د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

یونسکو د غور د منار جام د بیارغونې لپاره دوه میلیون ډالره لګښت ورکوي

یونسکو د غور د منار جام د بیارغونې لپاره دوه میلیون ډالره لګښت ورکوي

May 25, 2019 - 17:10

کابل (پژواک، ٤ غبرګولی ٩٨): د غور یو شمېر اوسېدونکي له افغان چارواکو او د ملګرو ملتونو له ښوونیز، علمي او کلتوري سازمانه غوښتي چې د غور د منارجام له خرابېدو څخه د مخنیوي لپاره دې اقدام وکړي.

د غور چارواکو ویلي، د غور د منارجام له ویجاړېدو څخه د مخنیوي لپاره عاجل اقدام شوی او د ملګرو ملتونو علمي او کلتوري سازمان (یونسکو) هم د یادې پروژې لپاره دوه میلیون امریکايي ډالر ځانګړي کړي دي.

منار جام د غور ولایت د «شهرک» سیمې په ۶۲ کیلومترۍ کې هریرود سیند ته نږدې د «جام» په کلي کې موقعیت لري.

د یونسکو سازمان د اسنادو له مخې، دغه منار په ۱۱۹۴زېږديز کال کې د سلطان غیاث الدین غوري په دوره کې جوړ شوی چې نهه متره عرض او ۶۳.۳ لوړوالي لري او د هندوستان د نوي ډهلي له «قطب منار» وروسته په نړۍ کې د خښتو تر ټولو لوړ منار دی.

د غور ولایت د اوسېدونکو شاوخوا ۳۵ مشرانو نن د اطلاعاتو او فرهنګ وزارت له سرپرستې حسینې صافۍ، طبیعي پېښو ته د رسېدو په چارو کې د دولت د وزارت مرستیال محمد قاسم حیدري او د ملګرو ملتونو د علمي او کلتوري سازمان سلاکار عمران مقصودي سره د ولسي جرګې د کنفرانسونو په تالار کې د ناستې پر مهال وویل، دغه بنسټ د سېلابونو له امله د ویجاړېدو له ګواښ سره مخامخ دی.

په ولسي جرګه کې د غور د خلکو استازي کرام الدین رضايي په دې ناسته کې وویل، له کلونو راهیسې دغه منار نه دی رغول شوی او هغه بودیجه چې یونسکو د دغه منار بیارغونې ته ځانګړې کړې وه، هم سمه نه ده مصرف شوې.

هغه د یونسکو له خوا د ځانګړې شوې بودیجې په اړه له جزئیاتو پرته زیاته کړه، د منار استنادي دېوال د سېلابونو له امله تخریب شوی او که عاجل اقدام ونه شي، دغه تاریخي بنسټ به له ویجاړېدو سره مخامخ شي.

د غور د اوسېدونکو یوه بل استازي تمیم وویل: ((موږ ته یوه پوښتنه پیدا شوې چې حکومت ولې د هغه سیمو د بیارغونې لپاره میلیونونه افغانۍ لګوي چې ۱۰۰ کاله تاریخ نه لري، خو د غور منار د ساتنې لپاره چې له ۸۰۰ کلونو ډېر تاریخ لري، هېڅ توجه نه کوي؟))

هغه زیاته کړه، د منار شاوخوا ۳۰ سلنه برخې ویجاړې شوې او دغه بهیر دوام لري.

د لوېدیځې حوزې استازو د یوه پرېکړه لیک په خپرولو له افغان حکومت، یونسکو او اغا خان بنسټ څخه غوښتي چې د غور منار د ویجاړېدو مخه ونیسي.

د اطلاعاتو او فرهنګ وزارت سرپرستې حسینې صافۍ وویل، همدا اوس غور ولایت ته له ۲۰۰ زرو ډېرې افغانۍ لېږل شوې، څو د هغه او سیمه ییزو بشري سرچینو څخه په استفاده منار ته د سېلاب د خطر مخه ونیول شي.

پېښو ته د رسېدو وزارت مرستیال محمد قاسم حیدري وویل، په تېرو څلورو ورځو کې هره ورځ د سیمې له ۱۵۰ ډېر اوسېدونکي د ۳۵۰ افغانۍ ورځنۍ مزدورۍ په بدل کې جذب شوي څو له یاد منار څخه د سېلاب مسیر بدل کړي.

هغه زیاته کړه، د دغه وزارت وزیر نجیب اقا فهیم هم نن غور ته تللی دی.

د حسینې صافۍ په خبره، د روان کال په چنګاښ میاشت کې افغانستان ته یو ایټالوي متخصص راځي څو د دغه منار وضعیت وڅېړي.

دغه راز صافۍ وايي، یونسکو د دغه منار د بیارغونې لپاره دوه میلیون ډالر مرسته کوي، خو حکومت ته یې د دغه کار د ترسره کېدو لپاره له سل زره څخه تر دوه سوه زرو ډالرو د لګښت ورکولو شرط ايښی دی.

هغه روښانه کړه، کابینې هم د ۲۰۰ زرو ډالرو ورکړه تایید کړې ده.

د یونسکو سلاکار عمران خان مقصودي هم وویل، یونسکو د غور ولایت د منار له ویجاړېدو څخه د مخنیوي لپاره دوه میلیون ډالر مرسته کوي.

هغه زیاته کړه، یونسکو پر مالي مرستې سربېره په تخنیکي برخو کې هم د افغانستان له اطلاعاتو او فرهنګ وزارت سره مرسته کوي.

ورته راپورونه:

نظر ورکړئ

اعلانونه

Advertisement