ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

ټاکنیز کمېسیونونه: د ولسمشرۍ ټاکنو ترسره کېدو ته بشپړ تیاری لرو

ټاکنیز کمېسیونونه: د ولسمشرۍ ټاکنو ترسره کېدو ته بشپړ تیاری لرو

author avatar
21 Jul 2019 - 19:35
ټاکنیز کمېسیونونه: د ولسمشرۍ ټاکنو ترسره کېدو ته بشپړ تیاری لرو
author avatar
21 Jul 2019 - 19:35

کابل (پژواک، ۳۰ چنګاښ۹۸): ټاکنیز کمېسیونونه د روان کال د تلې د میاشتې ولسمشرۍ ټاکنو ته د بشپړ چمتووالي خبر ورکړ او له سیاسي ګوندونو، د څار بنسټونو او نوماندانو یې وغوښتل چې د رڼو او عادلانه ټاکنو د ترسره کېدو په برخه کې ورسره همکار پاتې شي.

د ټاکنیزو کمېسیونونو د رهبرۍ غړو یاد مطلب نن په کابل کې ګډې خبري ناستې ته په ډاګه کړ او ویې ویل، د دغه ستر ملي بهیر پر وړاندې ستونزې پېژندل شوې او د حل لپاره یې هڅې پیل شوې دي.

د ټاکنو کمېسیون رییسې حوا علم نورستانۍ وویل چې د رڼو او عادلانه ټاکنو د ترسره کېدو لپاره ټولې ټاکنیزې چارې د ټاکنیزو کمېسیونونو په همغږۍ ترسره کېږي.

هغې زیاته کړه، تر اوسه د ټاکنیزو کمېسیونونو رهبرۍ د ولسمشرۍ ټاکنو د ترسره کېدو لپاره توانېدلي چې عملیاتي پلان، جذب، کړنچارې او اړوند لوایح ترتیب او تصویب کړي.

بلخوا د ټاکنیزو شکایتونو د کمېسیون رییسې زهرې بیان شینوارې یادې ناستې ته وویل، ټاکنیز کمېسیونونه د ټاکنو په بهیر کې اړوندو لوریو، د ولسمشرۍ ټاکنو نوماندانو او هېوادوالو ته ډاډ ورکوي چې د راتلونکو ټاکنو په ترسره کېدو کې جدي دي او ټاکنیزې چارې د یو بل په همغږۍ ترسره کوي.

د دواړو کمېسیونونو په هغې ګډه ويناپاڼه کې چې په یاده ناسته کې ولوستل شوه، راغلي چې د قانون مطابق د ټاکنو ترسره کول منل شوی ملي ارزښت او په تېرو دوو لسیزو کې د افغانستان د لاسته راوړنو او نړیوالو مرستو یوه برخه ده.

د ويناپاڼې په یوه برخه کې په بریالي ډول د ولسمشرۍ ټاکنو ترسره کول د ټاکنیزو کمېسیونونو په ټاکنو پورې د اړوند لوریو اساسي دنده بلل شوې او ویل شوي، په شفاف، بې طرفه او ښه مدیریت سره د دغه بهیر ترسره کول کولای شي په ټولنه کې د تلپاتې سولې لپاره زمینه برابره کړي.

سرچينې زیاته کړې، ټاکنیزو کمېسیونونو په همغږۍ او ګډو همکاریو او په ټاکنیزو چارو پورې ټولو اړوند لوریو د دغه بهیر پر وړاندې عمده ستونزې پېژندلې او له تېرو تجربو څخه په استفاده به یې حل او په ولسمشرۍ ټاکنو کې به د خلکو پراخ ګډون ته زمینه برابروي.

دغه راز په ويناپاڼه کې راغلي، له قانون سره سم نړیوال بنسټونه، اړوند دولتي ارګانونه، د مدني ټولنو بنسټونه، ايتلافونه او سیاسي ګوندونه، رسنۍ او نوماندان په ټاکنو بهیر کې اغېزمن رول لري، نو ځکه د ټاکنیزو کمېسیونونو مشرتابه د دغې همکارۍ په درک کولو سره په ټاکنو پورې له اړوندو لوریو تمه لري چې له دوی سره پر همغږۍ د دغه ملي بهیر د ترسره کېدو په برخه کې له دوى سره مرسته وکړي.

ټاکل شوې چې راتلونکې ولسمشرۍ ټاکنې د روان کال د تلې په شپږمه ترسره شي.

login or register a new account.

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.