د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

"افغانستان؛ د فارسي دري ژبې زانګو" په نوم علمي- څېړنيز سيمينار جوړ شو

"افغانستان؛ د فارسي دري ژبې زانګو" په نوم علمي- څېړنيز سيمينار جوړ شو

Jul 18, 2019 - 18:24

کابل (پژواک، ٢٧ چنګاښ ٩٨): "افغانستان؛ د فارسي دري ژبې زانګو" په نوم دوه ورځنى علمي- څېړنيز سيمينار د افغانستان د خپلواکۍ د سلمې کاليزې په مناسبت جوړ شو.

د افغانستان د علومو اکاډمي علمي غړي څېړنوال محمد اصف احمدزي، پژواک خبري اژانس ته وويل، دغه سيمينار د ولسمشر محمد اشرف غني په لارښوونه او د افغانستان د علومو اکاډمي او کابل پوهنتون په ګډه همکارۍ جوړ شوى چې لومړۍ د پرانيستې برخه يې د ارګ په سلام خانې کې ترسره شوه.

ده زياته کړه، په دې برخه کې د بهرنيو مېلمنونو په ګډون سلګونو پوهانو او څېړونکو برخه اخيستې وه او ولسمشر محمد اشرف غني او څو تنو نورو پوهانو په کې ويناوې او علمي مقالې ولوستې.

ولسمشر غني په دې سيمينار کې په خپله وينا کې د هېواد پر ملي ژبو د پانګې اچونې او غښتلي کولو ټينګار وکړ او ويې ويل، دري ژبه زموږ ده او موږ د دې ژبې يو، په دې کې هيڅ شک او شبهه نشته.

ده زياته کړه، د افغانستان د خپلواکۍ د بېرته ترلاسه کولو سلمه کاليزه يو فرصت دى، ترڅو د خپلواکۍ په مختلفو اړخونو بحث وکړو؛ د نن ورځې د غونډې دليل زموږ د خپلواکۍ غوښتنې د فکر اړخ دى چې زرګونو کلونو ته رسېږي.

هغه د دې موضوع په بيانولو سره چې فرهنګ د وصل وسيله ده او ژبه يې يوه برخه ده، وويل چې ملت يوه فرهنګي پديده ده او دولتداري به له يوه فرهنګي اساس پرته ښه پايله ورنه کړي.

د هغه په وينا، څوک چې په يوې ژبې اتکا کوي، په ډار کې دي... موږ له زرګونو کلونو راهيسې موجود وو او زرګونه کلونه به واوسېږو.

هغه د دري ژبې په اړه وويل: دري ژبه زموږ د ژورو احساساتو د ابراز يوه وسيله ده، ژبه زموږ د تاريخ محصول او جوړوونکې ده، پر يوې ژبې پانګونه پر يوې زېربنا پانګونې څخه کم اهميت نه لري. اوس د دې وخت را رسېدلى چې امنيت او اقتصاد ته د پاملرنې او ورباندې د پانګونې ترڅنګ پر فرهنګ هم پانګونه وشي.

د ده په خبره، د ګفتمانونو ډولونه دري ژبه جوړوي، د دې هېواد نامتو شاعران دري ژبي وو، نو اړتيا ده چې ځوان نسل مو خپلې فرهنګي ژورې ريښې درک کړي.

غني دا پوښتنه مطرح کړه چې تاريخي پوښتنه داده چې دري ژبې ولې او څنګه پر ايران او هندوستان واکمنه شوې وه‎؟

خو نوموړي د دې مسئلې په څرګندولو سره چې د دري ژبې په تاريخ کم کار شوى او د دې ژبې پر واضحې تسلسل کار نه دى شوى، وويل، د دې ژبې پر تاريخچې بايد څېړنې وشي. پوهنتونونه، د علومو اکاډمي او نور څېړونکي دې د دري ژبې په اړه سرتاسري تحقيقات ترسره کړي.

ده دغه راز وړانديز وکړ چې فرهنګي عالي شورا دې ايجاد شي ترڅو پر ملي ژبو د پانګونې لپاره د لارې پر نقشې کار وکړي او بايد چې ټولې ژبې غښتلې شي.

ولسمشر غني د دې سيمينار د ترسره کېدو د چارو د رئيس پوهاند محمد حسين يمين د هغې وړانديز هرکلى وکړ چې د مولانا جلال الدين بلخي په نوم دې يو مډال ضرب شي.

هغه دغه راز زېرى ورکړ چې د افغانستان په تيږو په هندوستان کې د بېدل د مزار او هم په بلخ کې د بهاءالدين مدرسې چې د مولانا پلار دى، د ترميم چارې روانې دي.

د علومو اکاډمي غړى اصف احمدزى وايي، د سيمينار علمي برخه تر غرمې وروسته د افغانستان د علومو اکاډمي د علامه احمد علي کهزاد د سيمينارونو په تالار کې پيل شوه چې پوهانو په کې د فارسي دري ژبې او د افغانستان د خپلواکۍ د سلمې کاليزې په مناسبت مقالې ولوستې.

د علومو اکاډمي سرپرست رئيس څېړنوال دوکتور عبدالظاهر شکېب په دې غونډه کې وويل، نن افغانان د خپلواکۍ د سلمې کاليزې د نمانځنې او درناوي په درشل کې د افغانستان د اسلامي جمهوري دولت د مشرتابه په لارښوونه د نړۍ  او په ځانګړي ډول د ختيځ  تر ټولو غني ترينه او قېمت بها ژبه او ادب، يعنې پارسي دري  نمانځي. يقينا ًچې د هېواد د تاريخ او ادبياتو د دې لویې برخې چې د اسلامي نړۍ د دوهمې لويې ژبې دريځ يې خپل کړی، په مبهمو خو ارزښتناکو کونجونو سوچ، څېړنه او پلټنه  د ستاينې او قدر وړ عمل دی.

ده زياته کړه، پارسي دري د درېيو هېوادونو(افغانستان، ايران او تاجکستان) رسمي ژبه ده. لومړنۍ پرتلنې څرګندوي چې درې واړه معاصرې ژبې يوه سرچينه لري، يعنې تاريخي يووالی او سټه يې يوه ده .

د هغه په وينا، پخوانۍ آريانا، د اسلامي پېر خراسان او يا اوسنی افغانستان له ډېرو پخوانيو زمانو راهيسې د نړۍ د ډېرو لوړو او روښانو تمدنونو د راڅرګندېدو ټاټوبی و او د دې ټولو فکري زېرمو او معنوي خزانو رڼا د علومو، فرهنګ، اخلاقياتو او ادبياتو په بڼه موږ ته رارسېدلې ده چې په بېلابېلو پېرونو کې په بېلابېلو ژبو ليکل شوي او اوسمهال له هغو څخه تاريخي او لرغونې پارسي دري ژبه راپاتې ده.

شکيب وويل، پارسي دري د پهلوي اشکاني زېږنده او اشکاني د اوستايي ژبې پاتې شونې ده. هممهاله د بغلان د سره کوتل د ډبرليک تر لاسه کېدل او له پارسي دري سره د هغه پرتلنه د دې ژبې قدامت په دې هېواد کې دوه زره کلونو ته رسوي.

د علومو اکاډمي رئيس هيله وښوده چې په هېواد كې دې د نورو مېشتو بېلابېلو ژبو او قومونو د ادبیاتو د لا ښې پېژندنې لپاره هم ورته سیمینارونه جوړ شي، ځکه د داسې علمي سیمینارونو جوړېدل د هېواد او په ځانګړې توګه د خلکو د پوهاوي او د علم او فرهنګ د ودې لپاره ډېر ګټور دي.

د علومو اکاډمي غړي احمدزي د معلوماتو له مخې، د دې سيمينار نورې علمي غونډې به د شنبې په ورځ (د چنګاښ ٢٩مه) په کابل پوهنتون کې ترسره شي.

نښه: 

ورته راپورونه:

نظر ورکړئ

اعلانونه

Advertisement