پلخمري (پژواک، ٢٣ زمری ٩٩): د بغلان ولایت یو شمېر دیني عالمانو د څلور سوه طالب زندانیانو د خوشې کولو په برخه کې د لویې جرګې د پرېکړې ملاتړ وکړ .
د روانې اوونۍ په پيل کې د ٤٠٠ طالب زندانيانو د برخليک معلومولو په موخه کابل کې مشورتي لويه جرګه جوړه شوه.
دغې جرګې بيا پرېکړه وکړه چې سولې ته د رسېدو په موخه حکومت بايد د طالبانو پاتې زندانيان هم ازاد کړي.
د اړوندې موضوع په اړه د بغلان د حج او اوقافو ريیس مولوي نقیب الله سجاد وویل چې د افغانستان خلک او په ځانګړې توګه د دغه ولایت دیني عالمان د لویې جرګې پرېکړه ستایي او له طالبانو غواړي چې نور سولې ته د رسېدو لپاره د پام وړ ګامونه اوچت کړي.
سجاد له حکومت څخه هم غوښتنه وکړه چې د بندیانو د خوشې کولو لړۍ پیل کړي ترڅو بین الافغاني خبرو ته زمينه برابره شي.
دغه راز بل ديني عالم مولوي سید باقر هاشمي وویل چې افغانان سولې ته د رسېدو لپاره د هر ډول پرېکړې ملاتړ کوي .
ده وویل: ((موږ د لویې جرګې د پرېکړې ملاتړ کوو او دغه ګام سولې ته د رسېدو لپاره خورا مهم بولو.))
یو شمېر نورو ديني عالمانو هم ورته څرګندونې وکړې او هرڅه ژر يې د بين الافغاني مذاکراتو د پيلېدو غوښتنه وکړه.
د ځينو سرچينو په وينا، ټاکل شوې ده چې د راتلوونکي اوونۍ په اوږدو د حکومت مذاکره کوونکى پلاوى قطر ته ولاړ شي او هلته د طالبانو له استازو سره د سولې اړوند مذاکرات پيل کړي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن