اسعداباد (پژواک، ٢٩ زمرى ٩٨): د کونړ حکومتي مسوولين وايي چې پاکستاني پوځيانو يو ځل بيا د دغه ولایت پر شلطن ولسوالۍ دوه سوه توغندي توغولي چې خلکو ته يې مالي زيانونه اړولي دي.
په دې اړه د کونړ د والي ویاند عبدالغني مصمم د زمري په ٢٩مه پژواک خبري اژانس ته وويل چې له تېر ماښام راهيسې یو ځل بیا پاکستاني پوځيانو د شلطن ولسوالۍ په سنو، چوګام شاه، تاغه څپري او چوګام او پر ځینو نورو سیمو دوه سوه توغندي توغولي دي.
مصمم زیاتوي چې د دغو توغنديو له امله خلکو ته ځاني زيان نه دى اوښتی، خو څلور کورونه يې ويجاړ کړي، کروندې يې له منځه وړې او لسګونه څاروي يې وژلي دي.
نوموړي له نړيوالې ټولنې غوښتنه وکړه چې د پاکستان د دغه ډول کړنو پر وړاندې غلې پاتي نه شي.
په ورته وخت کې د شلطن ولسوالۍ یوه اوسېدونکي خلیل الله پژواک ته وويل چې له تېرې شپې راهيسې پاکستانيانو د دوى پر ولسوالۍ بې شمېره توغندي توغولي دي.
هغه وايي: ((ښځو او ماشومانو د دغو درنو ډزو له امله خوب نه دى کړى او ټوله شپه يې په وېره کې تېره کړې ده.))
خليل الله له حکومت نه غوښتنه وکړه چې د پاکستان د دغه عمل پر وړاندې نور جدي اقدامات وکړي.
د يادونې ده، په تېرو څو کلونو پاکستاني پوځيان په وقفه يي ډول په کونړ او ځينو نورو ولايتونو توغندي توغولي چې له امله يې ځيني کسان وژل شوي او يو شمېر کورنۍ نورو سيمو ته کډه شوې دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن