د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

په شمال کې د ښځينه خبريالانو شمېر کم شوى

په شمال کې د ښځينه خبريالانو شمېر کم شوى

Jul 18, 2019 - 14:38

مزارشريف ( پژواک، ۲۷چنګاښ ۹۸) : په شمال کې د خبريالانو د خونديتوب کمېټه وايي چې دغه زون کې د نا امنيو، ټولنيزو ستونزو او د رسنيو د اقتصادي وضعيت خرابوالي له امله ورځ تر بلې د ښځينه خبريالانو شمېر کمېږي.

د شمال زون د خبريالانو خونديتوب کمېټې مسوول بشير انصاري د چنګاښ په ۲۷مه، مزارشريف کې د ياد بنسټ د شپږ مياشتني راپور خپرولو پر مهال همدا راز وويل چې د روان زېږديز کال په لومړيو شپږو مياشتو کې د تېر کال د همدې مودې په پرتله د خبريالانو پر وړاندې د تاوتريخوالي پېښې ۵۰ سلنه کمې شوې دي.

هغه زياته کړه، د روان کال په لومړيو شپږو مياشتو کې د خبريالانو خونديتوب کمېټې له خوا د تاوتريخوالي ۴۵ قضيې ثبت شوې دي.

په يادو قضيو کې درې د قتل، ۶ د ټپي کېدو، ۵ مورده وهل ټکول، ۱۹ پېښې توهين او سپکاوی، ۱۰ پېښې تهديد، ۱ بندي کول او ۱ مورد هم له رسنۍ څخه په اجباري ډول د خبريال ايستل شامل دي.

د انصاري په خبره، د خبريالانو پر وړاندې د تاوتريخوالي د شاوخوا ۲۰ قضيو عاملين دولتي چارواکي، د ۸ پېښو عاملين طالبان او داعش، د ۸ پېښو عاملين ناپېژانده کسان، د ۶ پېښو عاملين سيمه ييز زورواکي او د ۳ پېښو عاملين د رسنيو مسوولين دي.

 د خبريالانو د خونديتوب کمېټې په خبره په روان کال کې شمال ختيځ زون د ژورنالېستانو لپاره خطرناک ځای و چې د تاوتريخوالي ۱۵ قضيې په کې ثبت شوې دي.

د ياد راپور له مخې، د روان کال په لومړيو شپږو مياشتو کې شمال زون کې د خبريالانو پر وړاندې د تاوتريخوالي يواځې ۳ قضيې ثبت شوې دي.

د مصوونيت کمېټې بله اندېښنه شمالي ولايتونو کې د ښځينه خبريالانو ورځ تر بلې کمېدل دي.

بشير انصاري په دې تړاو پژواک ته وويل چې د ناسمو ټولنيزو رواجونو، امنيتي ستونزو او د رسنيو اقتصادي وضعيت خرابوالي له امله د شمال ولايتونو په رسنيو کې د ښځينه خبريالانو شمېر مخ پر کمېدو دی.

هغه وويل: (( سرپل ولايت کې يواځې دوه ښځينه خبريالانې وې، چې هغوی هم په دې وروستيو کې د امنيتي ستونزو له امله له راډيو څخه خپل غږ نه شی ايستلی، فارياب کې ۸ ښځينه خبريالانې شته، چې هغوی هم له ګڼو ستونزو سره مخ دي، جوزجان کې د لسو او پنځلسو تر منځ ښځينه خبريالانې او په سمنګان کې ۴ ښځينه خبريالانې محدود رسنيز فعاليت لري او که وضعيت همداسې دوام وکړي؛ نو دا شمېر به نور هم کم شي)).

انصاري وويل چې له کابل وروسته بلخ کې ډېرو ښځينه خبريالانو فعاليت درلود؛ خو په خبره يې چې اوس يې شمېر کم شوی دی.

نوموړی زياتوي، يو شمېر رسنيو خپل تشکيلات کم کړي او همدا راز ځينې ښځينه خبريالانې بهرنيو ملکونو ته تللي دي.

بلخ کې د يوه خصوصي تلوېزيون خبرياله محبوبه محمدي هم وايي چې د رسنيز فعاليت پر مهال له ګڼو ستونزو سره مخ کېږي.

هغې پژواک ته وويل، لومړی خو اطلاعاتو ته د لاسرسي برخه کې زيات مشکلات موجود وي او په خبره يې، چې د ډېری ادارو مسوولين نه حاضرېږي؛ څو له دوی سره معلومات شريک کړي.

د مېرمن محمدي په خبره دويم ګام کې د يو شمېر ادارو له خوا له تبعيض ډک چلند د دوی کاري ساحه له ننګونو سره مخ کړې ده.

نوموړې زياته کړه: (( ډېر کله داسې شوي، چې د يوې ادارې رييس له ماسره ځکه مرکه نه ده کړې چې زه مېرمن يم؛ تبعيض راسره کوي؛ خو په مقابل کې بيا هماغه مسوول کس زما له نارينه همکار سره مرکې ته ژر چمتو کېږي)).

بل لور ته د رسنيو خراب اقتصادي وضعيت او کم معاش هغه څه دي، چې مېرمن محمدي يې په رسنيو کې د ښځينه خبريالانو د کمېدو لاملونه بولي.

خبريال بشير عطايي بيا د خبريالانو او رسنيو پر وړاندې د تاوتريخوالي قضيو نه څېړل د خشونت د زياتوالي لامل بولي.

هغه پژواک ته وويل چې د هېواد عدلي او قضايي ارګانونه او په ټوله کې حکومت  هغو کسانو سره سخت او قانوني چلند نه کوي، چې د خبريالانو پر وړاندې تاوتريخوالي کې لاس لري.

نوموړي وويل چې اوس هم افغان خبريالان د ناسم امنيتي وضعيت او اطلاعاتو ته د نه لاسرسي له اړخه اندېښمن دي.

ورته راپورونه:

نظر ورکړئ

اعلانونه

Advertisement