کابل (پژواک، ١٦ زمرى ٩٩) : ولسمشر اشرف غني د اسټرالیا فورتسیکو مېټل ګروپ کمپنۍ ريیس سره په افغانستان کې د پانګونې په فرصتونو خبرې وکړې.
له ارګ څخه د زمري په ١٦مه، پژواک اژانس ته په يوه استول شوې خبرپاڼه کې راغلي، چې د اسټرالیا دغه کمپنۍ د اوسپنې تولید، د کانونو سکتور او د تجدید وړ انرژۍ په برخو کې فعالیت لري.
سرچينې زياته کړې، په دغه ویډيو کنفرانس کې چې په ارګ کې ترسره شو، په افغانستان کې د تجدید وړ انرژۍ او کانونو په برخو کې د پانګونې پر لارو چارو بحث او خبرې وشوې.
د فورتسیکو مېټل ګروپ کمپنۍ ريیس انډریو فوریست وویل، دغه کمپنۍ په سیمه کې د کانونو د استخراج او د تجدید وړ انرژۍ په برخو کې ښې تجربې لري او په هغو هیوادونو کې چې د تجدید وړ انرژۍ د غوره تولید وړتیا لري، پانګونه کوي.
وروسته ولسمشر غني د افغانستان د طبیعي منابعو او د کانونو سکتور او د تجدید وړ انرژۍ په ځانګړي ډول د اوبو او لمر منابعو څخه د انرژۍ تولید په برخو کې د پانګونې د فرصتونو په اړه معلومات ورکړل.
همدا راز په دغه ویډیو کنفرانس کې د داخلي پانګوالو په مشارکت د بهرنیو کمپنیو له لوري د افغانستان د اوسپنې او مسو کانونو په برخه کې د پانګونې په اړه بحث وشو.
د فورتسیکو مېټل ګروپ اسټرالیایي کمپنۍ ريیس په افغانستان کې له پانګونې سره د لېوالتیا څرګندولو پر مهال وویل، افغانستان د طبیعي منابعو له اړخه بډای هېواد دی او زیات امکانات شته چې د تجدید وړ انرژۍ په یو عمده تولیدونکي هېواد بدل شي.
نوموړي د تجدید وړ انرژۍ د تولید او د کانونو د استخراج په برخو کې پانګونې ته د خپل تیاري په اړه وویل، ډېر ژر به افغانستان ته یو پلاوی واستوي، ترڅو په دې برخه کې د ګډ کار په موخه خپلې ارزونې پیل کړي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن