کندوز ښار (پژواک، ٢١ زمرى ٩٩): د کندوز امنيتي چارواکي ادعا کوي چې د دغه ولایت په علي اباد ولسوالۍ کې نهه وسله وال طالبان د خپل ماين چاودنې وژلي او يو شمېر نور يې ټپيان کړي دي.
د کندز د پوليسو وياند هجرت الله اکبري د زمري په ٢١مه پژواک خبري اژانس ته وويل، تېره شپه وسله والو طالبانو غوښتل چې د کندوز ښار- علي اباد ولسوالۍ پر لويه لار د ګذر خزانې په سيمه کې د امنيتي ځواکونو د نښه کولو په موخه ماين ځاى پر ځاى کړي چې چاودنه يې پرې وکړه.
د هغه د معلوماتو له مخې، په دې پېښه کې نهه وسله وال طالبان وژل شوي چې په وژل شوو کې د طالبانو قوماندان سيف الرحمن مشهور به يک شانه هم په کې شامل دى.
اکبري زياتوي چې په دې چاودنه کې يو شمېر طالبان ټپيان شوي هم دي خو تر اوسه يې کره شمېره معلومه نه ده.
دغه راز کندوز کې د ٢١٧ پامير قول اردو له لوري په خپره شوې خبرپاڼه کې راغلي چې طالبانو د علي اباد ولسوالۍ په عرضبيګي سيمه کې ماين ځاى پر ځاى کاوه چې چاودنه يې پرې کړې ده.
سرچينه وايي چې په دې چادونه کې اته وسله وال طالبان وژل شوي دي.
بل لور ته وسله والو طالبانو تر اوسه په دې اړه د پژواک اړيکه نه ده ځواب کړې.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن