د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

حکومتي چارواکي: په هلمند او غزني کې لسګونه وسله وال طالبان وژل شوي

حکومتي چارواکي: په هلمند او غزني کې لسګونه وسله وال طالبان وژل شوي

Jul 22, 2019 - 14:55

لښکرګاه-غزني (پژواک، ٣١ چنګاښ ٩٨): حکومتي مسوولين ادعا کوي چې په هلمند او غزني ولايتونو کې ٥٨ وسله وال طالبان وژل شوي او يو شمېر نور ټپيان شوي دي.

د هلمند امنيه قوماندان سمونيار حسام الدين هلمندي د چنګاښ په ٣١مه په مرکز لښکرګاه کې خبريالانو ته وويل چې له تېرو پنځو ورځو راهيسې په مارجې ولسوالۍ کې عمليات روان دي.

هغه وايي چې د دغو عملياتو پرمهال د يو شمېر بهرنيو وسله والو په ګډون ٥٠ وسله وال طالبان وژل شوي او ٢٠ نور يې ټپيان شوي دي.

ده زياته کړه چې د همدې عملياتو په لړ کې د طالبانو يو شمېر پټنځايونه له منځه وړل شوي او د مارجې-لښکرګاه لويه لار هم د ترافيکو پرمخ پرانيستل شوې ده.

دا په داسې حال کې ده چې د مارجې-لښکرګاه لويه لار له تېرو څلورو کلونو راهيسې د ترافيکو پرمخ تړل شوې وه.

قوماندان وايي چې د خلکو په همکارۍ يې هلې ځلې پيل کړي ترڅو دغه سيمه په بشپړه توګه د طالبانو له شتون څخه پاک کړي.

بل لورته د لښکرګاه ښار اوسېدونکي نورالله پژواک ته وويل چې د مارجې ولسوالۍ د لويې لارې د بېرته خلاصېدو په اړه ده هم اورېدلي دي.

هغه وايي: ((پر دغه لار اوس مهال يواځې امنيتي ځواکونه تګ راتګ کولاى شي د عامو خلکو لپاره تر اوسه نه ده خلاصه شوې.))

خو د هلمند امنيه قوماندان بيا وايي، امنيتي ځواکونه کوښښ کوي ترڅو هرڅه ژر پر ياده لار امنيتي پوستې جوړې کړي.

خو بل لورته د طالبانو وياند قاري يوسف احمدي بيا وايي چې پرون طالبانو په مارجې ولسوالۍ کې د حکومتي ځواکونو بريدونه په شا تمبولي دي.

هغه وايي چې د طالبانو په ځوابي ډزو کې شپږو حکومتي سرتېرو ته مرګ ژوبله اوښتې او دوه ټانکونه يې په ماينونو الوځول شوي دي.

دغه راز د يو بل خبر له مخې، په غزني کې هم طالبانو ته مرګ ژوبله اوښتې ده.

د غزني د والي وياند محمد عارف نوري پژواک ته وويل چې تېره شپه هوايي ځواکونو په اندړو او ده يک ولسواليو کې بريدونه کړي دي.

هغه وايي چې د دغو بريدونو پرمهال اته وسله وال طالبان وژل شوي او شپږ نور ټپيان شوي دي.

د نوري په وينا، د يادو عملياتو پرمهال د طالبانو يو شمېر وسلې او موټر هم له منځه وړل شوي دي.

خو بل لورته طالبان بيا دغه څرګندونې ردوي.

د دې ډلې وياند ذبيح الله مجاهد پژواک ته وويل چې تېره ورځ په ټول غزني کې طالبانو ته مرګ ژوبله نه ده اوښتې.

د يادونې ده چې په دې وروستيو کې يو ځل بيا د امنيتي ځواکونو او طالبانو ترمنځ جګړو زور اخيستى دى.

ورته راپورونه:

نظر ورکړئ

اعلانونه

Advertisement