردوي.
د غزني د والي وياند محمد عارف نوري د غويي په ١٢مه پژواک خبري اژانس ته وويل چې وسله والو طالبانو تېره شپه درې بجې په غزني ښار کې د شمس العارفين مشهور زيارت پر ماينونو الوځولى دى.
هغه زياته کړه: ((دغه زيارت پر شمس صاحب مشهور و، هره ورځ له بېلابېلو ولايتونو لسګونه کسان د دغه زيارت ليدو ته راتلل.))
د نوري د معلوماتو له مخې، شيخ عبدالواحد چې په شمس العارفين مشهور و، د عرفان او تصوف له سرلارو بلل کېږي.
ده وويل چې نوموړى په ٦٠١ هـ ق کال کې مړ شوى او له هغه وروسته يې زيارت خلکو ته د احترام وړ و.
دغه راز د غزني ښار یوه اوسېدونکي باور پژواک ته وويل چې تېره شپه د شمس العارفين زيارت پر بمونو الوځول شوى دى.
هغه وايي: ((له نورو ولايتونو به ډېرى هغه کسان دغه زيارت ته راوړل کېدل چې پېريان به پرې ناست وو او دلته به الله ج شفا ورکوله.))
د باور په وينا، تر اوسه معلومه نه ده چې دغه زيارت د چا له خوا پر بمونو الوځول شوى دى.
خو بل لور ته د وسله والو طالبانو وياند ذبيح الله مجاهد پژواک ته وويل چې په دې پېښه کې طالبان لاس نه لري.
هغه زياته کړه: ((دا خبره حقیقت نه لري، زموږ مجاهدین په دې قضیه اصلاً خبر نه دي.))
د يادونې ده، دغه زيارت د غزني ښار په شمال لوېديځ کې د شمس په نوم کلي کې موقعيت لري.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن