د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

يو شمېر سناتوران: "ای ايس ای" د ناکامورا په وژنه کې لاس لري

يو شمېر سناتوران: "ای ايس ای" د ناکامورا په وژنه کې لاس لري

Dec 08, 2019 - 18:04

کابل (پژواک، ۱۷ لیندۍ ۹۸): د مشرانو جرګې یو شمېر غړي "ای ايس ای" د "ناکامورا" په وژنه کې په لاس لرلو تورنوي او د سولې له پروسې ملاتړ کوي، خو وایي، سوله باید د افغانستان دولت او طالبانو تر منځ وشي.

ډاکټر تيڅو ناکامورا د روان کال د لیندۍ په ۱۳مه سهار مهال په جلال اباد ښار کې د وسله وال بريد په ترڅ کې له خپلو پنځو ملګرو سره و وژل شو. پرون د لیندۍ په ۱۶مه د هغه جسد د يو لړ مراسمو په ترڅ کې د هغه مېرمنې او لور ته وسپارل شو.

ناکامورا چې د PMS جاپانۍ موسسې رییس هم و، افغان ولسمشر څه موده مخکې ورته په وروستیو لسیزو کې په افغانستان کې د کرنې او بیارغونې په برخو کې د خیریه کارونو ترسره کولو په خا‌طر د افغانستان افتخاري تابعیت ورکړی و.

د ده د کارونو له ډلې د ننګرهار په خېوې ولسوالۍ کې د مروارید په نوم د یوه ستر کانال جوړول و چې د هغه په وسیله د کونړ له سیند څخه زرګونه جريبه ځمکې خړوبېږي.

د مشرانو جرګې غړو نن په عمومي ناسته کې د ډاکټر تيڅو ناکامورا مړينه وغندله او د پاکستان ای ايس ای يې د "ناکامورا" په وژنه کې په لاس لرلو تورن کړ.

د دې جرګې غړې فوزيه سادات وايي، د ناکامورا په مړينې نه يواځې دننګرهار خلک، بلکې ټول افغانستان ځکه ورباندې خپه دی چې خپل يو رښتينی خدمتګار يې له لاسه ورکړ.

هغې وويل: "د کاکا مراد (ناکامورا) وژنه د پاکستان د ای ايس ای کار دى، پاکستان د ډېرو لږو خرڅ شويو افغانانو پر مټ دغه کار وکړ؛ دا مطلق د ای ايس ای کار  دى، ځکه هغوی هېڅکله نه غواړي د افغانستان اوبه مهار شي."

هغې له ولسمشر څخه مننه وکړه چې د ناکامورا جسد يې په خپلو اوږو تر الوتکې يووړ.

د دې جرګې بلې غړې انارکلي هنريار چې په سلګيو يې ژړل، وويل: "  متاسفانه افغانستان نن د يوه خپل رښتيني بچې د وېر په ټغر ناست دی؛ زموږ دښمنانو هغه کس ونه شو زغملی چې په صادقانه  ډول يې افغانستان ته خدمت کاوه؛ زموږ غوښتنه دا ده چې عاملين يې ونيول شي او په نړيواله محکمه کې محاکمه شي."

د مشرانو جرګې مشر فضل هادي مسلميار د ناکامورا او ورسره د پنځو کسانو وژل کېدل وغندل او ويې ويل چې ناکامورا د افغانستان يو ګمنام سپاهي او خدمتګار و چې په صادقانه ډول يې افغانستان ته خدمت کاوه.

هغه وويل: "متاسفانه چې کله مطبوعاتي شو، د افغانستان اصلي دښمنانو چې ای ايس ای دى، هغوی قرباني کړ، د کونړ پر سيند باندې او له دې هېڅوک سترګې نه شي پټولای."

دی زياتوي، د مشرانو جرګه د ننګرهار له امنيتي او دفاعي ځواکونو غواړي چې د هغه قاتلين ونيسي او په علني ډول دې محاکمه کړي؛ له دې سره سره چې ولسمشر هم د ننګرهار امنيتي او دفاعي ځواکونو ته هدايت ورکړی چې د ناکامورا قاتلين ونيسي.

دا په داسې حال کې ده چې د ليندۍ په ۱۵مه د کابل ځینو ښاریانو او د افغانستان همبستګۍ ګوند غړو د پاکستان سفارت مخې ته د لاریون په ترڅ کې ادعا وکړه چې د ناکامورا په وژنه کې د پاکستان د استخباراتي ادارې لاس دی.

د مشرانو جرګې غړي محمد اکبري نن د دې جرګې په عمومي ناسته کې وويل، افغانان د سولې تږي دي او د افغانستان د ټولو خلکو غوښتنه دا ده چې سوله ټينګه او ورور وژنه بنده شي.

د سولې خبرې چې شاوخوا نهه مياشتې د طالبانو او امريکا د متحده ايالتو د استازو تر منځ څه موده وړاندې درېدلې وې، خو څلور ورځې وړاندې د سولې په چارو کې د امريکا ځانګړي استازی زلمی خليلزاد د امريکا د ولسمشر تر راتګ وروسته افغانستان ته راغی او له يو شمېر حکومتي چارواکو او سياسيون يې سره وکتل.

هغه وړمه ورځ دوحې ته ولاړ او هلته يې له طالبانو سره د سولې خبرې بيا پيل کړې.

اکبري وويل: "هغه سوله زموږ په ګټه تمامېدای شي چې د اساسي قانون په رڼا کې او د افغانانو تر مشرۍ لاندې ترسره شي، د سولې هر ډول خبرې چې د حکومت تر مشرۍ پرته ترسره شي؛ په هېڅ صورت د تلپاتې سولې خاوندان نه شو کېدای."

د دې جرګې بل غړي رحمت الله اڅکزي هم په قطر کې د طالبانو او امريکايانو تر منځ د سولې د خبرو له پېلېدو خوښي وښوده، خو ويې ويل: "که د سولې خبرې د افغانانو او طالبانو يا افغان حکومت او طالبانو تر منځ په مستقيم ډول ونه شي، هېڅ ګټه به ونه لري."

مسلميار د سولې پروسې په اړه وويل چې مشرانو جرګه ښکاره دريځ لري او کور دننه او له هېواده بهر د سولې  پروسې ملاتړ کوي.

خو هغه زياتوي: "موږ د بين الافغاني سولې پلويان  يو چې سوله د افغانانو تر منځ وي، د طالبانو او حکومت تر منځ وي، د امريکا او طالب تر منځ که پنځه مياشتې پخوا خبرې وې او که بيا نهه مياشتې وخت ونيسي؛ دا چې موږ د دوی پر مجالسو اګاه نه يو، نو حمايت يې هم نه شو کولای."

د ده په وينا، څو چې افغانان او افغان حکومت د سولې په خبرو کې شريک نه شي، د طالبانو او امريکايانو تر منځ خبرې هېڅ ګټه نه لري.

ورته راپورونه:

نظر ورکړئ

اعلانونه

Advertisement