کابل- مزارشريف (پژواک، ٢٥ لېندۍ ٩٨): د بلخ امنيه قومانداني وايي چې د نظام الدين قيصاري پر کور عمليات پاى ته رسېدلي، خو د هغه برخليک لا نه دى معلوم.
د بلخ امنيه قوماندان اجمل فايز د لېندۍ په ٢٥مه پژواک خبري اژانس ته وويل چې د قيصاري پر کور ترسره شوو عملياتو کې د هغه د يوه قوماندان په ګډون ١٢ وسله وال کسان وژل شوي دي.
هغه زياته کړه چې په وژل شوو کسانو کې د نېک محمد په نوم د هغه يو قوماندان هم شامل دى.
امنيه قوماندان وايي چې دغه راز په دغو عملياتو کې د قيصاري ٣٠ وسله وال له وسلو او مهماتو سره نيول شوي چې يو کس يې ټپي دى.
د نوموړي په وينا، په عملياتو کې دوه پوليس هم ټپيان شوي چې روغتيايي حالت يې د ډاډ وړ ښودل شوى دى.
فايز وايي چې په خپله د قيصاري په اړه لا دقيق معلومات نشته او ډېر امکان شته چې له سيمې پر وتلو بريالى شوى وي.
بلخوا د کورنيو چارو وزارت يوې سرچينې پژواک ته وويل چې قيصاري لا په سيمه کې د خپلو پلويانو له لوري يې د تېښتې اوازه ګډه کړې ده.
د غير مسوولو وسله والو قوماندان نظام الدين قيصاري په دې وروستيو کې په بلخ ولايت کې خلکو ته ستونزې جوړې کړې وې او د شبرغان لويه لاره يې هم د څو ورځو لپاره تړلې وه.
امنيتي ځواکونو وړمه ورځ د هغه د نيولو په موخه عمليات پيل کړي وو او له کابله د پوليسو د ٢٢٢ ځانګړې قطعې ځواکونه هم په دغو عملياتو کې د ګډون لپاره مزارشريف ته رسېدلي وو.
په دې اړه به نور جزئيات وروسته خپاره شي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن