د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

سوېډن کمېټه : طالبانو په ميدان وردګو کې ٤٢ روغتيايي مرکزونه تړلي

روغتیا

ارشيف

سوېډن کمېټه : طالبانو په ميدان وردګو کې ٤٢ روغتيايي مرکزونه تړلي

Jul 17, 2019 - 13:52

کابل (پژواک، ٢٦ چنګاښ ٩٨): دافغانستان لپاره د سوېډن کمېټه وايي چې وسله والو طالبانو په ميدان وردګو  ولايت کې ددوى اړونده ٤٢ روغتيايي مرکزونه تړلي دي.

ددغې کمېټې له خوا د چنګاښ په ٢٦مه، پژواک خبري اژانس ته په يوه استول شوې خبرپاڼه کې راغلي، طالبانو دغه کار وروسته له هغه کړى، چې حکومتي ځواکونو ددې ولايت په دايميراد ولسوالۍ کې د عملياتو پرمهال څلور روغتيايي کار کوونکي و وژل.

خو دولتي سرچينې بيا ويلي و چې دولتي سرتېرو په دغو عملياتو کې شپږ وسله وال مخالفين وژلي او د يوه ډاکټر په ګډون يې دوه نور ژوندي نيولي دي.

سوېډن کمېټې زياته کړې،په ميدان وردګ ولایت کې د سویډن کمېټې ۷۷ روغتیايي مرکزونه فعالیت کوي چې د يادې کمېټې د مسوولینو په وینا، ۴۲ يې په تېرو درې ورځو کې د طالبانو د ګواښ له امله بند کړي دي.

په خبرپاڼه کې راغلي، په يادو روغتيايي مرکزونو کې هره ورځ د زرګونو کسانو درملنه کېده چې په تړل کېدو سره يې هره ورځ څه باندې ۵۷۰۰ تنه ناروغان له درملنې څخه بې برخې کېږي.

د سوېډن کمېټې مسوولينو ددغو روغتيايي مرکزونو د بېرته پرانيستلو غوښتنه کړې او د جګړې له ښکېلو خواوو يې غوښتي چې د روغتيايي مرکزونو دامنيت خونديتوب ته پاملرنه وکړي.

د ميدان وردګو د ولايتي شورا غړي شريف الله هوتک پرون پژواک ته ويلي و چې طالبانو تر دغه  بريد وروسته د ميدان وردګو ولايت ولايتي روغتون ځينې کسان ګواښلي او ورته ويلي يې دي چې دندو ته دې نه ځي.

هوتک وايي: "دغه روغتون درې ورځې کېږي چې رخصت دی، کارمندان يې نه راځي تر څو صحي خدمات وړاندې کړي؛ دغو کارمندانو ادعا کړې چې د نامعلومو کسانو له خوا ورته ويلي شوي چې روغتون ته رانه شي."

دی زياتوي، ياد ولايتي روغتون ته د ورځې سلګونه کسان د درملنې په موخه ورځي او نن د نسايي ولادي لس ناروغان چې ياد روغتون ته يې مراجعه کړې وه، نورو روغتونونو او يا هم کابل ته لېږدول شوي دي.

د ميدان وردګو د عامې روغتيا رييس ډاکټر محمد سالم اصغر خېل هم وايي: "ولايتي روغتون او نور روغتونونه په مطلق ډول نه دي بند، خو د دايميردادو ولسوالۍ د تنګي سيدان پر روغتيايي مرکز تر بريد وروسته د دولت وسله والو مخالفينو د سويډن کمېټې صحي کارمندان يو ډول تهديد کړي او له همدې وېرې اکثره کارمندان نه راځي."

د ده په وينا، له درېيو ورځو راهيسې د ميدان وردګو ولايت د ولايتي روغتون په ګډون د دغه ولايت په ډېرو ولسواليو کې هم هغه روغتيايي خدمات چې د سوېډن کمېټې له خوا وړاندې کېدل، بند شوي دي.

د ده په وينا، د جلريز او بهسودو له دوو ولسواليو پرته په دغه ولايت کې د ټولو روغتيايي مرکزونو ۷۰ سلنه روغتيايي خدمات بند شوي دي.

د ده د معلوماتو له مخې، د ميدان ښار د ولايتي روغتون په ګډون په دې ولايت کې ۸۲ روغتيايي مرکزونه فعال دي چې ۲۵ يې د بهسودو په دوو ولسواليو کې دي.

د طالبانو وياند ذبيح الله مجاهد په دې اړه چې طالبانو له روغتيايي کارکوونکو غوښتي چې خپلو دندو ته دې نه ځي، وايي: "دا موضوع سمه ده، د سويډن موسسې په روغتون د امريکايي چاپې او وحشت په اړه هيڅ غبرګون ونه ښود، تر اوسه هم خاموشه ده؛ که دوی د خپلو روغتيايي مراکزو د دفاع لپاره غږ نه شي پورته کولای، بيا بيا هم دا ځای همدا ډول تر بريد لاندې نيول کېږي."

هغه زياتوي، همدا د تنګي سيدان پر روغتون دا دويم ځل چاپه وه چې وهل کېږي.

دی وايي: "د سويډن موسسې مسووليت درلود چې دغه موضوع يې جدي نيولې وای، غږ يې پورته کړی وای، غبرګون يې درلودلی چې دا ځای د دوی د فعاليت ساحه وه، کوم نظامي هدف نه وو، دا چې دوی ورسره خاموشه دي، شک کېږي چې همدوی  ورسره لاس لري ترڅو امريکايان چاپه ووهي او دا ډول وحشت ترسره کړي."

ورته راپورونه:

نظر ورکړئ

اعلانونه

Advertisement