کابل (پژواک، ١١ چنګاښ ٩٨): د افغان سولې لپاره د امريکا ځانګړى استازى وايي چې راتلونکې اوونۍ به قطر او جرمني په ګډه د بين الافغاني مذاکراتو کوربانه وي.
خليلزاد د چنګاښ په ١١مه په ټولنيزه شبکه ټويټر کې ليکلي چې دا ناسته به د راتلونکې شنبې او يکشنبې په ورځ (د چنګاښ په ١٥مه او ١٦مه) د قطر په پلازمېنه دوحه کې جوړه شي.
د افغانستان د سولې لپاره د امريکا ځانګړي استازي زلمي خلیلزاد پر خپله ټويټرپاڼه لیکلي چې جرمني او قطر به په ګډه د راتلونکې شنبې او یکشنبې په ورځو د بین الافغاني خبرو کوربانه وي.
هغه د جرمني او قطر له حکومتونو مننه کړې چې د بين الافغاني ناستې او خبرو اترو د کوربه توب چارې يې پر غاړه اخيستي دي.
زلمي خليلزاد ويلي، دغه کېدونکي بین الافغاني ناسته د سولې د چوکاټ لپاره چې څلور اړخونه لري، ډېره مهمه ده او د افغانستان د سولې د پروسې د پرمختګ لپاره مهم ګام دی.
د امريکا او طالبانو ترمنځ د سولې په خبرو کې څلور ټکي مطرح وو چې له افغانستانه د بهرنیو ځواکونو وتل، د افغانستان خاوره د بل هېواد پر وړاندې نه کارېدل، له افغان حکومت سره د طالبانو مخامخ خبرې او اوربند.
بلخوا د افغانستان لپاره د جرمني ځانګړي استازي مارکس پوټزيل هم په يوه خپرباڼه کې هم راتلونکې اوونۍ په قطر کې د کېدونکې ناستې خبر ورکړى دى.
هغه زياته کړې چې د افغان سولې پروسې د ملاتړ په موخه قطر او جرمني په ګډه راتلونکې اوونۍ د بين الافغاني مذاکراتو کوربه توب کوي.
نوموړي زياته کړه چې په افغانستان کې د سولې او نورو پرمختګونو لپاره ښه زمينه برابره شوې ده او د دغه کار لپاره اړینه ده چې افغانان په خپلو کې سره کېني او د خپل هېواد راتلونکی وټاکي.
په خبرپاڼه کې راغلي چې قطر او جرمني په ګډه په دې ناسته کې د ګډون لپاره د افغانانو لپاره بلنې لېږلې دي چې په شخصي توګه به په کې ګډون کوي.
سرچينې ويلي، قطر او جرمني هيله لري چې دا ناسته به د شخړې د اړوندو خواوو او ګډونوالو ترمنځ د باور فضا رامنځته کولو کې مرسته وکړي.
تر اوسه د افغانستان حکومت په دې اړه څه نه دي ويلي، خو ويل کېږي چې د حکومت ځيني کسان به په شخصي توګه په دې ناسته کې ګډون کوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن