د پژواک خدمتونه

د انځورونو څانګه

غږيزه څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د کابل ښاروالي: د کابل ښار ۸۰ سلنه لوړپوړې ودانۍ بې پلانه او د زورواکو په ملاتړ جوړې شوې دي

د کابل ښاروالي: د کابل ښار ۸۰ سلنه لوړپوړې ودانۍ بې پلانه او د زورواکو په ملاتړ جوړې شوې دي

Jul 08, 2020 - 17:04

کابل (پژواک، ۱۸ چنګاښ ۹۹): د ولسي جرګې یو شمېر غړي د کابل ښاروالي پر فساد تورنوي، خو داوود سلطانزوی وایي چې په دې اداره کې یې د فساد د له منځه وړو لپاره پروګرام تر لاس لاندې نیولی دی.

ولسي جرګې نن د کابل والي داوود سلطانزوی ور غوښتی و څو د فساد شتون، خپلسرو جوړې شوې لوړپوړو ودانیو، اړمنو ته د وچې ډوډۍ د وېش په بهیر کې د نه شفافیت او نورو مسایلو په اړه د خلکو استازو ته ځواب ووایي.

د جرګې یو شمېر غړو په کابل ښار کې د ځینو دولتي او شخصي ځمکو د عصب او پر خپلسر د لوړپوړو ودانیو د جوړولو له امله شکایت وکړ او ویې ویل چې د کابل په ښاروالۍ کې سیستماتیک فساد او جعلي اسناد موجود دي.

محمد داوود سلطان زوی وویل، نه یوازې د کابل په ښاروالۍ، بلکې په ټولو ادارو کې فساد شته خو د کابل ښاروالۍ تازه رهبرۍ داسې پروګرام په پام کې لري څو د سیستماتیک فساد مخه ونیسي.

هغه په دې اړه ډېر جزئیات وړاندې نه کړل خو ویې ویل چې دغه پروګرام په مستقیم ډول د ملي امنیت عمومي ریاست او لویې څارنوالۍ سره په مرسته پرمځ وړي.

هغه وویل: «له خپلسرو او غیر قانوني لوړپوړو ودانیو سره چلند د کابل ښاروالۍ له توانه لوړ دی، موږ په دې اړه له ټولو دولتي بنسټونو د مرستې غوښتنه کوو څو د هغږ مخه ونیسو، ډېری لوړپوړې ودانۍ د زورواکو له خوا جوړې شوې او یا یې ملاتړ شوی دی.»

د هغه په خبره، اوس مهال چې په کابل ښار کې لوړ پوړه ودانۍ جوړې شوې، له ۷۰ تر ۸۰ سلنه یې غیر پلاني دي او د دغه ستونزې حل ډېر وخت ته اړتیا لري.

د سلطانزوی په خبره، له درېیو میاشتو راهیسې چې د کابل د ښاروال په توګه ټاکل شوی، د هېڅ ښارګوټي او لوړپوړې ودانۍ د جوړېدو امر یې نه دی ورکړی او تر هغه وخته چې ښارګوټی او کومه لوړپوړې ودانۍ خپل اسناد طی مراحل نه کړي او د پلان مطابق نه وي، د جوړېدو اجازه نه ورکوي.

هغه اړمنو کسانو ته د وچې ډوډي د وېش په اړه چې د کرونا ویروس د خپراوي د مخنیوي لپاره د لګېدلو بندیزونو له امله له اقتصادي ستونزو سره مخ وو، وویل: «څلوېښت ورځې مې د نانوای په توګه کار وکړ، ان د شپې له خوا مې ډوډۍ په خوب لیدلې، په څلوېښتو ورځو کې چې دغه بهیر دوام درلود، د ۳۱۷ زره کورنیو لپاره وچه ډوډۍ ووېشل شوه.»

هغه وایي چې په ټوله کې ۱۱۷ ميلیونه ډوډۍ وېشل شوې چې یو اعشاریه پنځه ميلیونه افغانۍ بیه یې درلوده او هغه ارقام چې په ټولنیزو شبکو کې خپرېږي، له حقیقته لري دي.

هغه زیاته کړه: «د غویي له ۱۰مې د چنګاښ تر ۱۸مې د کابل ښار شاوخوا ۶۰ سلنه اوسېدونکو ته وچه ډوډۍ وېشل شوې ده.»

هغه وایي چې د مستحقینو نوملړ د ګذر وکیلانو او ټولنیزو شوراګانو له خوا تیار شوی او د کابل ښاروالۍ د هغه په تیاري کې هېڅ رول نه درلود.

د کابل ښاروال همداراز وویل، هڅې روانې دي څو په دې اداره کې د خدمتونو وړاندې کولو بهیر ښه شي او تنظیمي او د سرسبزۍ خدمتونه هم خصوصي سکټور ته وسپارل شي.

هغه زیاته کړه چې ټاکل شوې په راتلونکو درېیو میاشتو کې د قلعه زمان خان، دشت برچي او خبرخانې د کوتل د سړکونو د قیر کولو کار هم پیل شي.

نوموړي له فساد سره د مبارزې او د خپلسرو لوړ پوړو ودانیو د جوړولو د مخنیوي په برخه د ملي شورا له غړو د مرستې غوښتنه وکړه او وویل چې د ملي شورا او نورو بنسټونوله مرستې پرته سخته ده چې له دغه ډول ستونزې سره مبارزه وشي.

ورته راپورونه:

نظر ورکړئ

اعلانونه

Advertisement

Etisalat Get more data, Etisalat Afghanistan