د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

ليدونکي: په هندي فلم "پاني پت" کې تاريخ تحريف شوى

ليدونکي: په هندي فلم "پاني پت" کې تاريخ تحريف شوى

Dec 07, 2019 - 17:38

کابل (پژواک، ١٦ ليندۍ ٩٨): د هندي سينما له خوا د احمدشاه بابا د پاني پت پر درېيمې جګړې جوړ شوى فلم "پاني پت" پرون نندارې ته وړاندې شو.

د هندي رسنيو د معلوماتو له مخې، په دغه فلم کې چې شاوخوا يو ميليارد هندي کلدارې لګښت پرې راغلى، پرون په لومړۍ ورځ يې چندانې عايد نه درلود او په ټول هند کې يې نږدې پنځوس ميليونه کلدارې عايد درلود.

دغه فلم د افغانانو او هندوانو ترمنځ د پاني پت پر درېيمې جګړې جوړ شوى دی؛ دا جګړه د ١٧٦١ زېږديز کال د جنورۍ په مياشت کې د هندوستان په پاني پت سيمه کې شوې وه.

د معلوماتو له مخې، د دې جګړې مشري د احمد شاه ابدالي په مشرۍ د نواب نجيب الدوله او حافظ الملک حافظ رحمت خان له خوا ترسره شوې چې څلوېښت زره جنګيالي يې لرل.

د پاني پت درېيمه جګړه په شمالي هندوستان کې د احمد شاه بابا او مرهټه وو ترمنځ يوه لويه جګړه وه.

احمدشاه بابا د هند مرهټه پوځ ته چې سیکان او جټان يې هم په ايتلاف کې ملګري وو،  ماتې ورکړه او شاوخوا ۰۰۰، ۵۰ هندو سرتېري یې ووژل.

دغه فلم د هندي فلمي صنعت باليووډ  د مشهور ډايريکټر اشوتاش  له خوا جوړ شوى چې له دې مخکې يې هم د لګان او جودا اکبر په نامه تاريخي فلمونه جوړ کړي دي.

په دغه فلم کې د هندي سينما مشهور ستوري سنجي دت د احمد شاه بابا رول ترسره کړى، دغه راز په فلم کې د نورو ترڅنګ ارنجن کپور او کريتي سنون هم مهم نقشونه لوبولي دي.

ددې فلم تر خپرېدو مخکې ګڼ شمېر افغانانو په دې اړه اندېښنې درلودې چې په کې احمدشاه ابدالي ته سپکاوى نه وي شوى او يا تاريخ به يې سم نه وي وړاندې کړى. اوس چې دا فلم نندارې ته وړاندې شوى، په اړه يې افغانان بېلا بېل ډول نظرونه لري.

په امريکا کې مېشت افغان ليکوال او ژورنالېست جعفر هاند چې دا فلم يې پرون کتلى، په اړه يې فيسبوک کې تفصيلي نظر ورکړى او ارزونه يې کړې ده.

هغه ليکلي، په فلم کې له مرهټانو سره د احمد شاه دراني په مشرۍ د پاني پت درېیمه تاریخي‌جګړه په هنري او داستاني بڼه تصویر شوې ده.

دى وايي: ((تر تاریخي فلم ښه ده چې هنري فلم یې وبولو. کله چې مرهټان هڅه کوي ‌چې خپله واکمني پراخه کړي او د هند نور ایالتونه او سیمې هم ونیسي، د (روهیلکنډ) نجیب الدوله خبریږي چې مرهټان پر دوی هم یرغل کوي، دی کندهار ته ځي او له احمدشاه دراني څخه مرسته غواړي. .))

هاند په دې ليکنه کې د فلم ځينې کيسې او صحنې له تاريخ سره پرتله کړي چې د هغه په وينا، ډېر داسې شيان په فلم کې شته چې په تاريخ کې نشته او يا بر عکس.

هغه زياتوي: ((د دې فلم یو ښه والی دا شو چې زما په ګډون ډېر افغانان یې اړ کړل چې د خپل تاریخ  دغې برخې ته بیا رجوع وکړي. په فلم کې افغان ببرک اکبري هم شته، خو په ټول فلم کې درې ډیالوکونه ورکړل شوي  چې بیا په جګړې کې مري.))

د هاند په وينا، سنجي دت د احمدشاه دراني رول هم ښه نه دی ادا کړی او په ټول فلم کې ډېر جعلي معلوميږي، خو په فلم کې يې د مرهټیانو د لښکر د مشر (ارجون سنګ)‌رول ښه دى.

د افغانستان د تېرو ولسمشرۍ ټاکنو کانديد نور رحمن لېوال چې دا مهال هند کې دى، په فيسبوک کې يې ليکلي چې په سينما کې يې دا فلم کتلى دى.

هغه زياته کړې، څه موده مخکې چې د ياد فلم ټرېلر خپور شو، له  ډېری افغانانو سره اندېښنه وه چې ګواکې د احمدشاه بابا شخصيت ته په کې سپکاوی نه وي شوی، خو يو شمېر اندېښنې لا هم پر ځای دي. په ياد فلم کې تاريخ له پامه غورځول شوی او ډېرې تاريخي اشتباه ګانې په کې شته.

دى وايي: ((په سينما کې راسره خوا کې ناست هندي مرهټى و، چې د پاني پت د جګړې غږونه يې اوس هم په غوږونو کې و، وويل، هغه راته وويل، د پاني پت جګړې ته هغه وخت لاره هواره شوه چې کله په ١٧٥٨م کال کې مرهټيانو اټک او پېښور باندې بريد وکړ او د اټک او پېښور کلاوې يې ونيولې، نو ما ورته وويل چې د جګړې پيل مرهټيانو کړى، مرهټيانو د پښتنو په خاوره اټک او پېښور کې څه کول؟ سړى بې ځوابه شو، نو مې ورغبرګه کړه چې له دې څرګنده شوه چې بابا کله هم پر هندوستان يرغل نه دى کړى او د خپلې سيمې ساتلو او په هندوستان کې يې د خپلو ملګرو مرسته کړې چې نن هم هېوادونه يو بل سره ورته مرستې کوي.))

لېوال ويلي، همدارنګه فلم دا هم څرګندوي، لکه نن چې د پاکستان او ايران حکومتونه د افغانانو لپاره ګواښونه دي، په هغه وخت کې هم له ختيځ څخه هندي امپراتورۍ ګواښ وې او له لوېديځ څخه د ايرانيانو له خوا تر يرغلونو لاندې وو.

د سياسي چارو شنونکي شفيق همدرد بيا په فيسبوک کې ليکلي، هندوانو او مرهټانو خوتاریخ سخت تحریف کړی! احمد شاه بابا د تاریخ ځلانده باب دی، په داسې فلمونو يې شخصیت وژنه نه شي کېدای، ځکه موږ پوهیږو چې حقیقت څه دی.

د احسان الله هاشمي په نامه يو تن په فيسبوک کې ليکلي، دلته د فلم په  ناکامۍ کې دوه څیزونه ښکاره دي؛ اول د تاريخ او دويم د هنديانو ذوق.

هغه زياته کړې: ((هندیانو فلم ته ځکه لېوالتيا وښودله چې ګومان يې کاوه فلم کې به يې د مرهټیانو د مشر رول د یو هېرو په څېر وي او په ياد فلم کې به له احمد شاه ابدالي جګړه وګټي. خو بل لوري ته د تاریخ په روایت ځکه فلم کمزوری کېږي چې هڅه شوې د تاریخي پېښو پر وړاندې کولو کې له سينمايي ذوق څخه کار واخیستل شي او ټول کرکټرونه د ډایرکټر په خوښه ولوبول شي.))

عبدالحليم اڅکزي بيا ويلي چې د فلم د ناکامۍ لامل یې د ښو لوبغاړو نه شتون دى. په کار وه چې داسې تاریخي کيسه کې مهم لوبغاړي لوبول شوي وای. پرته له سنجي دت  نور يو هم د ډېرو خلکو پام ځان ته نه شي اړولای.

شاه محمود هوتک ليکلي، ما وړاندوينه کړې وه، چې دې فلم کې به تاريخ تحريف کېږی، غټ تهمتونه به جوړیږی، ابدالي به يرغلګر او مراټها به مظلوم ښودل کېږي.

مصطفى حبيبزي بيا ويلي: ((زما په اند موږ ورته د خپل تاريخ له عينکو ګورو، ځکه په کې ډېر څه نه شو زغملى او هغوى فلم د دې لپاره جوړ کړى چې له يو طرفه پرې مادي ګټه وکړي، له بل طرفه د هند 'سافټ پاور' برقرار وساتي او د هند تمدن د تېر په څېر اعلى وښيي، فکر نه کوم دوى دې هر فلم کې د ټولو خلکو خوشحالۍ په نظر کې ونيسي.))

په هندوستان کې د افغانستان سرپرست سفير طاهر قادري تېره مياشت پژواک ته ويلي و: ((موږ د هندوستان له حکومتي چارواکو سره په اړيکو کې يو او د افغانانو اندېښنې مو  ورسره شريکې کړې دي.))

په نوي ډيلي کې د افغانستان د سفارت کلتوري اتشه اجمل عالمزى وايي، دوى د ١٣٩٦ لمريز کال د ليندۍ په مياشت کې له دې فلم څخه خبر شول او په هماغه وخت يې په دې اړه څېړنې پيل کړې دي.

ورته راپورونه:

نظر ورکړئ

اعلانونه

Advertisement