د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

ولسمشر په بهرنیو چارو وزارت کې د فساد د څرنګوالي د ارزونې لپاره پلاوی ټاکلى

ولسمشر په بهرنیو چارو وزارت کې د فساد د څرنګوالي د ارزونې لپاره پلاوی ټاکلى

Aug 18, 2019 - 17:57

 کابل (پژواک، ٢٧ زمری ٩٨): ولسمشر یو پلاوي ته دنده سپارلې چې د بهرنیو چارو وزیر د سفرونو، په مالي برخه کې د روڼتیا د څرنګوالي او د تړونونو لاسلیک د څرنګوالي په اړه هر اړخیزه څېړنه وکړي.

 ولسمشر محمد اشرف غني دغه اقدام په بهرنیو چارو وزارت کې د فساد د موجودیت په اړه له اداري فساد سره د مبارزې د نظارت او ارزونې د ګډې کمېټې د راپور له خپرېدو وروسته کړی دی.

 د پژواک خبري اژانس د یوه راپور له مخې، له اداري فساد سره د مبارزې د نظارت او ارزونې د ګډې کمېټې (MEC) د روان کال د زمري په ۱۶ مه «په بهرنیو چارو وزارت کې له هېواده بهر ماموریتونو لپاره د کارکوونکو د جذب او ګومارنې بهیر» په نوم یوه څېړنه خپره کړه.

په دې څېړنه کې راغلي چې د افغانستان د بهرنیو چارو وزارت له ۴۶۰ ډېر کارکوونکي په نارسمي ډول د واسطې له لارې جذب شوي دي.

خو د څېړنې له خپرېدو درې ورځې وروسته بهرنیو چارو وزارت دغه راپور بې بنسټه وباله او ویلي یې و چې یاده څېړنه د شخصي عقدو په اساس ترتیب شوې ده.

د میک راپور له خپرېدو څو ورځې وروسته اوس ولسمشر د یوه فرمان په اساس د بهرنیو چارو وزیر د سفرونو او مالي برخه کې د روڼتیا د څرنګوالي او په بهرنیو چارو وزارت کې د تړونونو د لاسلیک د مراحلو د څرنګوالي د هر اړخیزې ارزونې لپاره یو پلاوی په دنده ګومارلی دی.

د ولسمشر د روان کال د زمري د ۲۴ مې نېټې ۱۴۴۴ شمېرې ددغه حکم یوه کاپي پژواک خبري اژانس هم ترلاسه کړې ده.

په یاد حکم کې راغلي، د میک راپور ته په کتو د بهرنیو چارو وزارت په کړنو او اجرااتو کې د تقنیني اسنادو د مراعاتولو په اړه د پوره ډاډ د ترلاسه کولو لپاره د پالیسۍ معاونیت، د ولسمشرۍ ریاست د عمومي دفتر د ریاست د ارزونې او څار د استازي په مشرۍ او د مالیې وزارت، ملي امنیت ریاست، د ملي تدارکاتو ادارې، د اداري اصلاحاتو او ملکي خدمتونو د خپلواک کمېسیون په غړيتوب د پلاوي ټاکل تایید دي.

ددغه حکم له مخې، یاد پلاوی موظف دی چې د هېواد ملي ګټو ته په پام د وړتیا، تخصص او تجربې په اساس د ډېپلوماتیکو او کونسلي کارکوونکو د جذب او ګومارنې په بهیر کې د تقنیني اسنادو رعایتول او ډېپلوماتیکو ماموریتونو ته د کسانو د لېږلو په برخه کې د تقنیني اسنادو مراعاتول په هر اړخیز ډول وڅېړي.

دغه راز ولسمشر لارښوونه کړې چې دغه پلاوی دې په بهرنیو چارو وزارت کې د ولسمشرۍ ریاست د احکامو د تطبیق او لګښتونو د حساب ورکولو او روڼتیا د څرنګوالي، په یاد وزارت کې د تدارکاتي لګښتونو او مالي چارو د مرحلو په طی کولو کې د تقنیني اسنادو مراعاتولو، د تړونونو د لاسلیک او طی مراحلو د څرنګوالي، د عایداتو او لګښتونو په ګډون په مالي او اداري برخو کې د روڼتیا او حساب ورکولو د څرنګوالي په اړه هم څېړنه وکړي.

د یاد حکم په پای کې راغلي چې دغه پلاوی دې په دوو اوونیو کې خپلې موندنې او وړاندیزونه له ولسمشر سره شریک کړي.

ولسمشر د روان کال د زمري میاشتې په جریان کې هم د لوړ پوړو دولتي چارواکو او مامورینو د سفرونو د طی مراحل  او منظورۍ په اړه حکم صادر کړی و.

د و لسمشر د روان کال د زمري میاشتې د پنځمې نېټې په ۸۰۳ شمېره حکم کې داسې راغلي: ((د لوړپوړو دولتي چارواکو او مامورینو(په ملکي برخه کې دویم بست او تر هغه لوړ) او په نظامي برخه کې (برید جنرال او تر هغه لوړ) د سفرونو اړوند چارو د ښه انسجام په موخه مراتب منظور دي.))   

د ولسمشرۍ ریاست په منظورۍ له هېواده بهر د ولسمشرۍ د چارو ادارې د عمومي ریاست له لارې د بهرنیو چارو وزارت د کارکوونکو د سفرونو په ګډون د ټولو لوړپوړو دولتي چارواکو او مامورینو د رسمي سفرونو د ټولو وړاندیزونو طی مراحل او لېږل، په یاد حکم کې د یادو چارواکو او مامورینو د سفرونو د منظورۍ د صلاحیت د تفویض او اعمالو اړوند د ټولو احکامو لغوه په یاد حکم کې ذکر شوي موارد دي.

د حکم په پای کې راغلي، ددغه حکم د تطبیق څارنه د ولسمشرۍ ریاست د مقام د عمومي دفتر پر غاړه ده.

دا په داسې حال کې ده چې د پژواک خبري اژانس د یوه راپور له مخې، په ۱۳۹۷ کال کې د نفوسو په تناسب په بهرنيو هېوادونو کې دافغانستان تر ټولو ډېر کارکوونکي د پنجشېر ولایت اوسېدونکي دي.

دغه راز په ۱۳۹۳ کال کې د پژواک خبري اژانس د یوې بلې څېړنې له مخې، د بهرنیو چارو وزارت زیاتره کارکوونکي او ډپلوماټان د حکومتي چارواکو خپلوان او اولادونه او د ملي شورا په غړو پورې اړوند کسان دي چې له معیارونو پرته جذب او په یاد وزارت کې پر دندو ګومارل شوي دي.

ورته راپورونه:

نظر ورکړئ

اعلانونه

Advertisement