د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د بلخ قومي مشرانو او مدني فعالانو د ملکي تلفاتو د مخنيوي غوښتنه وکړه

د بلخ قومي مشرانو او مدني فعالانو د ملکي تلفاتو د مخنيوي غوښتنه وکړه

Jan 27, 2020 - 16:04

مزارشريف (پژواک، ۷ سلواغه ۹۸): د بلخ ولايت يو شمېر قومي مشران او مدني فعالان وايي چې د ملي امنيت له سلاکار ډاکټر حمدالله محب سره په لیدنو کې يې له هغه د افغان ځواکونو د عملياتو پر مهال د ملکي تلفاتو د مخنيوي غوښتنه کړې ده.

په تازه پېښه کې د شنبې په شپه د بلخ ولايت په بلخ ولسوالۍ کې د هوايي بريد له امله د يوې کورنۍ ۷ غړي وژل شوي چې پراخ غبرګونونه يې له ځان سره لرل.

له دې سره هم مهاله دوه ورځې کېږي چې د امنيت شورا سلاکار حمدالله محب هم په مزارشريف دی او د خپل سفر موخه يې د امنيتي وضعيت ارزونه ياده کړې ده.

د بلخ ولايت د بوکې کلي قومي مشرانو، تېر ماښام په ياد کلي کې د هوايي بريد په تړاو د ملي امنيت له سلاکار سره ليدلي دي.

د بلخ ولسوالۍ قومي مشر حاجي سلطان پژواک ته وويل چې د امنيت شورا له سلاکاره يې د پوځي عملياتو پر مهال د ملکي وګړو د تلفاتو د مخنيوي غوښتنه وکړه.

نوموړي زياته کړه، همدا راز يې محب ته د خپلې سيمې د امنيتي ستونزو په تړاو هم معلومات ورکړل او د حل کېدو په برخه کې يې له مرکزي حکومته د مرستې غوښتنه وکړه.

دغه قومي مشر وايي چې له کابله راغلي پلاوي سره يې دا اندېښنې هم شريکې کړې چې د ملکي تلفاتو په زياتېدو سره د خلکو او حکومت تر منځ واټن نور هم زياتېږي.

هغه وويل: ((په بوکي کلي کې د ملکي خلکو پر کورونو بمبارد يوه لويه غميزه وه، چې له امله يې خلک پر حکومت اعتراض لري او ياد حالت دوام وکړي؛ نو د خلکو پر وړاندې به د حکومت شته باور نور هم زيانمن شي.))

په ورته مهال د بلخ د رسنيو په استازيتوب ډاکتر نجيب پيکان د امنيت شورا له مشاور سره په ګډه غونډه کې چې حکومت بايد د قانون پلي کېدو ته جدي پاملرنه وکړي.

هغه پژواک ته وويل چې حکومت بايد هغه ستونزې او خنډونه له منځه يوسي چې له امله يې د بيان ازادۍ ته زيان رسېږي.

د پيکان په خبره، د قانون له مخې اطلاعاتو ته لاسرسی د خلکو حق دی او زياتوي چې لا هم په بلخ ولايت کې يو شمېر ادارې رسنيو ته د معلوماتو د ورکولو په برخه کې ناغېړي کوي.

مدني فعال سيرت نوري پژواک ته وويل چې د امنيت شورا له سلاکار حمدالله محب سره يې د مدني ټولنو په استازيتوب غونډه کې ګډون کړی و.

هغه وويل چې له ياد پلاوي يې د مزارشريف ښار امنيت ته د جدي پاملرنې غوښتنه وکړه او همدا راز يې په ولسواليو کې د ملکي تلفاتو د مخنيوي په تړاو خپلې اندېښنې ورسره شريکې کړې.

نوري زياته کړه: ((موږ د امنيت شورا له سلاکار څخه غوښتنه وکړه، چې حکومت بايد ټولو افغانانو ته په يوه سترګه وګوري، داسې دې نه کوي چې يو سړی يوه ورځ اتل کړي او بله ورځ يې د مجرم په نوم  عمليات پرې وکړي.))

د هغه په وينا، حکومت او افغان ځواکونو بايد د قانون په رڼا کې برخورد وکړي او هر هغه څوک چې له قانون څخه سرغړونه کوي، نو پر وړاندې دې يې اقدامات وکړي.

په ورته مهال د ملي امنيت شورا  وياند جاويد فيصل وايي چې محب په بلخ کې د خلکو ستونزې واورېدې او د هغو په رڼا کې به راتلونکي اقدامات کوي.

د فيصل په خبره، شمال زون ته د ملي امنيت شورا د سلاکار د سفر اساسي موخه د امنيتي وضعيت ارزونه ده.

نوموړي وويل چې حکومت په شمال زون، په ځانګړي ډول په بلخ ولايت کې شته امنيتي ستونزو ته متوجه دی او د حل کېدو لپاره به يې اساسي ګامونه پورته کړي.

فيصل دا هم وويل چې د ملي امنيت شورا سلاکار په دغه سفر کې به د لويو لارو، په ځانګړي ډول د مزار- شبرغان لويې لارې د امنيت په تړاو جدي اقدامات وشي.

هغه د ملکي تلفاتو په تړاو هم د خلکو اندېښنې پر ځای وبللې او ژمنه يې وکړه چې حکومت په دې برخه کې هڅه کوي څو د ملکي تلفاتو مخه ونيول شي.

ټاکل شوې ده چې د ملي امنيت شورا سلاکار حمدلله محب به له بلخ وروسته د شمال يو شمېر نورو ولايتونو ته هم د امنيتي وضعيت د ارزونې په موخه سفرونه وکړي.

بل لور ته يو شمېر سرچينو پژواک ته وويل چې نن د ورځې تر پايه به د کورنيو چارو وزير هم د يو پلاوي په مشرۍ بلخ ته سفر وکړي.

د دغه سفر موخه په بلخ کې د پيل شوو پوځي عملياتو ارزونه او جاج اخيستل ښودل شوي دي.

ورته راپورونه:

نظر ورکړئ

اعلانونه

Advertisement