د پژواک خدمتونه

د انځورونو څانګه

غږيزه څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

بلخ کې ٤٣ مېرمنو ته د موټر چلولو جوازونه ورکړل شول

بلخ کې ٤٣ مېرمنو ته د موټر چلولو جوازونه ورکړل شول

Jan 19, 2020 - 17:48

مزارشريف ( پژواک، ۲۹مرغومی ۹۸) : د بلخ ولايت په مرکز مزارشريف ښار کې ۴۳ مېرمنو له يوې مياشتنۍ مسلکي او عملي زده کړو وروسته د موټر چلولو جوازونه تر لاسه کړل.

دغه مېرمنې چې ډېری يې د بلخ پوهنتون استادانې دي وايي، چې موخه يې دا ده څو پر ځان بسيا شي او د اړتيا پر مهال خپله موټر وچلولای شي.

له دې سره د بلخ د ترافيکو مديريت وايي، چې وروستيو کلونو کې مزارشريف ښار کې له موټر چلونې سره د نجونو او مېرمنو لېوالتيا زياته شوې ده.

د مزارشريف ښار په بلخ پوهنتون کې د مرغومي په ۲۹مه، هغو ۴۳ مېرمنو ته د موټر چلونې جوازونه ورکړل شول، چې د يوې مياشتې په موده کې يې ډرېوري زده کړې وه.

ياده روزنيزه لړۍ د افغانستان د روښانه نن او سبا بنسټ له خوا د بلخ د ښځو چارو رياست او ترافيکو مديريت په همکارۍ پلې شوې ده.

د افغانستان د روښانه نن او سبا بنسټ مسوول نجيب الله غضنفر پژواک ته وويل، چې موخه يې دا ده؛ څو هغو مېرمنو ته د موټر چلولو هنر ور زده کړي، چې لېوالتيا يې لري.

هغه زياته کړه، درې کاله وړاندې يې فعاليت پيل کړ، چې تر دې مهاله يې شاوخوا درې زره تنو مېرمنو ته په مسلکي ډول ډرېوري ور زده کړې او جوازونه يې ورکړي دي.

نوموړي وويل: (( هغه مېرمنې چې موږ سره ثبت نام کوي، هغوی ته د موټر چلولو د زده کړې لړۍ پيل کوو، ځانګړی مهالوېش لري، له تيوري او عملي زده کړو وروسته يې د بلخ ترافيکو مديريت ته راجع کوو، کله چې هغوی ازموينه ترې واخلي او دوی کاميابې شي، بيا د ډرېورۍ جواز ورکوو)).

غضنفر زياتوي، لا هم زيات شمېر مېرمنې او نجونې شته چې د موټر چلونې زده کړو سره لېوالتيا لري؛ خو د کورنيو له خوا اجازه نه ورکول کېږي.

د هغه په وينا، د ډرېورۍ پر مهال د نارينه وو له خوا د مېرمنو ځورول بله ننګونه ده، چې مېرمنې ورسره لاس او ګرېوان دي.

هغه وويل، چې د يادې ستونزې د حل لپاره هم دوی د عامه پوهاوي ځيني پروګرامونه تر لاس لاندې لري، چې له مخې به يې د مېرمنو له خوا د موټر چلولو په اړه ناسم ذهنيتونه څه نا څه اصلاح شي.

مريم پارسا د بلخ پوهنتون اداري کارکوونکې ده، چې په دغه يوې مياشتنۍ روزنيزه لړۍ کې يې موټر چلول زده کړي دي.

هغې د ډرېورۍ جواز اخيستو پر مهال پژواک ته وويل، چې تر اوسه يې فکر کاوه، چې دا د کورنۍ د غړو پر اوږو بار ده؛ ځکه په خبره يې چې ډېری وخت به يې دندې ته د خاوند له خوا په موټر کې وړل کېده.

مېرمن پارسا وايي: (( زه اوس فکر کوم، چې يو مهم اړخ مې پوره شو، پخوا مې خاوند مجبور و، چې ما هره ورځ په خپل موټر کې زما تر کار ځای پورې را ورسوي، که کله به هغه په سفر کې و او يا به هم ناروغ و، نو زه به له ګڼو ستونزو سره مخ وم، اوس کولای شم خپله په خپل موټر کې دندې ته راشم او بېرته لاړه شم)).

دغه مېرمن همدا راز وايي، چې په ليني موټرو او يا هم د ښار په ټکسيو کې تګ راتګ پر مهال بار بار د نارينه وو له تاوتريخوالي سره مخ شوې ده.

هغه له کورنيو څخه غوښتنه کوي، چې لږ تر لږه بايد په هرې کورنۍ کې يوه مېرمن داسې وي، چې موټر چلول يې زده وي؛ څو د اړتيا پر مهال د خپلې کورنۍ ستونزه حل کړای شي.

په ورته مهال په ښار کې د مېرمنو له موټر چلولو سره د خلکو نا اشنايي لا هم د ښځو لپاره يوه لويه ننګونه ده.

بلقيس رحيمي بله مېرمن ده، چې په مسلکي ډول يې موټر چلول زده کړل او جواز يې تر لاسه کړ.

هغه وايي، چې پخوا هم څه نا څه له موټر چلولو سره اشنا وه؛ خو په خبره يې چې کله به هم ښار کې ګرځېده نو د نارينه ډرېورانو له خوا به ځورول کېدله.

بلقيس وويل: (( د موټر چلولو پر مهال ډېری وخت نارينه موټروانان اشترينګ راباندې وهي، يا هم خلک راته ګوري او تعجب کوي، چې ښځې ته وګوره او موټر چلولو ته. زه فکر کوم دا مفکوره غلطه ده، موږ اړتيا لرو چې د نارينه وو تر څنګ مېرمنې هم موټر چلول زده کړي)).

د هغې په خبره، خلک بايد ورو ورو له دې فرهنګ سره اشنا شي، چې مېرمنې هم د موټر چلولو حق لري.

د بلخ د ترافيکو مديريت وايي، چې په وروستيو کلونو کې مزارشريف ښار کې موټر چلولو سره د ښځو لېوالتيا زياته شوې ده.

د ترافيکو مديريت د تعليم او تربيې رييس څارمن عبدالله وايي، چې د ۱۳۹۸ لمريز کال په اوږدو کې بلخ ولايت کې ۳۰۰ مېرمنو په مسلکي ډول د موټر چلول زده کړې کړي، چې ۱۸۰ تنو يې د ډرېورۍ رسمي جوازونه هم تر لاسه کړي دي.

د هغه په خبره، ياد مديريت هڅه کوي، تر څو خلکو ته پوهاوی ورکړي، چې د ښځينه ډرېورانو د ازار او اذيت سبب ونه ګرځي.

نوموړی ګواښ کوي، چې که هر څوک په ښار کې د ښځينه ډرېورانو د ځورولو لامل شي؛ نو جدي او قانوني جزا به ورکړل شي.

د بلخ د ښځو چارو رييسه شهلا حديد هم وايي، چې مزارشريف ښار کې د ښځو د پرمختګ لپاره ښه زمينه برابره ده.

هغه پر ښځو غږ کوي، چې له دغو فرصتونو څخه دې سالمه استفاده وکړي.

د مېرمن حديد په خبره، څومره چې مېرمنې په ټولنه کې سهم اخلي، نو په هماغه اندازه د تاوتريخوالي کچه راټيټېږي.

ورته راپورونه:

نظر ورکړئ

اعلانونه

Advertisement

Etisalat Get more data, Etisalat Afghanistan