د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

نړیوال بانک په ۲۰۲۰ کال کې د افغانستان اقتصادي وده ۳٫۳ سلنه اټکل کړې ده

نړیوال بانک په ۲۰۲۰ کال کې د افغانستان اقتصادي وده ۳٫۳ سلنه اټکل کړې ده

Jan 22, 2020 - 15:39

کابل (پژواک، ۲ سلواغه ۹۸): د نړیوال بانک موندنې ښيي چې افغانستان د مبهم سياسي وضعيت ترڅنګ بيا هم په تېر ميلادي کال کې ۲٫۹ سلنه اقتصادي وده کړې او تمه ده چې په ۲۰۲۰ کال کې ۳.۳ سلنې ته لوړه شي.

نړيوال بانک نن په کابل کې "له ابهامونو ډک لور ته حرکت" تر نوم لاندې یو راپور خپور کړ.

په راپور کې راغلي چې د ۲۰۱۹ کال د ولسمشرۍ ټاکنو ناڅرګند برخليک، په راتلونکي کې د افغانستان له پوځي او ملکي سکټورونو سره د نړيوالو مرستو ناڅرګند برخليک او له طالبانو سره د سياسي جوړجاړي ګونګ حالت دغه هېواد له ابهامونو ډک حالت سره مخ کړی.

د ولسمشرۍ ټاکنې د روان کال د تلې په مياشت کې وشوې خو تر اوسه يې وروستۍ پايلې نه دي اعلان شوې او په تړاو یې د شوو شکایتونو څېړنه روانه ده.

په راپور کې راغلي چې د ټاکنو دغه حالت د هېواد پر اقتصادي وضعيت ناسم اغېز کړی دی.

سرچينه ليکلي: "د دې ترڅنګ په افغانستان کې ناامني دوام لري، د ښکېلو ډلو په بريدونو کې د ملکي وګړو مرګ ژوبله ډېره شوې او په قطر کې  د طالبانو او امريکا د استازو تر منځ د سولې خبرې روانې دي، خو د سياسي جوړجاړي وروستسۍ پايلې لا نامعلومې دي."

خو په راپور کې راغلي کې چې له دې ټولو ستونزو سره، سره په مالي برخه کې د افغانستان کړنې ښې شوې او د څه باندې دوه ميليارده افغانيو داخلي عوايدو په راټولولو يې د کال لپاره ټاکل شوی هدف د کال په نيمايي کې پوره کړی دی.

سرچینه زیاتوي چې افغانستان په تېر ميلادي کال کې ۲٫۹ سلنه اقتصادي وده کړې او اټکل کېږي چې په ۲۰۲۰ کال کې  ۳٫۳ سلنې ته لوړه شي.

د یاد بانک د اقتصادي چارو پوه حبیب الرحمن صاحب زاده وایي، د دغې اقتصادي ودې اصلي لامل د وچکالۍ د اغېز په کمېدو سره د کرنيز سکټور وده ده.

د هغه په وینا، په افغانستان کې د اقتصادي ودې ترڅنګ په ۲۰۱۹ کال کې له افغانستانه د صادراتو کچه راټيټه شوې او د لوږې کچه ډېره شوې ده.

د ده د معلوماتو له مخې، د افغانستان حکومت ۷۵ سلنه بودجه لا هم له نړیوالو مرستو تمويلېږي، د مرستو اوسنۍ ژمنې د ۲۰۲۰ کال تر پايه دي او يو شمېر سترو مرستندويانو داسې نښې هم ښودلي چې کېدای شي خپلې مرستې به کمې کړي.

په ۲۰۱۸ میلادي کال کې د افغانستان اقتصادي وده ۲،۲ سلنه ښودل شوې وه.

د یاد بانک د راپور په يوه برخه کې راغلي چې په منځ مهاله وخت کې تمه کېږي، افغانستان د کابو ۴ سلنې اقتصادي ودې شاهد وي، خو په دې شرط چې امنيتي وضعيت نور هم خراب نه شي او د نړيوالې ټولنې مرستې دوام پيدا کړي.

په افغانستان کې د نړيوال بانک ګروپ د دفتر مشر هنرلي کرالي (Henry G. R. Kerali) په نننۍ ناسته کې وويل: "يوې مطلوبې اقتصادي ودې ته د رسېدو په پار، د لوږې کمېدل او د افغانستان د خلکو د ژوندانه شرايطو د ښه والي په موخه لازمه ده، چې په دې هيواد کې د اصلاحاتو او سمونې پروګرامونه په چټکۍ پلي شي."

دی زياتوي، په وروستيو کلونو کې د شوو پرمختګونو د ساتنې او دوام، د پراختيايي پروګرامونو د پلي کولو او ځان بساينې ته د رسېدو په موخه، اړتيا ده چې تر منځمهاله مودې پورې نړيواله ټولنه د افغانستان له خلکو سره خپلو مالي مرستو او ژمنو ته دوام ورکړي.

هغه وايي:"د دغې ګډې هڅې په ترڅ کې، اړتيا ده، چې د افغانستان دولت خپلو نړيوالو شريکانو ته ډاډ ورکړي، چې ښې حکومتولۍ او له سرچينو د سمې ګټې اخيستنې په برخه کې پرمختګونو پراخوي؛ دا چې په ۲۰۱۹ زېږديز کال کې د افغانستان اقتصادي وده په نسبي توګه ښه شوې ده يو ښه خبر دی؛ خو بيا هم د امنيتي شرايطو خرابوالی او په سياسي وضعيت کې ابهام د دغه هېواد د اقتصاد د کمزوري کېدو لامل کېږي."

د دغه راپور د موندونو پر بنسټ، په ۲۰۱۹ زېږدیز کال کې د افغانستان د داخلي عوايدو کچه په بې سارې توګه د کورني ناخالص تولید ۱۴،۵ سلنې ته لوړه شوې ده؛ په داسې حال کې چې دغه رقم په ۲۰۱۸ زېږدیز کال کې ۱۳،۳ سلنه اعلان شوی و، د عوايدو را ټولولو  په مدیریت کولو کې د افغانستان دولت کړنې د یوه قوي او پایښت لرونکي سیستم په جوړولو کې د پرمختګ ښکارندويي کوي چې له افغانستان بانک څخه د مالي تادياتو لېږدول په کې شاملېږي.

د دغه راپور په یوه برخه کې راغلي، افغانستان د اقتصادي ودې د تحرک لپاره بالقوه وړتياوې لري، خو په دې برخه کې د فعالیتونو ترسره کول د نړيوالې ټولنې د مرستو له دوام او د افغانستان دولت ژمنو ته اړتیا لري چې سوداګرۍ او پانګونې ته یو مطلوب چاپېریال رامنځته کړي او له فساد سره د مبارزې په پار پراخ اصلاحات راولي.

نړیوال بانک وړانديز کوي چې د خصوصي سکټور د باور جوړونې په پار او په لنډ مهال کې د کاروبار د ښه کېدو په موخه لازمه ده چې د افغانستان دولت د سوداګرۍ او پانګونې د يوه مطلوب چاپېريال رامنځته کولو په موخه چټک او هر اړخيز اصلاحات عملي کړي او له فساد سره مبارزه د دولت د اصلاحاتو پروګرام په لومړيتوب کې راولي.

ورته راپورونه:

نظر ورکړئ

اعلانونه

Advertisement