کابل (پژواک، ۱۷ زمری ۹۹) : د امریکا د بهرنیو چارو وزارت هیله څرګنده کړې چې د افغانستان د سولې مشورتي لویې جرګې به د ۴۰۰ طالب بندیانو دخوشې کولو پریکړه وکړي.
د امریکا د بهرنیو چارو وزارت د سولې په اړه د مشورتي لویې جرګې له تر سره کېدو هر کلی کړی او هغه یې په افغانستان کې د جګړې د پای ته رسېدو لپاره تاریخي فرصت بللی دی.
د امریکا د بهرنیو چارو وزارت لخوا نن د زمري په ۱۷مه، په یوه خبرپاڼه کې ویلي چې د ۴۰۰ طالب بندیانو ازادول به د بین الافغاني خبرو پیلېدولامل شي.
د امریکا د بهرنیو چارو وزارت د بهرنیو چارو د وزیر مایک پومپیو له خولې لیکلي : “طالبانو دغه راز ژمنه کړې ده چې د خبرو په مهال، چې اړخونه به پکې د اوږدې او بې رحمه جګړې د ختمولو پر سیاسې لاروچارو پریکړه وکړي او پر یوه تلپاتي اوهراړخیز اوربند به هوکړه وکړي، په تاوتریخولي او مرګ-ژوبلې کې به د پام وړ کموالی راولي. متحده ایالتونه اراده لري چې طالبان پر دغو ژمنو ټینګ وساتي.”
سرچینې زیاته کړې، چې د جرګې غړي به د پاتې ۴۰۰ طالب بندیانو د ازادولو پرېکړه وکړي چې د سولې د خبرو اترو پر وړاندې دا وروستی خنډ هم لرې شي.
د امریکا د بهرنیو چارو وزارت ولسمشر غني، د ملي مصالحې عالي د شورا مشر ډاکټر عبدالله او د لویې جرګې ګډونوال هڅولي چې د سولې په خاطر دې له دې تاریخي موقع ګټه واخلي ترڅو جګړه ودریږي.
له دې سره یو وخت کې د امریکا د بهرنیو چارو وزیر مایک پمپیو هم د مشورتي لویې جرګې له تر سره کېدو د هر کلي ترڅنګ پر خپل ټوېټر لیکلي چې د دغه جرګې غړي به د سولې په اړه ملاتړ لا یو ځای کړي.
هغه زیاته کړې چې تر څلوېښت کلنې جګړې، وینې ټویېولو او خرابیو وروسته، طرفین چمتو شوي چې خبرو اترو ته د رسیدو لپاره سیاسي پروسې ته لاره هواره کړي.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هم د سولې مشورتي لویې جرګې څخه د هر کلي ترڅنګ ویلي چې ټول اړخونه باید د سولې تاریخي فرصت له لاسه ورنه کړي.
هغه ویلي:”لکه څنګه چې دوی دا کار کوي، د امریکا متحده ایالات به د دوی ترڅنګ ودریږي.”
په افغانستان کې د ناټو په چوکاټ کې د غوڅ ملاتړ ماموریت او اروپايي ټولنې هم د سولې مشورتې لویې جرګې څخه د هر کلی کړی دی.
ولسمشر محمد اشرف غني له جرګې څخه د ملاتړ په اړه له امریکا متحده ایالاتو څخه مننه وکړه.
د سولې مشورتي لویه جرګه نن جمعه د ولسمشر غني لخوا پرانیستل شوه او د ډاکټر عبدالله عبدالله په ریاست یې په کار پيل وکړ چې درې ورځې به دوام وکړي.
وسله والو طالبانو بیا د جرګې له راغوښتلو سره مخالفت څرګند کړی دی.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن