د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

بلخ کې یوه صنعتي شرکت نوي موټر او رېکشاوې تولید کړي

بلخ کې یوه صنعتي شرکت نوي موټر او رېکشاوې تولید کړي

Feb 26, 2020 - 16:23

مزارشريف (پژواک، ۷ کب ۹۸): بلخ ولايت کې يوه صنعتي شرکت نوي موټر او ريکشاوې توليد کړي خو مسوولين يې وايي چې د پلېټ په برخه کې ستونزې لري او حکومت بايد ورسره همکاري وکړي.

د ياد شرکت مسوولين وايي چې څلور کاله وړاندې يې د نقليه وسايطو جوړولو په برخه کې پانګونه پيل کړې وه چې اوس د برېښنايي او تيلي موټرو او ريکشاوو د توليد بشپړ ظرفيت لري.

د دوی په خبره، لا هم د دغه شرکت له خوا توليد شوو موټرو د پلېټ په برخه کې يو لړ ستونزې شته چې په حل کېدو سره به يې خپل توليدات بازار ته وړاندې کړي.

د امين نور صنعتي شرکت مسوول احمد ضيا احمديار د کب په اوومه پژواک ته وويل چې له څلور کالو راهيسې يې په مزارشريف کې د نقليه وسايطو د توليد چارې پيل کړې دي.

نوموړی وايي چې اوس ياد شرکت د برېښنايي او تيلي موټرو د توليد بشپړ ظرفيت پيدا کړی چې هره مياشت يو شمېر موټر او رېکشاوې توليدوي.

نوموړی وايي چې د موټرو او رېکشاوو ترڅنګ د برېښنايي موټرو لپاره بېټرۍ هم په همدغه شرکت کې توليديږي.

احمديار په خپلو خبرو کې وويل چې د موټرو او بېټريو د توليد دغه شرکت يې په ۱۵۰ جريبه ځمکه کې جوړ کړی دی.

هغه زياتوي چې د موټرو، رېکشاوو او بېټريو د توليد په دغه شرکت يې له ۱۵ تر ۲۰ ميليونه ډالرو پورې پانګونه کړې ده.

د نوموړي په خبره، د موټرو او رېکشاوو جوړېدو لپاره ځيني خام مواد په کور دننه تهيه کوي او يو شمېر له چين او هند هېوادونو واردوي.

احمديار وويل: ((موږ تيار يو چې خپل توليد شوي موټر او ريکشاوې بازار ته عرضه کړو؛ خو لا هم د پلېټ اخيستو برخه کې ستونزه لرو، اټکل دا دی چې تر درې مياشتو پورې به دغه مشکل حل شي چې ورسره سم به موږ خپل توليد شوي نقليه وسايل بازار ته وړاندې کړو.))

د هغه په وينا ډېر هېوادوال دې چې د دوی له خوا توليد شوي موټر بازار ته وړاندې شي او خلک يې وپېري.

د امين نور شرکت د موټر جوړولو برخې مسوول انجنير محمد ابراهيم هارون پژواک ته وويل چې تر دې مهاله يې ۷۵ عرادې موټر او ۲۸۰ عرادې ريکشاوې توليد کړي دي.

نوموړی وايي چې د موټرو، رېکشاوو او بېټريو د توليد دغه شرکت کې ۱۵۰ کسان په کار بوخت دي.

هغه زياته کړه چې دغه توليدي شرکت يې په ستندرد ډول جوړ کړی چې په کال کې تر شپږ زرو عرادې نقليه وسايطو د توليد ظرفيت لري.

انجنير هارون وويل، که د پلېټ او اسنادو مشکل يې حل شي؛ نو توليدات به يې د اوسني وخت په پرتله څو چنده زيات شي.

نوموړی زياتوي چې دغه موټر تر ۷۰ کيلومتره پورې سرعت اخيستی او چې يو ځل يې بېټرۍ چارج شي؛ نو سل کېلومټره مزل کولای شي.

د هغه په وينا، هغه موټر چې ماشين لري او تېل خوري؛ نو د سل کېلومتر مسير په طی کولو سره دوه نيم لېتره تېل مصرف لري.

د موټر جوړولو د دغه شرکت مسوول وويل چې توليد شوي موټر يې تر لس کلونو پورې په ښه کيفيت کې کار کوي.

هغه په خپلو خبرو کې دا هم وويل چې توليد شوي نقليه وسايط يې له ۱۲۰۰ امريکايي ډالرو څخه نيولې تر ۳۰۰۰ امريکايي ډالرو پورې قيمت لري.

د موټر جوړولو د دغه شرکت تخنيکي مسوول نجيب الله مومند پژواک ته وويل چې دغه موټر او رېکشاوې له پيل څخه تر پايه د دوی په شرکت کې تولیدېږي.

د هغه په خبره، د اوس لپاره يواځې د دغو موټرو ماشين له بهره واردوي چې اوس يې هڅې پيل کړي چې هغه هم همدلته توليد کړي.

د نجيب الله په خبره، يواځې د موټر جوړولو په برخه کې ۳۰ کسان په کار بوخت دي چې په يوه اوونۍ کې دوه موټره په اساسي ډول له ابتدا څخه تر پايه په بشپړ ډول جوړوي.

بل لور ته په دې اړه د بلخ د ترافیکو مدیر ایمل حمیدي پژواک ته وویل چې د تولید شوو موټرو د پلېټ او جواز ورکړې ستونزه باید له ولسمشرۍ ماڼۍ او د ترافیکو له عمومي مدیریت څخه حل شي.

د هغه په خبره، کوم شرکت چې په مزار کې موټر تولید کړي، وړاندې تر دې یې له دوی سره اړيکه نه ده نېولې.

 نوموړي وویل، په دې برخه کې چې مرکزي اداره ورته هر ډول لارښوونه وکړي، نو دوی به یې عملي کړي خو په داسې يو حالت کې د پلېټ ورکړه د ده له توانه لوړه خبره ده.

ورته راپورونه:

نظر ورکړئ

اعلانونه

Advertisement

Maiwand Bank - Just Banking