د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د کندهار نارنج ماڼۍ کې ۲۹ قلمه تاريخي اثار موندل شوي

د کندهار نارنج ماڼۍ کې ۲۹ قلمه تاريخي اثار موندل شوي

Oct 03, 2019 - 16:48

کندهار (پژواک، ۱۱ تله ۹۷): یو کال مخکې د اطلاعاتو او فرهنګ وزارت د لرغونپوهنې ادارې په کندهار کې د نارنج ماڼۍ د کیندنې چارې پيل کړې چې په دې موده کې ۲۹ قلمه تاریخي اثار موندل شوي دي.

په دغې تاریخي ماڼۍ کې چې لرغونتیا یې له ۲۳۰۰ کلونو اوړي، د کیندنې چارې د تاریخي ابداتو د څېړنې په موخه ترسره کېږي.

د کندهار د اطلاعاتو او فرهنګ رییس حکمت الله افغان پژواک خبري اژانس ته وویل، په نارنج ماڼۍ کې له تېر یوه کال راهیسې د کیندنې چارې روانې دي.

هغه زیاته کړه، تېر کال د نارنج ماڼۍ د کیندنې پر مهال ۵۳ قلمه منقول اثار وموندل شول اوسږ کال په کې یو زمنا/سونا او ۲۹ قلمه نور منقول اثار موندل شوي دي.

د ده په خبره، د دغې تاریخي ماڼۍ د بېلابېلو تاریخي برخو د ساتنې په موخه لازم تدابیر نیول شوي دي.

خو ده وویل چې په تېر کې جګړو او ناقانونه کیندنو د دغې ماڼۍ ځینې برخې او اثار له منځه وړي دي.

د اطلاعاتو او فرهنګ وزارت اړوند د لرغون پوهنې د برخې مسوول انجنیر فریدون  چې د کیندنې چارې په غاړه لري، وايي، تاریخي کیندنې او سپړنې کلونه وخت غواړي.

دی وايي، تر دې مهاله په نارنج ماڼۍ کې د کیندنې پر مهال بېلابېل لوښي، ګاڼې او نور تاریخي توکي موندل شوي چې ډېر یې د هوتکو په دورې پور اړه لري.

د دغې تاریخي ماڼۍ د کیندنې چارې د لومړي ځل لپاره ۵۵ کاله وړاندې پیل شوې وې چې بیا د جګړو او ناخوالو له امله درېدلې وې.

خو پنځه پنځوس کاله وروسته یو ځل بیا د دغې تاریخي ماڼۍ د مسلکي او فني کیندنې چارې د لرغونپوهنې ادارې په مرسته پيل شوي چې ښايي درې کاله به دوام وکړي.

په دې موده کې به ګڼ تاریخي اثار تر لاسه شي او د تاریخي ابداتو څېړنه به ترسره شي.

نارنج ماڼۍ د کندهار د زاړه ښار په څنډه کې ۲۳۴۰ کاله وړاندې د مقدوني اسکندر د امپراطورۍ پر مهال ودانه شوې ده چې هغه مهال پوځي اډه وه.

د تاریخ په حواله، هغه وخت چې مقدوني سکندر له يونانه راغی په ټول هېواد کې يې دوولس دا ډول ماڼۍ جوړې کړې چې د (سکندريه ماڼيو) په نوم يادېدلې، نورې يوولس دا ډول تاريخي ماڼۍ په بشپړه توګه له منځه تللي خو يوازې (نارنج) ماڼۍ پاتې ده.

نارنج ماڼۍ د هېواد تېرو ناخوالو ورانه کړې او دا مهال يې يوازې د خاورو يوه غونډۍ تر سترګو کېږي.

د ماڼۍ دننه اوس هم خورا تاريخي او باارزښته اثار تر خاورو لاندي دي چې یوه اندازه یې د جګړې په کلونو کې قاچاق شوي هم دي.

دغه راز په تېرو لسو کلونو کې د نارنج ماڼۍ ډېرې ځمکې د زورواکو له لوري غصب شوې، خاوره يې وړل شوې او زيات تاريخي اثار یې په غير فني او غیر قانوني ډول ايستل شوي او بهرنيو هېوادونو ته قاچاق شوي دي.

ورته راپورونه:

نظر ورکړئ

اعلانونه

Advertisement

Maiwand Bank - Just Banking