د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د غزني خلک د روغتیايي مرکزونو له خدماتو ناخوښ دي

د غزني خلک د روغتیايي مرکزونو له خدماتو ناخوښ دي

Jun 06, 2019 - 10:19

غزني (پژواک،۱۶ غبرګولی ۹۸): د غزني اوسېدونکي وايي، په دې ولایت کې لسګونه روغتیايي مرکزونه شته خو خدمات یې معیاري نه دي.

دوی د ډاکټرانو له ناسم چلند، ناروغانو ته د نه پاملرنې، کمو امکاناتو او ځینو نورو یادونه کوي چې حکومت یې باید د هواري لپاره اقدام وکړي.

د غزني د قره باغ ولسوالۍ د میرخان سیمې اوسېدونکی رحمت الله وايي، په غزني ښار او یو شمېر ولسوالیو کې روغتیايي مرکزونه شته خو خدمات یې معیاري نه دي.

هغه پژواک خبري اژانس ته وویل، د ګڼو دولتي روغتونونو ډاکټران ناروغان خپلو شخصي کتنځایونو ته ور غواړي او بهانه کوي چې ګواکې هغه درمل چې ناروغ ته باید ورکړل شي، په دولتي روغتونونو کې نشته دي.

دغه راز دی شکایت کوي چې ډاکټران د دولتي روغتونونو پر ځای ډېر وخت په خپلو شخصي کتنځایونو کې تېروي.

نوموړی دغه ستونزې د عامې روغتیا ریاست د مشرتابه له ناسم مدیریت څخه ګڼي او په دغه اداره کې د اصلاحاتو غوښته کوي.

د غزني د اندړو ولسوالی اوسېدونکي بیا د یوې بلې ستونزې یادونه کوي او وايي، په دې ولسوالۍ کې روغتیايي مرکز شته خو امنیتي ځواکونو په کې پوسته جوړه کړې چې تل د وسله والو تر بریدونو لاندې وي او خلک ورته لاسرسی نه لري.

د دې ولسوالۍ یوه اوسېدونکي جان محمد پژواک ته وویل، له یوې خوا په دغه روغتیايي مرکز کې اسانتیاوې او امکانات نشته، له بلې خوا په کې امنیتي پوسته جوړه شوې چې د وسله والو د بریدونو له امله خلک نه شي کولای خپل ناروغان دغه مرکز ته د درملنې لپاره بوځي.

دی زیاتوي: ((یوه میاشت دغه پوسته له طالبانو سره وي، بله میاشت له امنیتي ځواکونو سره، روغتیايي مرکز فلج وی، که پرانیستی هم وي نو چندان خدمات نه لري.))

د غزنۍ د ګیرو ولسوالۍ اوسېدونکي وايي، تېر لس کلونه په دې ولسوالۍ کې هیڅ روغتیايي مرکز نه و خو سږ کال په کې یو وړوکی روغتیايي مرکز پرانیستل شو چې د دې ولسوالۍ د اوسېدونکو ستونزې نه شي حلولای.

محمد ابراهیم امیري د همدې ولسوالۍ اوسېدونکی دی، نوموړی وايي، په تېرو لسو کلونو کې د دې ولسوالۍ اوسېدونکو په ډېرو سختو شرایطو کې چې جګړې به وې او لارې به بندې وې، خپل ناروغان غزني ښار او نورو ولسوالیو ته بيول.

د ده په خبره، د دغو ستونزو له امله به ډېر مهال ناروغانو خپل ژوند له لاسه ورکاوه، خو اوس چې دلته یو وړوکی روغتیايي مرکز پرانیستل شوی، د ټولې ولسوالۍ د خلکو لپاره بسنه نه کوي.

نوموړی غوښتنه کوي چې دغه مرکز دې پراخ او روغتیايي خدمات دې یې معیاري شي.

د خوګیاڼو ولسوالۍ اوسېدونکي هم له ورته ستونزو سر ټکوي او وايي، په دې ولسوالۍ کې روغتیايي مرکز شته خو خدمات یې معیاري نه دي او هغه ډاکټران کار په کې کولای شي چې د وسله والو طالبانو خوښ وي.

د همدې ولسوالۍ اوسېدونکی نعیم الله پژواک اژانس ته وویل، په ټوله کې په دې ولسوالۍ کې روغتیايي خدمات صفر دي، ډاکتران معاش اخلي خو کار نه کوي، دغه راز له ناروغانو سره هم مسلکي چلند نه کوي.

نوموړی چې خپل ناروغ یې غزني ښار ته راوړی زیاتوي: ((که په ولسوالۍ کې مې ناروغ ته پاملرنه کېدای نو ما به خپل ناروغ ولې ښار ته راووړ؟ ډاکټران معاش اخلي خو کار نه کوي او یا بهانه کوي چې درمل نشته.))

د غزني مدني فعالان او یو شمېر مخور هم شکایت کوي چې په دغه ولایت کې له کلونو راهیسې روغتیايي خدمات پیکه او معیاري نه دي.

مدني فعال رحمت الله مرجان خېل پژواک ته وویل، له وزارته بیا تر کوچني روغتیايي مرکزه هیڅوک هم خپله دنده سمه نه ترسره کوي، په ډېرو ولسوالیو کې روغتیايي مرکزونه شته خو امکانات او درمل په کې کم دي او له دې ور ها خوا ډاکټران د ناروغانو د درملنې پر مهال ناغېړي کوي.

دی زیاتوي: ((په روغتیايي مرکزونو کې ډېر مهال ډاکټران او نور کارکوونکي د پیسو او واسطو په زور ګومارل کېږي، ډېری ډاکټران شخصي کتنځایونه او نورې دندې لري او په دولتي مرکزونو کې ناروغانو ته هیڅ پاملرنه نه کوي.))

دی هم وايي چې د غزني د عامې روغتیا ریاست په چارو کې اصلاحاتو ته اړتیا ده او تر هغه چې د پیسو او واسطو په زور ګومارنې روانې وي، حالت به ښه نه شي.

د غزني ښار یوه مخور حاجي عبدالله وايي، له روغتیايي مرکزونو سره وسله وال طالبان هم ستونزه نه لري خو بیا هم د دولت پاملرنه کمه ده.

دی زیاتوي، غزني له جګړې سره مخ ولایت دی، دلته د جګړې د ټپیانو تر څنګ موسمي ناروغان هم ډېر دي او ډېر مهال مجبور وي د وړې ناروغۍ د درملنې لپاره هم ښار ته لاړ شي.

دی ادعا کوي چې په ولسوالیو کې یوازې په نوم روغتیايي مرکزونه شته، نور ورته هېڅ پاملرنه نه کېږي.

د ده په خبره، په خپله د غزني ښار په ولایتي روغتون کې خدمات معیاري نه دي، د ولسوالیو خو لا لیري خبره ده.

نوموړی د دې تر څنګ د خرابو لارو یادونه هم کوي چې د جګړو پر مهال خلک نه شي کولای خپل ټپيان تر روغتیايي مرکزونو ورسوي او له همدې امله ډېری یې ژوند له لاسه ورکوي.

دی وايي، دغه ستونزې یې په وار وار د عامې روغتیا ریاست له چارواکو سره شریکې کړې خو د حل لپاره یې هیڅ اقدام نه دی شوی.

بل لورته د غزني د عامې روغتیا رییس ظاهرشاه نېکمل د ولسوالیو په روغتیايي مرکزونو کې ځینې ستونزې مني خو وايي هومره هم نه دي چې خلک یې وايي.

نوموړي پژواک اژانس ته وویل، اوس مهال په ټول غزني کې ۱۳۳ روغتیايي مرکزونه فعال دي چې خلک کولای شي خپل ناروغان د درملنې لپاره ورولي.

هغه زیاته کړه، تېر کال یې په غزني کې ۲۴ نوي روغتیايي مرکزونه پرانیستي او روغتیايي خدمات یې پراخ کړي دي.

ده یادونه وکړه چې د غزني په ګیرو ولسوالۍ کې تېر لس کلونه روغتیايي مرکز تړلی و، خو سږ کال بیرته پرانیستل شو.

دغه راز دی وايي چې د غزني د سل بستریز روغتونو د بسترونو شمېر یې ۳۰۰ ته لوړ کړی دی چې ډېر ژر به یې کارونه خلاص شي او فعالیت ته به چمتو شي.

خو د دې تر څنګ نېکمل وویل چې د روغتیا په برخه کې شته ستونزې یې له عامې روغتیا وزارت سره شریکې کړي او له هغوی یې د حلولو غوښتنه کړې ده.

دا یوازې غزني ولایت نه دی چې خلک یې له غیر معیاري روغتیايي خدمتونو سر ټکوي، بلکې په نژدې ټول هېواد کې همدا ستونزه ده او خلک اړ دي خپل ناروغان یا خو شخصي کلينيکونو او یا هم له هېواده بهر نورو هېوادونو ته بوځي.

نښه: 

ورته راپورونه:

نظر ورکړئ

اعلانونه

Advertisement

Maiwand Bank - Just Banking