د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

ننګرهار کې د بې ځايه شوو د ستونزو هواري لپاره نوی پلان جوړېږي

ننګرهار کې د بې ځايه شوو د ستونزو هواري لپاره نوی پلان جوړېږي

Jun 18, 2019 - 15:48

جلال اباد (پژواک، ۲۸ غبرګولی ۹۸): د ننګرهار د کډوالو چارو رياست وايي، په دغه ولايت کې د داخلي بې ځايه شوو د ستونزو د دايمي حل لپاره يې پر يوې نوې طرحه کار پيل کړی چې ورسره به د کډوالو ستونزې دايمي حل شي.

دوی وايي، په همدې موخه يې ننګرهار کې مېشتو د کډوالو برخه کې مرسته کوونکو ملي او نړيوالو موسسو له مسوولينو سره ګډه غونډه جوړه کړې چې د هغوی نظريات هم راټول کړي.

د ننګرهار د کډوالو چارو رياست مسوولينو دا څرګندونې د غبرګولي په ۲۸مه په جلال اباد ښار کې د کډوالو چارو وزارت له لوری د داخلي بې ځايه شوو د ستونزو د حل په موخه د جوړې شوې غونډې په څنډه کې خبريالانو ته وکړې.

د ننګرهار د کډوالو او بېرته ستنېدونکو چارو رييس نجيب الله قيومي وويل، نن يې دې غونډې ته د ملي او نړيوالو موسسو استازي، د داخلي بې ځايه شوو کورنيو غړي او مدني فعالان راغوښتي.

دی وايي، له يادو کسانو په ننګرهار کې د داخلي بې ځايه شوو کسانو د ستونزو د دايمي حل لارو په اړه نظريات راټولوي.

هغه هيله وښوده چې د دغه نوي جوړېدونکي پلان په تطبيق سره به ننګرهار کې د داخلي بې ځايه شوو ستونزو ته لنډمهال، اوږدمهال او دايمي حل ولټول شي.

د ننګرهار ولايتي ادارې مسوولين بيا وايي، په تېر کې هم ورته پلان جوړ شوی و خو وزارت يې په تطبيق کې پاتې راغلی و.

د ننګرهار ولايت مقام کارپوه اکبر شير پژواک اژانس ته وويل، څو کاله وړاندې هغه مهال چې د دغه ولايت ولسواليو کې امنيتي ننګونې ډېرې شوې او خلک کډوال شول، نو دوی د کډوالو د ستونزو د حل لپاره يو پلان جوړ کړ چې بيا د وزارت له لوري تطبيق نه شو.

خو د ننګرهار د کډوالو چارو رييس نجيب الله قيومي وويل چې هغه پلان يو څه نيمګړتيا درلوده او دا ځل يې د نيمګړتياوو د مخنيوي په موخه له اړوندو موسسو سره مشورې پيل کړې چې تطبيق کې به يې هم کومه ستونزه رامنځته نه شي.

داخلي بې ځايه شوي وايي، د دوی په نوم مرستې راټولېږي خو په بشپړه توګه نه ورسېږي.

د شيخ مصري په نوم د بېځايه شوو د يو کمپ د ښځو د شورا مشره ملالۍ ميوند وايي، کډوالو ته يا بايد خپلو سيمو کې امنيت تامين شي او که نه نو بايد د کډوالۍ د ژوند ښه والي لپاره ورسره منظمې مرستې وشي.

د ننګرهار لرو پرتو ولسواليو کې د نا امنيو، امنيتي ځواکونو د عملياتو او وسله والو د خپلمنځي نښتو له امله نږدې سل زره کورنۍ کډوالې شوې چې ډېری هغه يې د جلال اباد ښار او نږدې ولسواليو کې مېشتې شوې دي.

ورته راپورونه:

نظر ورکړئ

اعلانونه

Advertisement