د پژواک خدمتونه

د انځورونو څانګه

غږيزه څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

"د کندهار پوهنی بهیر د اندېښنې وړ دی"

"د کندهار پوهنی بهیر د اندېښنې وړ دی"

Sep 05, 2020 - 18:47

کندهار (پژواک، ۱۵ وږی ۹۹): د کندهار د پوهنې ریاست چارواکي وايي، د دې ولایت پوهنیز بهیر د اندېښنې وړ دی، ځکه په دې تېرو کلونو کې یې پر زیر بناوو کار نه دی شوی.

دغه څرګندونې د پوهنې رییس محب احمد روښان نن د وږي په ۱۵مه د ښوونیز کال د پيل په مراسمو کې وکړې چې یو شمېر چارواکو، ښوونکو او زده کوونکو په کې ګډون کړی وو.

روښان وویل، جګړه، اقتصادي فقر او په ټولنه کې د بې سواده قشر شتون لامل شوی چې پوهنیز بهیر یرغمل وساتي.

هغه زیاته کړه، په تېرو ۱۸ کلونو کې غوره فرصتونه موجود وو خو په عمدي یا قصدي توګه د پوهنې بهیر د ودې او زېربناوو د رغولو لپاره کار نه دی شوی.

د ده په خبره، له همدې امله د کندهار پوهنیز بهیر د اندېښنې وړ دی.

د نوموړي په وینا، د پوهنې بهیر پر څلور اصله مشتمل دی چې تشکیل، کتاب، ودانۍ او وړتیا لرونکی مامور دي، له بده مرغه چې دلته څلورو واړو دروند زیان لیدلی دی.

روښان وویل: ((موږ په کندهار کې ۱۱ زره ښوونکو ته اړتیا لرو، خو ټولې چارې په ۶ زره ښوونکو مخ ته وړو، هر کال د ۴ زره حق الزحمه ښوونکو تشکیل راکول کېږي، خو دا چې معاش یې پر وخت نه دی او مسلکیت ته په کې پام نه کېږي روحیه یې ځپل کېږي.))

ده زیاته کړه، د پوهنې ریاست د زده کوونکو لپاره ۲ میلیونه کتابونو ته اړتیا لري، خو یوازې ۴۰۰ زره کتابونه ورکړل شوي، دغه راز د معیاري ودانيو په برخه کې هم ګڼې ستونزې شته.

هغه دغه راز یادونه وکړه چې د کلونو په تېرېدو د کندهار په ۶ ولسوالیو نېش، میانشین، خاکرېز، غورک، ښوراوک او معروف کې د پوهنې بهیر سقوط دی هلته یو ښوونځی هم نشته.

خو ده دا هم وویل چې د کندهار په ۳ میلیوني نفوس کې د ټولو زده کوونکو شمېر ۲۳۸ زره دی چې د ډېر تاسف وړ دی، ځکه دا په پوهنیز بهیر کې د خلکو کم رنګه ګډون ښيي.

خو ده له مرکزي ادارې هم ګیله وکړه چې محاسبه د داوود خان د واکمنۍ د مهال د ۱،۳ میلیونه پر سر کېږي.

د پوهنې رییس د پوهنیز بهیر د ودې په موخه له قومي مشرانو وغوښتل چې په اداره کې د فرد په تغیر سره بدلون نه راځي تر هغه چې بنسټیزې اړتیاوې پوره نه شي.

دغه راز ټینګار یې وکړ چې د کندهار د پوهنې په بهیر کې دې سیاسي لاسوهنې نه کېږي.

نوموړي له خلکو هم وغوښتل چې اولادونه ښوونځیو ته ولېږي او د پوهنې له ریاست سره د زیر بناوو په برابرو کې مرسته وکړي.

د کندهار ولایت مرستیال فیصل شېرزي وویل، د پوهنیز بهیر ښه والی د ولایتي ادارې لومړیتوب دی.

ده خبر ورکړ په کندهار کې د اقرا پروګرام له لارې د ۱۲۹ ښوونځیو لپاره د ودانیو جوړېدل تر کار لاندې دي چې ۶۰ یې ګټې ته چمتو شوي چې ډېر به د پوهنې ریاست ته په واک کې ورکړل شي.

ده هم له خلکو د پوهنیز بهیر د کمیت او کیفیت د ښه کولو په برخه کې همکاري وغوښته.

د کندهار د ولایتي شورا غړي حاجي سید جان خاکرېزوال وویل، که په هېواد کې جګړه نه وای او ډېره بودیجه پرې نه لګېدای نو په تېرو ۱۸ کلونو کې به د پوهنې په برخه کې لوی پرمختګونه شوي وای.

نوموړي د پوهنې له رییس څخه د بندو ښوونځیو پرانیستل وغوښتل خو ټینګار یې وکړ چې تش په نوم د ښوونځیو پرانیستل د منلو نه دي.

په ولسي جرګه کې د کندهار د خلکو استازي مقتدا میران وویل، د پوهنې د ټکني بهیر په برخه کې د ټولنې فرد فرد مقصر دی خو ده ټینګار وکړ چې نور نو باید د پوهنې د پرمختګ په برخه کې هر یو خپل مسوولیت ترسره کړي.

په کندهار کې سږنی تعلیمي کال داسې مهال پیل شو چې د ګڼو نورو ستونزو تر څنګ په دې ولایت کې لا هم ۱۳۷ ښوونځي تړلي دي او یوازې ۳۴۷ پرانیستي دي.

ورته راپورونه:

نظر ورکړئ

اعلانونه

Advertisement

Etisalat Get more data, Etisalat Afghanistan