کابل (پژواک، ۱۴ ورى ٩٩): له کرونا ویروس سره د مبارزې لپاره بلخ او فاریاب ولایتونو ته ۵۰ ، ۵۰ میلیونه افغانۍ او سمنګان، جوزجان او سرپل ولایتونو ته شل، شل میلیونه افغانۍ لېږدول کېږي.
د ولسمشر د ویاند دفتر په خبرپاڼه کې راغلي چې ولسمشر محمد اشرف غني تېره شپه د ویډیو کنفرانس له لارې، له کرونا ویروس سره د مبارزې لپاره د یادو ولایتونو له والیانو سره خبرې وکړې.
په خبرپاڼه کې راغلي چې دغو والیانو له ولسمشر سره د کرونا ویروس د مخنیوي په اړه په وقایوي اقداماتو، د ولسوالیو په کچه د قرنطین ساحو او کمېټو جوړولو، د بازارونو د مدیریت لپاره د چمتوالي او د احتکار د مخنیوي په اړه خپل نظریات شریک کړي دي
ولسمشر غني په دې ویډيويي کنفرانس کې ویلي:"بلخ او فاریاب ولایتونو ته ۵۰، میلیونه افغانۍ او سمنګان، جوزجان او سرپل ولایتونو ته به ۲۰ میلیونه افغانۍ ولېږدول شي، ترڅو د یوه شفاف میکانېزم له لارې کرونا ویروس سره د مبارزې په موخه مصرف شي".
د ده په وینا، د دولت رهبري پلاوی له کرونا ویروس سره د مبارزې په برخه کې حد اقل د ورځې دوه درې ساعته د تصمیم نیونې غونډې جوړوي.
هغه په دغه لیدنه کې والیانو ته لارښوونه وکړه چې د خپلو ولایتونو (بلخ، سمنګان، جوزجان، سرپل او فاریاب) اړوند د اړمنو کسانو واقعبینانه اټکل وړاندې کړي، ترڅو له هغوی سره لازمې مرستې وشي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن