کابل (پژواک، ۱۹ چنګاښ ۹۹): د کانونو او پټرولیم وزارت غواړي د کوچنیو کانونو د استخراج لپاره داسې میکانیزم جوړ کړي چې د حکومت، خصوصي سکتور او خلکو ترمنځ د باور فضاء ورغوي او ولسي مشارکت ډاډمن کړي.
د کانونو او پټرولیم وزارت په خبرپاڼه کې راغلي چې د ۳۴ ولایتونو له والیانو او په ولایتونو کې د کانونو او پټرولیم ریاستونو له رئیسانو سره د ویډیو کنفرانس له لارې د کابینې د مصوبې په اړه د کانونو او پټرولیم وزارت او د سیمه ییزو ارګانونو خپلواکې ادارې ګډه غونډه نن ماسپیښین د سیمه ییزو ارګانونو خپلواکې ادارې د غونډو په تالار کې ترسره شوه.
سرچینه لیکي چې د کانونو او پټرولیم وزارت سرپرست محمد هارون چخانسوري وویل :« موږ د کانونو په سکتور کې لازم تحرک او شفافیت ته ژمن یو او په دغه سکتور کې به ولسي مشارکت ته زمینه برابرو.»
چخانسوري وېیلي چې دغه وزارت غواړي د کوچنیو کانونو د استخراج لپاره یو داسې میکانیزم جوړ کړي چې د حکومت، خصوصي سکتور او خلکو ترمنځ د باور فضاء بېرته ورغوي او ولسي مشارکت ډاډمن کړي.
محمد هارون چخانسوري والیانو او په ولایتونو کې د کانونو او پټرولیم وزارت رئیسانو ته د کابینې د مصوبې پر بنسټ وېیلی چې و لایتي ادارې او په ولایتونو کې د کانونو او پټرولیم ریاستونه دې په هر ولایت کې د کانونو په اړه ولسي معلومات راټول او په لسو ورځو کې یې له دغه وزارت سره شریک کړي.
دغه راز هغه په دغه ناسته کې وېیلي چې د کانونو د وضعیت په اړه دې د محلي او مرکزي ادارو ترمنځ د همغږۍ رامنځته شي.
سرچینه د جزییاتو له ورکولو پرته لیکي چې غونډې کې والیانو او د کانونو او پټرولیم وزارت ولایتي رئیسانو هم خپل وړاندیزونه او ستونزې له چارواکیو سره شریک کړل.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن