کندهار (پژواک، ۱۹ وری ۹۹) : د کندهار ولایت مقام وایي چې پرون دلارې خلاصیدو وروسته د سپین بولدک له لارې نږدې لس زره افغانان هیواد ته ستانه شول.
تر دې مخکې د پاکستان حکومت اعلان کړی و، چې د افغان حکومت په غوښتنه له دوشنبې تر پنجشنبې ورځې پورې د تورخم او سپین بولدک لارې د څلور ورځو لپاره پرانیزي.
دا لارې پاکستان د کرونا ناروغۍ د مخنیوي په موخه شاوخوا درې اونۍ مخکې بندې کړې وې.
د کندهار ولایت مقام لخوا په یوه خپره شوې خپره شوې خبرپاڼه کې راغلي، چې پرون د ورځې تر پایه پورې له پاکستان څخه افغانستان ته د سپین بولدک له لاري ۹ زره ۱۹۸ تنه مسافر راستانه شول.
سرچینې زیاته کړې، په دې کې زر تنه مسافر په پاسپورټ او ویزه او پاتې ۸ زره ۱۹۸ تنه بې پاسپورته هیواد ته راستانه شول، چي د عامي روغتیا ریاست د ۵۰ تنه روغتیايي پرسونل تر دقیق سکرین وروسته ورته د راتګ اجازه ورکړل شوه.
په خبرپاڼه کې راغلي،دغه راز مسافرینو ته د وقایوي لارښوونو تر څنګ ورته جدي توصیه کیدل، چي تر ۱۴ ورځو پوري ټول مسافر په خپلو کورونو کي ځانونه قرنطین کړي.
د ولایت مقام وایي، په راستنو شویو مسافرو کي یوازي یوه تنه ښځه په کرونا ویروس مشکوکه وه، چي د سمپل اخیستلو او قرنطین په موخه د عینو میني په ۳۵۰ بستریز روغتون کي تر مراقبت لاندې ده او پاتې نورو مسافرو د روغتیاپالانو له نظره کومه د کرونا علایم په ځان کي نه لرل.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن