د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

چین: هیله من یو طالبان له افغان حکومت سره خبرو ته کېني او اوربند وکړي

چین: هیله من یو طالبان له افغان حکومت سره خبرو ته کېني او اوربند وکړي

Aug 19, 2019 - 10:31

کابل (پژواک، ٢٨ زمرى ٩٨): د افغانستان او پاکستان لپاره د چین ځانګړى استازى د دې ترڅنګ چې وايي حاضر دى د افغانستان او پاکستان د اړيکو په ښه والي کې مرسته وکړي، له طالبانو وغوښتل چې د افغانستان له حکومت سره مذاکره او اوربند وکړي او سیاسي ژوند ته داخل شي.

له ارګه پژواک خبري اژانس ته په رالېږل شوې خبرپاڼه کې راغلي چې ولسمشر محمد اشرف غني نن ماښام د افغانستان او پاکستان لپاره د چین ولسي جمهوریت له ځانګړي استازي دینګ شیجون سره وکتل.

سرچينه زياتوي، په دې کتنه چې په ارګ کې وشوه، په پیل کې دینګ شیجون وویل، چین او افغانستان نږدې او ښې اړیکې لري او موږ په تېرو ۱۸ کلونو کې د افغانستان ملاتړ کړی دی.

هغه زیاته کړه، چین دې ته هیله من دی چې طالبان د افغانانو غوښتنه ومني او له اصلي لوري سره چې د افغانستان حکومت دی، مذاکره او اوربند وکړي او سیاسي ژوند ته داخل شي.

د ده په وينا، دغه راز چین هیله لري د افغانستان د ښه ګاونډي په توګه د سولې پروسې په تحقق کې خپل فعال رول ادا کړي، همدارنګه د افغانستان او پاکستان د نږدې اړیکو د تامین غوښتونکی دی او حاضر دی د دغو دواړو هېوادونو د اړیکو په ښه والي کې مرسته وکړي.

ولسمشر غني  د چین له ملاتړه مننه  وکړه او ويې ویل، افغانستان له چین سره نږدې امنیتي همکاري لرلې او د چین د شرقي ترکستان جنبش له ترهګریزې ډلې (ETIM) سره چې د دغه هېواد لپاره یو ګواښ دی، مبارزه کوي.

هغه زیاته کړه، طالبان تر اوسه هم د یوې ترهګریزې ډلې په توګه په افغانستان کې د شرقي ترکستان جنبش (ETIM) په ګډون له زیات شمېر تروریستي شبکو سره اړیکې لري.

دى وايي، موږ باید له طالبانو سره د یوې ډلې په توګه عمل وکړو، باید دغې ډلې ته د مشروع دولت په نظر ونه ګورو؛ ځکه دا د چین او بین المللي اصولو او موازینو خلاف کار دی.

غني څرګنده کړه، طالبان پر هېڅ ولایت او د افغانستان پر نفوس کنټرول نه لري او د هغوی دغه ادعا چې د افغانستان پر څو سلنه خاورې حاکمیت لري، له حقیقت څخه لرې ده.

هغه وویل، د طالبانو او امریکا ترمنځ ابتدايي هوکړه لیک به د افغانستان د حکومت او طالبانو ترمنځ د مستقیمو مذاکراتو لپاره زمینه برابره کړي.

غني ټینګار وکړ، زموږ جمهوري نظام به هېڅکله هم له یوې ډلې سره تر بحث لاندې رانه شي او طالبان مجبور دي چې سیاسي حل لاره انتخاب کړي؛ ځکه دغه ډله هېڅکله نه شي کولای یو ستر نظام سقوط کړي.

هغه وویل: په خواشينۍ سره چې طالبان اوس هم د ملکي وګړو وژنې ته ادامه ورکوي او د دوی د دغه ډول تروریستي بریدونو دوام د سولې پروسې لپاره ستر خنډ ګڼل کېږي او د مذاکراتو د پرمخ بېولو لپاره د خلکو غوښتنه کمزورې کوي، خو برعکس د هغوی د ځپلو لپاره زموږ اراده لا پیاوړې کوي.

غني زیاته کړه، دوی تر اوسه د سولې په پروسه کې د همکارۍ او تاوتریخوالي راکمولو لپاره د پاکستان د جدي اقدام شاهدان نه دي.

هغه وايي چې دغه هېواد لا هم له طالبانو ملاتړ کوي او دغه ډله د پاکستان له ملاتړ او پټنځایونو پرته دوام نه شي کولای.

هغه څرګنده کړه: "موږ د پاکستان له رهبرۍ سره خپل مذاکرات پیل کړي او پر دې باور یو چې پاکستان او بل هر هېواد طالباني افغانستان نه غواړي؛ ځکه طالبان د وروسته پاتې والي او بدبختۍ هینداره دي."

غني وویل، دوی سولې ته چمتو دي او سوله به د افغانانو د غوښتنې پر بنسټ رامنځته کېږي.

د ولسمشر په خبره چې له پاکستان سره د اړیکو د عادي کولو غوښتونکي دي او هیله لري چې پاکستان د کشمير موضوع د افغان سولې په پروسې پورې ونه تړي.

ولسمشر څرګنده کړه: "که چېرې طالبان خپلو تروریستي بریدونو ته دوام ورکړي، د سولې لپاره به لاره نوره هم راتنګه کړي او خلک به له موږ څخه وغواړي چې په دې اړه تر ټولو شدید تصمیم ونیسو."

نښه: 

ورته راپورونه:

نظر ورکړئ

اعلانونه

Advertisement