دایکنډي (پژواک، ١٧ چنګاښ ٩٨): د دایکنډي په کجران ولسوالۍ کې د امنیتي سرتېرو پر پوسته د طالبانو په برید کې درې امنیتي سرتېري او ۳۵ طالبان وژل شوي او اووه امنیتي سرتېري ټپیان دي.
د دایکنډي د امنیې قوماندانۍ د امنیت امر نقیب الله د یاد خبر تر څنګ پژواک ته وویل، تېره شپه ۱۲ بجې وسله والو طالبانو د کجران ولسوالۍ په بازار مشترک سیمه کې پر امنیتي پوستو برید وکړ او د سهار تر څلورو بجو جګړه روانه وه.
د ده په خبره، طالبان له سیمې پر شا شوي خو په یاده جګړه کې درې امنیتي سرتېري وژل شوي او اووه نور ټپیان دي.
نوموړي ادعا وکړه چې په یاده نښته کې ۳۵ طالبان هم وژل شوي دي.
د پژواک خبریال هڅه وکړه چې په دې اړه د طالبانو نظر هم واخلي خو اړیکه یې ورسره ټينګه نه شوه.
د لطف الله په نوم د کجران ولسوالۍ د مشترک بازار سیمې اوسېدونکي وویل، یاده جګړه د شپې په ۱۲ بجو پیل او سهار تر څلورو بجو یې دوام درلود او ښايي مرګ ژوبله هم ولري.
نوموړي زیاته کړه، اورېدلي يې دي چې د اوغلي په نوم د طالبانو ولسوال هم په دې نښته کې وژل شوی دی.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن