کندهار (پژواک، ۲ وږی ۹۸): د کندهار په میوند ولسوالۍ کې د یوې ترافیکې پېښې په پایله کې د ښځو او ماشومانو په ګډون شپږ کسان مړه شوي او ۱۲ نور ټپيان شوي دي.
پېښه نن سهار اووه نیمې بجې د دې ولسوالۍ په تورو سیمه کې رامنځته شوې ده.
د کندهار د والي ویاند بهیر احمدي پژواک خبري اژانس ته وویل، د یوه سراچه موټر د چپه کېدو پېښه کې چې د ډېر ګړندي تګ له امله رامنځته شوې، شپږ کسان مړه شوي او ۱۲ نور ټپيان دي.
هغه زیاته کړه، په مړه شوو کې موټر چلوونکی، درې ښځې، یو ماشوم او یوه ماشومه نجلۍ شامل دي.
د ده په خبره، د برسېرنو ټپیانو درملنه د میوند ولسوالۍ په روغتون کې شوې او هغه چې ټپونه یې ژور وو، د کندهار ښار میرویس روغتون ته وړل شوي دي.
ده دا هم وویل چې د ترافیکو مدیریت د دې پېښې څېړنه کوي.
روغتیايي چارواکي وايي، له جګړې وروسته ترافیکي پېښې ډېرو خلکو ته مرګ ژوبله اړوي.
د کندهار اوسېدونکي هم د ترافيکي پېښو پر ډېرېدو اندېښمن دي او وايي، دا د ترافیک پولیسو دنده ده چې د دغو پېښو د کمولو لپاره کار وکړي.
د دوی پر باور، تر هغه چې اړوندې ادارې پر سرغړوونکو قانون پلى نه کړي، ترافیکي پېښې نه کمېږي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن