کابل (پژواک، ۱۱ زمری ۹۹) : یوه باوري سرچینه وایي چې د طالبانو د پاتې ۴۰۰ بندیانو د خوشې کولو موضوع هم حل شوې او اټکل کیږي چې راتلونکې اوونۍ بین الافغاني مذاکرات پیل شي.
تر اختره مخکې د افغانستان حکومت قطر کې د امریکا او طالبانو د تړون له مخې، د طالبانو ۴۶۰۰ بندیان خوشې کړي وو، خو د پاتې څلورو سوو له خوشې کولو څخه یې له دې امله ډډه کوله، چې خطرناک بندیان دي او ستر جرمونه یې کړي دي.
ولسمشر اشرف غني پرون سهار د اختر تر لمانځه وروسته په خپلو خبرو کې د طالبانو د پنځه زره کسیز بندیانو له لېست څخه د ۴۰۰ بندیانو د نه خوشې کولو په هکله وویل، چې د دغو څلورو سوو بندیانو په اړه دی د ولسمشر په توګه د اساسي قانون او د جزا د قانون له مخې پرېکړه نه شي کولی.
خو هغه په ډاګه کړه چې دا په دې معنی هم نه ده، چې د دغو بندیانو د خوشې کولو په اړه د حکومت ځواب منفي دی.
ولسمشر غني وویل، چې په نږدې موده کې به د افغانستان ولس ته مراجعه وکړي او له هغوی څخه به مشوره وغواړي.
هغه زیاته کړه چې ډېر ژر به یوه مشورتي لویه جرګه را وغواړي او جرګه به د دغو پاتې څلور سوو طالب بندیانو د برخلیک په اړه پرېکړه وکړي.
خو یوې باوري سرچینې چې د نوم له اخیستلو یې ډډه کوله، د زمري په ۱۱مه، پژواک اژانس ته وویل چې حکومت اوس د امریکا په غوښتنه د پاتې ۴۰۰ طالب بندیانو د خوشې کولو پرېکړه کړې ده.
سرچینې زیاته کړه چې دا بندیان راتلونکو دوو درېیو ورځو کې خوشې او تر هغه وروسته د راتلونکې اوونۍ په اوږدو کې د بین الافغاني مذاکراتو د پیلېدو امکان شته دی.
بلخوا یادې سرچینې دا هم وویل چې د لوی اختر درېیو ورځو لپاره د حکومت او طالبانو لخوا اعلان شوی اوربند به هم غځول کیږي.
د سرچینې د معلوماتو له مخې، د اوربند د غځېدلو پرېکړه د ولسمشر اشرف غنی، زلمي خلیلزاد، ډاکتر عبدالله او پخواني ولسمشر حامد کرزي تر منځ ګډه ناسته کې شوې ده.
د افغانستان د حکومت رسمي سرچینو تراوسه په دې اړه څه نه دي ویلي.
د افغان حکومت له زندانونو څخه د پنځه زره طالب بندیانو خوشې کیدل د امریکا او د طالبانو ترمنځ د روان ۲۰۲۰ میلادي کال د فبرورۍ د ۲۹ مې د تړون یوه مهمه برخه وه، چې د بندیانو د خوشې کولو لس ورځې وروسته د بین الافغاني خبرو پیلیدل په پام کې نیول شوي وو، خو افغان حکومت له خوا د بندیانو په خوشې کیدو کې د ځنډ له امله بین الافغاني خبرې له دغه تړون څخه د پنځه میاشتو په تېرېدو لا هم نه دي پیل شوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن