د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د ولایتي شورا وکیلان د پکتیا په دولتي ادارو کې له فساده شکایت کوي

د ولایتي شورا وکیلان د پکتیا په دولتي ادارو کې له فساده شکایت کوي

Aug 13, 2019 - 09:37

ګرديز (پژواک، ۲۲ زمرى ٩٨): د پکتيا ولايتي شورا نيوکه کوي چې د دغه ولايت په بېلابېلو دولتي ادارو کې لا هم اداري فساد شته او مخه يې نه ده نيول شوې.

دوی پر ولايتي اداره نيوکه کوي چې د اداري فساد د مخنيوي او له منځه وړو په برخه کې يې کړې ژمنې نه دي ترسره کړې او په دې برخه کې هېڅ محسوس بدلون نه دی راغلی.

د ولايتي شورا غړی محمد رحمن قادري پژواک خبري اژانس ته وويل چې د پکتيا والي شميم خان کټوازي د کار د پيل پر مهال ويلي وو، که په کومه اداره کې يې د اداري فساد مخه ونه نيوه، په دې معنا به وي چې نوموړی خپله ورسره شريک دی.

قادري وايي که والي په اداري فساد کې ښکېل نه وي، مخه دې ونيسي او يا دې په دې اړه روښانه ځواب ورکړي.

نوموړي پژواک ته وويل چې د ځينو ملکي ادارو سربېره ډېره برخه فساد په نظامي ادارو کې دی او د پوليسو ډېری ګومارنې د پيسو په بدل کې کېږي.

ده زياته کړه: ((موږ والي صېب سره دا خبره شريکه کړې چې د خپل شعار په اړه دې ځواب ووايي چې يا ته ورسره شريک يې، که زور دې نه پرې رسېږي؟ فساد هماغسې په هماغه شکل روان دی، خصوصاً په امنيتي بخش کې فساد اوج ته رسېدلی، اکثريت کسان په پيسو مقررېږي.))

د ولايتي شورا بل غړی سخي جان وفايار هم وايي چې په دولتي ادارو کې پر کاري ظرفيت نه شتون او ناغېړۍ سربېره اداري فساد هم ډېر زيات دی.

وفايار په دې ادارو کې پر وخت د چارو نه ترسره کېدل هم لويه ستونزه بولي او وايي چې دا چاره د ښې حکومتولۍ او حکومت ته د خلکو د نږدې کېدو په لاره کې خنډ ده.

نوموړي زياته کړه: ((دا موږ ته ښه معلومه ده، په بعضې برخو او ادارو کې فساد شته، موږ کوشش کړی او دا غږ مو کابل او مسوولو مراجعو ته رسولی دی، که هغه ملکي ادارې دي او که نظامي.))

مدني فعال اول خان اکبر وايي چې د بېلابېلو ادارو مسوولين د ځينو لوړپوړو او بانفوذه چارواکو له خوا ګومارل کېږي او د عايداتي ادارو يوه لويه برخه عوايد د دولتي بودجې پر ځای شخصي جېبونو ته ځي.

اکبر وويل: ((عموماً په ځينو دولتي ادارو کې پراخ فساد شته، د دې والي په راتګ سره يې مخه نه ده نيول شوې. په ځينو ادارو کې خو د کمېدو پر ځای زيات شوی دی، لکه په عايداتي او عدلي او قضايي ارګانونو کې له فساده ډېر خلک ځورېږي.))

د دغه ولايت يو شمېر نورو اوسېدونکو هم ورته څرګندونې وکړې.

بل لور ته د پکتيا والي شميم خان کټوازی هم په ادارو کې فساد مني، خو وايي چې تر پخوا يې کچه راټيټه شوې ده.

کټوازي پژواک ته وويل چې د عايداتي ادارو عوايد هم زيات شوي او لا يې هم د روڼتيا لپاره کار روان دی.

نوموړي زیاته کړه چې د اداري فساد تر څنګ ادارو ته د مامورينو ناوخته راتګ او وختي تګ او په سم ډول د خدمتونو نه وړاندې کول لا هم يوه لويه ستونزه ده.

نوموړي زياته کړه: ((فساد شته، خو کنټرول شوی او کم شوی دی؛ مثلاً زموږ د عايداتي ادارو له ډلې د ښاروالي عوايد دوه چنده او د ګمرک درې چنده زيات شوي او موږ اسناد هم درته ښودلی شو، بل د مقرريو سيستم شفاف شوی، اکثره له مرکزه کېږي او موږ ترې څنګ ته يو.))

د يادونې ده، د پکتيا د کليو پراختيا، کار او ټولنيزو چارو، پوهنه، ښاروالي، ګمرک، ترانسپورټ او عدليې رياست هغه ادارې دي چې پراخ اداري او مالي فساد په کې شته دى او خلک ترې ځورېږي.

ورته راپورونه:

نظر ورکړئ

اعلانونه

Advertisement